მიუსაფარი ცხოველების მოვლა-პატრონობის საკითხის გადასაწყვეტად, ოზურგეთის მუნიციპალიტეტში „მოქალაქეთა ასამბლეა“ შეიკრიბა და ექსპერტებთან თანამშრომლობით, ადგილობრივი ხელისუფლებისთვის რეკომენდაციები შეიმუშავა. „თანამონაწილეობისა და ჩართულობის ცენტრი სიპისის’’ მიერ ორგანიზებული შეხვედრები ჩატარდა USAID-ის ადგილობრივი თვითმმართველობის პროგრამის მხარდაჭერით, პროექტის – „სათათბირო დემოკრატიის ინსტიტუციური განვითარება ოზურგეთის მუნიციპალიტეტში“ ფარგლებში. „მოქალაქეთა ასამბლეის“ საქმიანობის შესახებ „გურია ნიუსი“ ოზურგეთის „მოქალაქეთა ასამბლეის“ კოორდინატორს, კოკა კიღურაძეს ესაუბრა.
კოკა კიღურაძე, „მოქალაქეთა ასამბლეის“ კოორდინატორი: „მოქალაქეთა ასამბლეა“ არის მოსახლეობისთვის მნიშვნელოვანი შესაძლებლობა, მონაწილეობა მიიღონ გადაწყვეტილების მიღების პროცესში. სამოქალაქო ორგანიზაცია „თანამონაწილეობისა და ჩართულობის ცენტრმა“, USAID-ის მხარდაჭერით, უზრუნველყო, რომ მიუსაფარი ცხოველების საკითხებზე მომუშავე ექსპერტები და ფასილიტატორები შეეკრიბა, რათა ოზურგეთის მუნიციპალიტეტის მოქალაქეებს ჰქონოდათ შესაძლებლობა, ეს მონაწილეობითი ინსტრუმენტი, საუკეთესო გუნდთან ერთად, წარმატებით გამოეყენებინათ.
„მოქალაქეთა ასამბლეა“ მოქალაქეთა ჩართულობის სხვა ფორმებისგან გამორჩეულია, ეს ინსტრუმენტი ითვალისწინებს: მონაწილეთა შემთხვევითი შერჩევის პრინციპს; მოქალაქეთა ინფორმირების მაღალ ხარისხს; პროცესში ყველა დაინტერესებული მხარის მონაწილეობის შესაძლებლობას; დელიბერაციას, სადაც ასამბლეის ყველა წევრს აქვს საკუთარი აზრის დაფიქსირების და ხმის მიცემის შესაძლებლობა.
ეს ყველაფერი, ერთობლიობაში, იძლევა შესაძლებლობას, რომ მოქალაქეებმა, სამ სხვადასხვა შეხვედრაზე, განსხვავებულ ფორმატში, გამართონ დისკუსიები და კენჭი უყარონ რეკომენდაციებს. რეკომენდაციები გადის უამრავ ფილტრს და გადაწყვეტილების მიმღებთან უკვე მზა ფორმით იგზავნება, რაც ნიშნავს, რომ მათი განხორციელებისთვის ფინანსური, ადმინისტრაციული, პოლიტიკური და სხვა სახის რისკები შემცირებულია.
ოზურგეთის მუნიციპალიტეტის „მოქალაქეთა ასამბლეა“ წარმოადგენს ოზურგეთის საზოგადოებას შემცირებულ მასშტაბში და იდენტურია შემდეგი კრიტერიუმების მიხედვით: გენდერული (პროცესში მონაწილე კაცების და ქალების რაოდენობა); საცხოვრებელი ადგილი (პროცესში მონაწილეობს ქალაქის და სოფლის მაცხოვრებლები); ასაკი (პროცესში ჩართულია როგორც ახალგაზრდები (29 წლამდე), ასევე 29 წლის ზევით მოქალაქეები. ისინი წინასწარ ეცნობიან ხედვებს, საკითხების გადაწყვეტის გზებს, ღირებულებებს, სამართლებრივ გარემოს. ამდენად, თითოეული რეკომენდაცია გადის ერთგვარ შეფასებას, რაც გულისხმობს იმას, რომ მათ მიერ მიღებული გადაწყვეტილება იქნება რეალისტური და განხორციელებადი როგორც ფინანსურად, ასევე სამართლებრივი თვალსაზრისით.
პროცესის დასრულების ბოლო ეტაპზე, შემუშავებულ რეკომენდაციებზე ადგილობრივი ხელისუფლების წარმომადგენლებს მიეცათ უკუკავშირის შესაძლებლობა და მხოლოდ ამის შემდეგ გაიმართა კენჭისყრის პროცესი. მოქალაქეებმა შეიმუშავდეს და მხარი დაუჭირეს ისეთ რეკომენდაციებს/ინიციატივებს, როგორებიცაა:
მიუსაფარი ცხოველების მიმკედლებელი მოქალაქეებისთვის წახალისების მექანიზმების დანერგვა; ცნობიერების ამაღლების ნაწილში ეფექტური საინფორმაციო კამპანიის ორგანიზება; ინტერმუნიციპალური თანამშრომლობა; მიუსაფარი ცხოველების სავალდებულო სტერილიზაცია/კასტრაცია/ვაქცინაცია და მათი აღრიცხვის მოწესრიგება; ცხოველთა დახმარების საზოგადოებრივი ფონდის დაარსება; საჯარიმო სანქციების შემოღება და მისი აღსრულების უზრუნველყოფა.
აღსანიშნავია, რომ შემუშავებული რეკომენდაციები რეაგირებისთვის გადაეგზავნა ოზურგეთის მუნიციპალიტეტს. გონივრულ ვადაში, დაიწყება მათი აღსრულების მონიტორინგის პროცესი, რომლის შედეგების შესახებ ასამბლეის მონაწილეებს და ფართო საზოგადოებას დამატებით მივაწვდით ინფორმაციას.
წინამდებარე მასალის მომზადება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს (USAID) ადგილობრივი თვითმმართველობის პროგრამის მეშვეობით. მასალა მომზადებულია „თანამონაწილეობისა და ჩართულობის ცენტრი სიპისის“ მიერ და შესაძლებელია არ ასახავდეს USAID-ის ან აშშ-ის მთავრობის შეხედულებებს.
პუბლიკაცია მომზადებულია USAID-ის ადგილობრივი თვითმმართველობის პროგრამის ფარგლებში, რომელიც მიზნად ისახავს საქართველოს მხარდაჭერას ადგილობრივი დემოკრატიის განმტკიცებასა და კეთილდღეობის დონის ამაღლებაში, დეცენტრალიზაციის და საჯარო მმართველობის რეფორმის განხორციელებასა და ისტორიული მიზნისკენ – ევრო-ატლანტიკურ სტრუქტურებში ინტეგრაციისკენ სწრაფვაში.
