20 დეკემბერს, ოზურგეთის დემოკრატიული ჩართულობის ცენტრში, ოზურგეთის 2023 წლის ბიუჯეტის პროექტის საჯარო განხილვა შედგა, რომელსაც ოზურგეთის საკრებულოს თავმჯდომარე, დავით დარჩია უძღვებოდა.
ოზურგეთის მუნიციპალიტეტის მერიამ წარმოადგინა 2023 წლის ბიუჯეტის პროექტის და 2023-2026 წლების პრიორიტეტების დოკუმენტის პრეზენტაცია.
ეს ყოველივე, სლაიდების მეშვეობით, აჩვენეს დარბაზში მყოფ დეპუტატებს, განხილვის მონაწილეებს.
ბიუჯეტის პროექტის ირგვლივ არაერთი კითხვა დაისვა, რომელსაც მერის პირველმა მოადგილემ გიორგი ღურჯუმელიძემ და საფინანსო-საბიუჯეტო სამსახურის უფროსმა პავლე ჭყონიამ უპასუხეს.
საკრებულოს ფრაქციებმა, ოზურგეთის გენდერული თანასწორობის საბჭომ, ადგილობრივ არასამთავრობო ორგანიზაციებმა, აგრეთვე საზოგადოების წარმომადგენლებმა, აქტუალურ ინიციატივებსა და რეკომენდაციებზე ისაუბრეს და საკუთარი საბიუჯეტო იდეები წარმოადგინეს.
საჯარო განხილვაზე საბიუჯეტო ინიციატივები და რეკომენდაციები წარადგინა ფრაქცია „ქართული ოცნება-დემოკრატიული საქართველოს“ თავმჯდომარემ, მარიკა ჩხიკვიშვილმა. ასევე ფრაქცია „საქართველოსათვის“ წარმომადგენელმა სოფო ქარცივაძემ.
ფრაქცია „საქართველოსათვის“ მიერ ინიცირებული რეკომენდაციები სატრანსპორტო თემას, ზვანის უბანში საბავშვო ბაღის მშენებლობას და სოციალურ საკითხებს შეეხებოდა.
განხილვაზე არ მოსულან ფრაქცია „ერთიანი ნაციონალური მოძრაობის“ წარმომადგენლები.მატ მიერ აქ გამოგზავნილი იყო რამდენიმე რეკომენდაცია, რომელიც შეეხებოდა ნაპირსამაგრი სამუშაოების მშენებლობის საკითხს, სოფელ სილაურში, წყალმომარაგების უზრუნველყოფის საკითხს ნასაკირალის პირველ და ნარუჯის პირველ, მესამე და მეექვსე რაიონებში.
ოზურგეთის გენდერული თანასწორობის საბჭოს მიერ მოსახლეობასთან შეხვედრების შედეგად გამოვლენილი პრიორიტეტების პრეზენტაცია წარმოადგინა საკრებულოს თავმჯდომარის მოადგილემ, ნინო ჭანიშვილმა.
საჯარო შეხვედრა კითხვა-პასუხის რეჟიმში წარიმართა, რა დროსაც ოზურგეთელმა მოქალაქემ, გიორგი მეხუზლამ დასვა საკითხი , ილიას ცნობილი ფრაზა-დევიზი: „ენა, მამული, სარწმუნოება“ ძველ მდებარეობაზე დააბრუნონ, გმირთა მოედნის კუთხეში და იქ განათავსონ.
აღსანიშნავია, რომ ილია ჭავჭავაძის ეს დევიზი, ოზურგეთში, ერთ-ერთ მაღალსართულიანი შენობის კედლებზე განთავსდა, ილიას სურათთან ერთად, რასაც საკმაოდ ბევრი მოქალაქის უარყოფითი რეაქცია მოჰყვა, არ მოიწონეს.
შეხვედრა ოზურგეთის მუნიციპალიტეტის საკრებულომ ეროვნული დემოკრატიული ინსტიტუტის (NDI) პროექტის „საარჩევნო და პოლიტიკური პროცესების მხარდაჭერა საქართველოში“ ფარგლებში გამართა.
ავტორი
