ვინ არის ოთარ ფარცხალაძე, რომელსაც ,,ქართული ოცნების“ შავი საქმეების შესრულებაში ადანაშაულებენ? _ 1976 წელს დაბადებული ოთარ ფარცხალაძე მთავარი პროკურორის რანგში 2013 წლის 7 ნოემბერს გამოჩნდა. ამა წლის 30 დეკემბერს კი თანამდებობის დატოვება მოუწია, რაც, სავარაუდოდ, მის შესახებ სკანდალური ფაქტების გასაჯაროებას, კერძოდ, დიპლომის გაყალბებასა და გერმანიაში მის ნასამართლეობას უკავშირდება.
მთავარი პროკურორად ყოფნის პერიოდში ოთარ ფარცხალაძის მიმართ არაერთი ბრალდება ისმოდა. მათ შორის, საპატიმროში მყოფი ვანო მერაბიშვილი ოთარ ფარცხალაძეს საკნიდან გაყვანისთვის და ექსპრეზიდენტ სააკაშვილის ფინანსური საქმიანობის შესახებ ჩვენების მიცემის იძულებისთვის სდებდა ბრალს.
ამ საქმეზე გამოძიება 2016 წელს დაიწყო, მაგრამ ფაქტის დაუდასტურებლობის გამო, 2017 წლის თებერვალში გამოძიება შეწყდა. ამის შემდეგ საქმე სტრასბურგის სასამართლომ განიხილა და შემთხვევის არასათანადოდ გამოძიება დაადგინა.
ოთარ ფარცხალაძის წინააღმდეგ ამ დრომდე გამოძიება მიმდინარეობს მთავარ პროკურატურაში, საუბარია 2017 წლის მაისში მომხდარ შემთხვევაზე, როცა ფარცხალაძე სახელმწიფო აუდიტის სამსახურის უფროსს, ლაშა თორდიას თბილისის ერთ-ერთ კლუბში დაესხა თავს.
როგორც ლაშა თორდიამ განმარტა, თავდასხმის მიზეზი ფარცხალაძისა და მერიას შორის შესაძლო კორუფციული გარიგებების ფაქტები იყო, რასაც აუდიტის სამსახური იკვლევდა.
2018 წელს ოთარ ფარცხალაძის სახელი და გვარი ფარულ ჩანაწერებშიც გამოჩნდა, რაც სპორტის ყოფილი მინისტრის, ლევან ყიფიანის სარდაფში შესაძლო ჩაკეტვასა და მისი ცემის ფაქტს უკავშირდება.
ამასთან, “ომეგა ჯგუფის” მფლობელი, ბიზნესმენი ზაზა ოქუაშვილი ოთარ ფარცხალაძეს, ბიძინა ივანიშვილის სახელით, 4 მილიონი ლარისა და სიგარეტის ბიზნესიდან წილის მიღების მოთხოვნაში ადანაშაულებს.
ქვეყნის უმაღლეს ორგანოებზე ოთარ ფარცხალაძის შესაძლო გავლენებზე ,,გურია ნიუსთან“ პოლიტოლოგი გია ხუხაშვილი საუბრობს.
_ ბატონო გია, როცა საქმე უკავშირდება ყოფილ მთავარ პროკურორ ოთარ ფარცხალაძეს, გამოძიება, ხშირ შემთხვევაში, დროში იწელება ან საერთოდ ჩერდება. მაგალითად, გავიხსენოთ ვანო მერაბიშვილის საქმე, რომელზეც ქართულმა სასამართლომ გამოძიება შეწყვიტა, ხოლო სტრასბურგის სასამართლომ ქართული მართლმსაჯულება საქმის არასათანადოდ გამოძიებაში დაადანაშაულა.
აგრეთვე, გავიხსენოთ აუდიტის სამსახურის ყოფილ უფროსზე ლაშა თორდიაზე თავდასხმის ფაქტი, რომელიც 2017 წლის მაისის შემდეგ, დღემდე გამოუძიებელია.
ფარულ ჩანაწერებთან დაკავშირებით, რა გადაწყვეტილებას მიიღებს საგამოძიებო ორგანო, ჯერჯერობით, უცნობია, თუმცა სახელმწიფოს განწყობით თუ ვიმსჯელებთ, ამ საქმეზეც გამოძიება ჩვეული სცენარით წარიმართება.
რა გამოდის, სახელმწიფოს მხრიდან ხელშეუხებელია ოთარ ფარცხალაძე?
_ ეს მხოლოდ ჟურნალისტის კითხვა არ არის, მთლიანად საზოგადოება გაჟღენთილია ამ კითხვებით. ბუნებრივია, ხელისუფლება თავისი ქმედებით ამ სავარაუდო დანაშაულების მონაწილე ხდება.
ხელისუფლების პრობლემა თავის თავში გაზრდილი ურჩხულია, ანუ სისტემა ხელს აფარებს კრიმინალს. რეალურად ხელისუფლების ღირსებისა და პრესტიჟის საქმე უნდა იყოს ასეთი რეზონანსული საქმეების გამოძიება. თუ ამას არ აკეთებს, ბუნებრივია, ის საზოგადოების თვალში დამნაშავედ იქცევა.
ოთარ ფარცხალაძის ყველა საქმის გამოძიებასთან დაკავშირებით ხელისუფლება ვერ სარგებლობს უდანაშაულობის პრეზუმფციით. იმით განსხვავდება ხელისუფლება დანარჩენი საზოგადოებისგან, რომ მტკიცების ტვირთი მასზეა.
როცა საზოგადოებაში ჩნდება კითხვები ოთარ ფარცხალაძესტან დაკავშირებით, ხელისუფლება ვალდებულია, რომ ეს გამოიძიოს. თუ ხელისუფლება ამას არ აკეთებს, ფაქტობრივად, თვითონ ხდება დანაშაულში ეჭვმიტანილი.
_ როგორც ჩანაწერებიდან ირკვევა, ოთარ ფარცხალაძე პირდაპირ კავშირშია ბიძინა ივანიშვილთან, კერძოდ, ფულის გამოძალვის სქემაში ის, ივანიშვილსა და ზაზა ოქუაშვილს შორის შუამავლის როლს ასრულებს…
რას ფიქრობთ ბიძინა ივანიშვილისა და ოთარ ფარცხალაძის კავშირებზე?
_ მე რაღაც ბიძინა ივანიშვილის ინტერესებს ვერ ვხედავ. ვიხრები ვერსიისკენ, რომ არიან თაღლითური ჯგუფები, რომლებიც ბიძინა ივანიშვილის სახელის გამოყენებით საკუთარ კეთილდღეობას იწყობენ.
თუ ბიძინა ივანიშვილი ასეთ ხმაურიან ბრალდებებზე ხმას არ ამოიღებს, მაშინ დუმილი დანაშაულში მონაწილეობის დასტურია. არადა, მას მაინცდამაინც დიდი დრო არა აქვს, რომ გაემიჯნოს ამ სიბინძურეს.
დღეს ვიღაცები იმაზეც საუბრობენ, რომ ბიძინა ივანიშვილი ამ ადამიანების მძევალია, ეს ყველაფერი ძალიან სახიფათოა.
ზუსტად ვიცი, რომ ოქუაშვილის ირგვლივ მიმდინარე პროცესებს საელჩოები აკვირდებიან და ყველა დეტალს აწვდიან თავისი ქვეყნების სპეცსამსახურებს.
თუ შეერთებულ შტატებში სპეცსამსახურებს გაუჩნდათ განცდა, რომ აქ რაღაც კორუფციულ გარიგებებთან გვაქვს საქმე, არ გამორიცხოთ, რომ იქაც აღიძრას საქმე. ეს ხელისუფლებისთვის რას ნიშნავს, ხომ წარმოგიდგენიათ?!“, _ გვითხრა ხუხაშვილმა.
აღსანიშნავია, რომ მთავარ პროკურორად დანიშვნის შემდეგ, ოთარ ფარცხალაძის ქონება საგრძნობლად გაიზარდა.
ფარცხალაძის ადვოკატის, გაგი მოსიაშვილის განცხადებით, უკვე 5 წელია ოთარ ფარცხალაძე ბიზნესშია ჩართული. მოსიაშვილის თქმით, მისი შემოსავლის მთავარი წყარო ქართულ-ებრაული კომპანია Elbit-ის ბიზნესპროექტია, რასაც კომპანიის მფლობელ „საპარტნიორო ფონდი“ არ ადასტურებს.
