ოზურგეთის ბაზრიდან დაავადებული ძაღლის გაყვანას კატეგორიულად ითხოვენ

ოზურგეთის ბაზარში,  როგორც ვწერდით, დაავადებული ძაღლი დადის.

როგორც აქ დასაქმებულმა   ადამიანებმა გვითხრეს,   იმდენად სერიოზულადაა საქმე,  შესაძლოა, ამ ცხოველმა ნებისმიერი თანამშრომლის  დაავადებაც გამოიწვიოს.

-არ  შეგვიძლია გაძლება.  ეტყობა, ავადმყოფია. მუცელზე აქვს სოკოვანი წანაზარდები, მუდამ სისხლი სდის. დაძვრება სათავსოებში,  მოგვისპო ყველაფერი. არავინ ყურადღებას არ აქცევს…ვიღაც ქალი შემოვიდა და დაგვემუქრა,  გაგბრდღვნით,  ძაღლს ხელი არ ახლოთ თორემო…ვინ ახლო? აქ ყველა ძაღლს ჩვენ ვარჩენთ.  ჯანმრთელი ძაღლების მეტი რაა ბაზარში და პატრონი ჩვენ ვართ. იქნებ,  „გურია ნიუსი“ მოგვეშველოს ძველებურად…კი გახსოვთ,  ბევრი ადამიანი  რომ დაკბინა, ის ძაღლიც არ გაჰყავდათ…_ გვეუბნებიან და დახმარებას გვთხოვენ ოზურგეთის ბაზარში დასაქებული ადამიანები.

ა(აი)პ ოზურგეთის მომსახურების ცენტრის თანამშრომელი, ირაკლი გაბედავა გვეუბნება, რომ მათ მხოლოდ მონიტორინგის გახორციელება შეუძლიათ.

_ჩვენ მხოლოდ მონიტორინგს ვახორციელებთ და ვახდენთ სტერილიზაცია-კასტრაციას. დაკბენის შემთხვევაში ასევე ღონისძიება ტარდება და ცხოველი უკან აღარ ბრუნდება. თქვენს მიერ ნათქვამ შემთხევაში , ცხოველთა დამცველები იჩენენ კეთილ ნებას და ახორციელებენ შესაბამის ღონისძიებას, – გვითხრა მან.

სამწუხაროდ, ცხოველთა დამცველებს ჯერჯერობით ვერ დავუკავშირდით. ავადმყოფი ძაღლი კი ისევ ბაზრის ტერიტორიაზე დალასლასებს.

_ძალიან ცუდ დღეში ვართ. ეს ძაღლი არის ავადმყოფი. დაავადებულია გარეგნული ნიშნებით საშინელი მდგომარეობაშია. შეხედავ თუ არა, მაშინვე მიხვდები. არც ჭამა არგია უკვე, ძლივს დადის. სდის  სითხე და სისხლი. ვაიდა, ნაკბენზე უარესი  ამბავი მოხდეს და რაიმე დაავადება ადამიანზე  გადავიდეს, რა უნდა ვქნათ?  იქნებ, დაგვეხმაროთ, _ თქვა  „გურია ნიუსთან“ ოზურგეთის ბაზრის (შპს „სოფლის ნობათი“) დირექტორმა სოსო სიხარულიძემ.

ბატონმა სოსომ  გვითხრა, რომ ბაზარში დასაქმებული  მოქალაქეები მისგან ითხოვენ მოქმედებას, რომ დაავადებული ცხოველი გაიყვანონ ბაზრის ტერიტორიიდან.