31 აგვისტოს, ოზურგეთის მუნიციპალიტეტის საკრებულოს სხდომა გაიმართა.
სხდომის დასაწყისში საკრებულოს თავმჯდომარემ, დავით დარჩიამ დარბაზში მსხდომთ სთხოვა რაჭაში, სტიქიის დროს დაღუპულთა ხსოვნისთვის პატივი მიეგოთ.
სხდომაზე საკრებულოს წევრებს დავით დარჩიამ დღის წესრიგით გათვალისწინებული 15 საკითხი გააცნო, თუმცა, განხილვის დაწყებას ოპოზიციამ არ დაუცადა.
საკრებულოს წევრი ნაციონალური მოძრაობიდან, თათია ნიკოლაშვილი, თხილით სავსე პოლიეთილენის პარკით წამოდგა და თხილის გაუფასურების გამო, ხმამაღლა დაიწყო “ქართული ოცნების” დადანაშაულება:
_ ხალხის პრობლემა არის ეს თხილი, რომლის ფასი ლარზე ჩამოვიდა. ხელისუფლების წყალობით, მათთან გარიგებაში არიან სხვადასხვა კომპანიები, _ თქვა მან.
“ქართული ოცნების” მხრიდან ნიკოლაშვილს, როგორც ყოველთვის, სასწრაფოდ გამოეპასუხა საკრებულოს წევრი, ქეთი ხომერიკი:
_ ეს არის ცრუპენტელა ადამიანი. “ნაციონალურ მოძრაობას” არ აინტერესებს და არც არასდროს აინტერესებდა ხალხის ბედი. ეს ქალბატონი არის სიმულანტი, _ თქვა ხომერიკმა ნიკოლაშვილის მისამართით.
ჩხუბი და დავა კარგა ხანს გაგრძელდა, რისთვისაც, თითქმის, არანაირი ყურადღება არ მიუქცევია საკრებულოს თავმჯდომარეს და დანარჩენ წევრებს.
“ნაციონალებმა” სხდომა მალევე დატოვეს, თხილიანი პარკი მაგიდაზე დარჩათ.
_ თხილი ვის არ აქვს ეზოში? ბევრი არაა, მაგრამ “ბერძნულაა” და ვაჩუქოთ ვინმეს, მათგან მეტს რას გამორჩებით, _ იუმორი არ დაიშურა ზოგიერთმა დეპუტატმა.
“ოზურგეთის ბიუჯეტის შემოსულობებში, მილიონ 272 700 ლარი შემოსულია ჯარიმებისთვის გადახდილი თანხით”, _ განაცხადა გამოსვლისას საფინანსო სამსახურის უფროსმა პავლე ჭყონიამ.
“ა, ბატონო, რად გვინდა ქარხანა და მუშაობა. დააჯარიმე, ბიუჯეტში მილიონი არ აგცდება”, _ გაისმა საკრებულოს სხდომაზე აქა-იქ.
როგორც პავლე ჭყონიამ დააზუსტა, ეს არის მძღოლების მიერ საგზაო წესების დარღვევის შედეგად ჯარიმის სახით გადახდილი თანხები 2023 წლის დასაწყისიდან.
საკრებულოს “ნაციონალმა” წევრმა, გიორგი შილაკაძემ საკრებულოს სხდომაზე კომპანია “პარვუს ჯგუფის” მიერ მდინარე ბჟუჟის ხეობაში, გახმაურებული სამი მცირე ჰესის მშენებლობის შესახებ კითხვა დასვა და პასუხის გაცემა ითხოვა:
_ადგილობრივი მედიასაშუალებები წერენ, რომ კომპანია “პარვუს ჯგუფი”მდინარე ბჟუჟის ხეობაში სამი მცირე ჰესის აგებას აპირებს. წერენ, რომ საზოგადოებამ ამის შესახებ არაფერი იცის. რაღაც შეხვედრა კი ჩაუტარებიათ სოფელ გომში, მაგრამ მე შემოქმედელი კაცი ვარ და ამის შესახებ არაფერი გამიგია. მშენებლობის წინააღმდეგი არ ვარ, მაგრამ გვაინტერესებს, ვინ არიან ისინი, რა ლოკაციაზე აპირებენ ჰესის აშენებას? მათ უკვე ტყეში გზა გაჰყავთ. არ გვეუბნებით, არ მონაწილეობთ კომისიების სხდომებშიო…ა, ბატონო, ვაყენებ წინადადებას და გაგვაგებინეთ, რა ხდება, _ მიმართა მან საკრებულოს.
_ ჩვენ ამ ჰესების მშენებლობაზე ამჟამად ინფორმაცია არ გვაქვს. ეს თემა განხილვის საგანი გახდება და თქვენ შესაბამის ინფორმაციას მიიღებთ. კარგი იქნება, თუკი თქვენი კოლეგები თქვენსავით დაიცავენ საკრებულოს რეგლამენტს, _ უპასუხა ოპოზიციონერ დეპუტატს დავით დარჩიამ.
_ ეტაპობრივად ყველა ინფორმაციას გაიგებთ. თუკი ხალხის ნება და თანხმობა არ იქნება, არანაირი ჰესი არ აშენდება, _ თქვა ოზურგეთის მუნიციპალიტეტის მერის მოადგილე ნათია გოლიაძემ.
ოზურგეთის მუნიციპალიტეტის საკრებულოს თავმჯდომარის პირველმა მოადგილემ სხდომაზე ასეთი წინადადება წამოაყენა:
_ ჩვენ შეგვიძლია, კომპანია “პარვუს ჯგუფის” ხელმძღვანელები საკრებულოს სხდომაზე ან შესაბამის დარგობრივი კომისიის სხდომაზე მოვიწვიოთ, კითხვები დაუსვან და მათ დეპუტატებს უნდა გასცენ პასუხი, _ თქვა ლავრენტი ბიგვავამ, რაც დეპუტატებმა დაპირებად აღიქვეს.
სხდომაზე მუნიციპალიტეტში 2023 წელში, რეგიონში გასახორციელებელი პროექტების ფონდიდან დასაფინანსებელი ინფრასტრუქტურული პროექტების მოწონების თაობაზე განკარგულება წარმოადგინეს და დაამტკიცეს.
კერძოდ, მოხდება სოფლების _ დვაბზუ-ნასაკირალის დამაკავშირებელი შიდა სასოფლო გზების რეაბილიტაცია; ასევე, სოფელ ბაილეთში შიდა სასოფლო გზის რეაბილიტაცია და ამავე ბაილეთის ცენტრიდან ჭანიეთურის საზღვრამდე, შიდა სასოფლო გზის რეაბილიტაცია.
დღის წესრიგით გათვალისწინებული 15 საკითხიდან, უმეტესი წარმოდგენილი იყო განკარგულების პროექტებით და უკლებლივ ყველა დაამტკიცეს. ესენია:
“მუნიციპალიტეტის საკუთრებაში არსებული ქ. ოზურგეთში წერეთლის ქუჩაზე მდებარე 2503 კვმ. არასასოფლო-სამეურნეო დანიშნულების მიწის ნაკვეთის სარგებლობის უფლებით გადაცემაზე მერისთვის თანხმობის მიცემის შესახებ”;
” მუნიციპალიტეტის საკუთრებაში არსებული ქონების სარგებლობის უფლებით გადაცემაზე მერისთვის თანხმობის მიცემის თაობაზე”;
“მუნიციპალიტეტის საკუთრებაში არსებული დაბა ნასაკირალის ადმინისტრაციულ ერთეულში მდებარე უძრავი ქონების სარგებლობის უფლებით გადაცემაზე მერისთვის თანხმობის მიცემის შესახებ”;
“ქ. ოზურგეთში, ა. ნაკაშიძის ქუჩასა და დაბა ურეკში ე. თაყაიშვილის ქუჩაზე საგზაო ნიშნების განთავსების ორგანიზების თაობაზე”;
“მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხისა და პრივატიზაციის გეგმის დამტკიცების შესახებ”;
ასევე, “საკრებულოს საფინანსო-საბიუჯეტო კომისიის 2023-2025 წლების სტრატეგიისა და 2023-2024 წლების სამოქმედო გეგმის დამტკიცების თაობაზე”;
და ქ. ოზურგეთში სანაპიროს ქუჩისთვის სახელის გადარქმევისა და “ანზორ ერქომაიშვილის სახელობის სანაპიროს ქუჩის” სახელის მისანიჭებლად _ გარდაცვალების ვადის შეზღუდვიდან გამომდინარე გამონაკლისის დაშვების მიზანშეწონილობის თაობაზე;
მხოლოდ ორ განკარგულებაში შევიდა ცვლილება.
ესენია: დაბა ურეკის ადმინისტრაციულ ერთეულში მდებარე ქუჩებისთვის “მეგობრობის” და “გაბრიელ ეპისკოპოსის” სახელების მინიჭების შესახებ.
აგრეთვე, ცვლილება გახორციელდა “საკრებულოს რეგლამენტის დამტკიცების თაობაზე” დადგენილების პროექტში.
საკრებულოს წევრებმა მოისმინეს, დადებითად უყარეს კენჭი და ცნობად მიიღეს ინფორმაცია: “2022 წლის და 2023 წლის 6 თვის მდგომარეობით, კულტურისა და სპორტის განვითარების პროგრამებით გათვალისწინებული ღონისძიებების გახორციელების შედეგების შესახებ” და მუნიციპალიტეტის 2023 წლის ბიუჯეტის II კვარტლის შესრულების ანგარიში.
ავტორი
