ოზურგეთის საკრებულოს სხდომა: კვლავ ხმაური, პროტესტი და დარბაზის დატოვება

3 აგვისტოს, ოზურგეთის მუნიციპალიტეტის საკრებულოს მორიგი სხდომა შედგა.

სხდომის დაწყებამდე საკრებულოს თავმჯდომარემ, დავით დარჩიამ კოლეგებს სთხოვა, წუთიერი დუმილით პატივი მიეგოთ გუდაურში სამაშველო ოპერაციის დროს, ავიაკატასტროფაში დაღუპული გმირების ხსოვნისთვის.

წუთიერი დუმილით პატივის გამოხატვის შემდეგ, დავით დარჩიამ სხდომის დღის წესრიგის წაკითხვა დაიწყო. საკრებულოს “ნაციონალმა” წევრმა რაინდი დუმბაძემ კი სიტყვა ითხოვა.

_ ორწუთიანი განცხადება მაქვს. რეალურ პრობლემებზე მინდა გითხრათ. არ ვაპირებ აჟიოტაჟის ატეხვას, _ მიმართა მან დავით დარჩიას.

_ არავითარი სიტყვა. სხდომის დასრულების ბოლოს თქვით _ მოგისმენთ ყველა, _ უპასუხა მას დავით დარჩიამ.

რაინდი დუმბაძემ კვლავ მიმართა მას და დაჟინებით ითხოვდა, ორიოდე წუთი დაეთმოთ. თან იმეორებდა, რომ არ აპირებდა ხმაურს და სხდომის ჩაშლას. მან, ასევე, შეახსენა დავით დარჩიას, რომ რამდენიმე თვის წინ, მანვე გააჟღერა ინიციატივა, სხდომის დაწყებამდე ესაუბრათ დეპუტატებს, თუ რაიმე პრობლემის გაცნობას სურდათ.

მეორე “ნაციონალმა” დეპუტატმა, დავით მჟავანაძემ საკრებულოს თავმჯდომარეს ასეთი კითხვა დაუსვა:

_ თქვენ ხომ თქვით, წინა საკრებულოს სხდომაზე, რომ აწი, საკრებულოს სხდომის დაწყებამდე, ყველას ექნებოდა უფლება, გაეკეთებინა განცხადება? ახლა გადაიფიქრეთ? მაშინ თქვით, რომ გადაიფიქრეთ, _ თქვა მჟავანაძემ.

ამ კითხვაზე მჟავანაძეს დარჩიამ არაფერი არ უპასუხა.

“ეს არის ქოსატყუილა, _ წამოიძახა უკანა რიგებიდან ნაციონალმა დეპუტატმა შალვა თავდიშვილმა, _ პირველად იტყუება თუ?”

რადგან რაინდი დუმბაძეს სიტყვის თქმის უფლება მაინც არ მისცეს, “ნაციონალმა” დეპუტატებმა პროტესტის ნიშნად სხდომა დატოვეს.

რაინდი დუმბაძემ სხდომის დატოვებისას, “გურია ნიუსთან” განაცხადა, რომ არანაირ პროვოკაციას არ აპირებდა და სურდა, მის სამაჟორიტარო ოლქში, ლაითურში, ინფრასტრუქტურული პრობლემების შესახებ ესაუბრა.

_ გზის პროექტირება, რომელიც წინა მოწვევის საკრებულოზე დაიწყეს, ახლა შეჩერებული აქვთ _ თაროზე შემოდეს. ამ საკითხზე მინდოდა მეთქვა, აჟიოტაჟის გარეშე, მაგრამ არ მომცეს სიტყვის თქმის უფლება და პროტესტის ნიშნად დავტოვეთ სხდომა. თუ ხალხის ყველაზე მნიშვნელოვან პრობლემაზე საუბრის უფლებას არ მომცემენ, რა მინდა აქ? ტყუილად დრო დავკარგო? _ თქვა დუმბაძემ.

მას შემდეგ, რაც “ნაციონალმა” დეპუტატებმა სხდომა დატოვეს, ხმაური შეწყდა და საკითხების განხილვა მონოტონურ რეჟიმში გაგრძელდა.

საკრებულოს წევრებმა განსაკუთრებული ყურადღებით მოისმინეს საკითხი, “ოზურგეთის მუნიციპალიტეტის რეგლამენტის დამტკიცების შესახებ, “2017 წლის 27 ნოემბრის დადგენილებაში ცვლილების შეტანის თაობაზე”.

საკითხის ირგვლივ საკრებულოს თავმჯდომარის მოადგილემ ლავრენტი ბიგვავამ ისაუბრა.

მან თქვა, რომ ცვლილების თანახმად, ამიერიდან, საკრებულოს წევრები ხელფასს მიიღებენ მაშინ, როცა სხვა ყველა თანამდებობის პირი მიიღებს:

_ დღემდე საკრებულოს წევრები თვის დასაწყისში იღებდნენ ხარჯების ანაზღაურების თანხას (ამ თანხას, დიდი ხანია, მაინც ხელფასს უწოდებდნენ. ავტ.). ეს კი ქმნიდა უხერხულობას. მოგეხსენებათ, ეს ითვალისწინებს შესრულებული სამუშაოს შეფასებებს. მიღებული იქნა გადაწყვეტილება, რომ ამიერიდან თანხის ჩარიცხვა მოხდება იმ დროს, როცა ყველა იღებს ხელფასს. რა თქმა უნდა, მთავარ დოკუმენტში დარჩება ჩანაწერი, თუ რისთვის იღებს საკრებულოს წევრი ანაზღაურებას. ეს თქვენ არ გათავისუფლებთ იმ სამუშაოს შესრულებისგან, რასაც სხვადასხვა აქტივობა ითვალისწინებს. მოსახლეობასთან შეხვედრები იქნება ეს თუ სხვა სამუშაოები, _ თქვა ლავრენტი ბიგვავამ.

საკრებულოს წევრმა, ეროდი გორდელაძემ სიტყვა ითხოვა და ნახევრად ხუმრობით განაცხადა, რომ მადლობას უხდიან ლავრენტი ბიგვავას ასეთი ინფორმაციისთვის.

_ მადლობას გიხდიან ის ადამიანები, რომლებსაც არ აქვთ თანამდებობები და ასევე, აქვთ ერთი სათხოვარი _ ბარემ, ცოტა ამ თანხების გაზრდაზეც იფიქრეთ, _ თქვა მან.

საბოლოოდ, დადგენილებას მხარი დაუჭირეს.

საკრებულოს სხდომაზე განაცხადეს, რომ ოზურგეთის მუნიციპალიტეტი სოციალური მიზნის მქონე პროექტების თანადაფინანსების პროგრამის გახორციელებას იწყება. საკითხის ირგვლივ, მერის პირველმა მოადგილემ გიორგი ღურჯუმელიძემ ისაუბრა.

აღსანიშნავია, რომ ამ პროექტში უკვე მესამედ შეიტანეს ცვლილება.

პროექტი მერიის მიერ არის ინიცირებული და საზოგადოებაში საკმაო გამოხმაურება მოიპოვა. ეს არის სოციალური მიზნის მქონე პროექტი და ითვალისწინებს თვითმმართველობის ორგანოებისა და არასამთავრობო სექტორის თანამშრომლობით, მოწყვლადი ჯგუფების მხარდაჭერას.

კერძოდ: სოციალურად დაუცველი ოჯახების და მოწყვლადი ჯგუფების ცხოვრების ხარისხის გაუმჯობესებას, სოციალური მიზნ(ებ)ის მქონე პროექტებში მათი ჩართვის გზით; სოციალურად დაუცველი ოჯახების და მოწყვლადი ჯგუფების მოტივირებას და თვითრეალიზაციის ხელშეწყობას, მათთვის ქმედით მხარდაჭერას, მათ შორის, სოციალური საწარმოების დაფუძნების და განვითარების ხელშეწყობის გზით და დასაქმების ხელშეწყობას.

_ დადგენილების პროექტი ოზურგეთის მუნიციპალიტეტის სოციალური მიზნის მქონე პროექტების თანადაფინანსების პროგრამის გახორციელების წესს მოიცავს, საჯარო ადმინისტრაციული წარმოების ვადად 20 დღე განისაზღვრება, _ თქვა გიორგი ღურჯუმელიძემ, რომელსაც  პარტია “თავისუფლებისთვის” დეპუტატმა სოფო ქარცივაძემ მიმართა.

_ მინდა გითხრათ, რომ ჩვენ ამ საკითხის ინიცირების ინიციატივით სულ გამოვდიოდით და კომისიის ყველა სხდომებზე ვაყენებდით ამ საკითხს. “ოცნებამ” უნდა ისწავლოს კონსტრუქციული თანამშრომლობა. აუცილებელია, მუნიციპალიტეტებიდან დავიწყოთ დეპოლარიზაცია და არა ისეთი “კონცერტი” მოვაწყოთ, “ნაციონალური მოძრაობა” რომ აწყობს ხოლმე. ვიმედოვნებ, მომავალი 3 წლის განმავლობაში ვიმუშავებთ კონსტრუქციულად, _ უთხრა სოფო ქარცივაძეს გიორგი ღურჯუმელიძემ.

აღნიშნული პროექტი გრანტის სახით და ბიუჯეტის მიერ თანადაფინანსების გზით მოხდება.

საკრებულოს სხდომაზე სწრაფი ტემპით განიხილეს და დაამტკიცეს განკარგულება, ოზურგეთის მუნიციპალიტეტის შეზღუდული შესაძლებლობის მქონე პირთა უფლებების დაცვის 2022 წლის სამოქმედო გეგმის შესახებ;

ასევე, მერს თანხმობა მიეცა დაბა ურეკის ადმინისტრაციულ ერთეულში ბულვარის დასრულებული სარეაბილიტაციო სამუშაოების შედეგად შექმნილი ქონების, ასევე, მუნიციპალიტეტის საკუთრებაში არსებული მოძრავი ქონების სარგებლობის უფლებით გადაცემაზე.

საჯარო ადმინისტრაციული წარმოება დაიწყო “მშენებლობის (განსაკუთრებული მნიშვნელობის რადიაციული ან ბირთვული ობიექტების მშენებლობის გარდა) სანებართვო პირობების შესრულების დადასტურების (ექსპლუატაციაში მიღების) თაობაზე, აქტის გამოცემის (მასში ცვლილების შეტანის) დაჩქარებული მომსახურების მოსაკრებლის გადახდის წესისა და ოდენობის განსაზღვრის შესახებ” დადგენილებაში ცვლილების შეტანის მიზნით.

საკრებულომ 2022 წლის ბიუჯეტის II კვარტლის შესრულების ანგარიში მოისმინა, რომელიც საფინანსო განყოფილების გამგემ პავლე ჭყონიამ წარმოადგინა.

ანგარიში ცნობად მიიღეს.

გიორგი ღურჯუმელიძემ, ასევე, ისაუბრა საქართველოს რეგიონებში გასახორციელებელი პროექტების ფონდიდან, ოზურგეთის მუნიციპალიტეტში 2022 წელს გასახორციელებლი შემდეგი ინფრასტრუქტურული პროექტების შესახებ, რომლებშიც ცვლილებები შეიტანეს და ამის შემდეგ მოწონებული იქნა.

ესენია: ოზურგეთში, სოფელ ხრიალეთში სასმელი წყლის მოწყობის სამუშაოები;

ქალაქ ოზურგეთში მალაზონიას ქუჩის დარჩენილი მონაკვეთისა და ბაქრაძის ქუჩების რეაბილიტაცია;

ქალაქ ოზურგეთში ნინოშვილის ქუჩის დარჩენილი მონაკვეთის და მოსკოვის ქუჩის რეაბილიტაცია;

ქალაქ ოზურგეთში, სანაპიროს ქუჩის რეკონსტრუქცია-რეაბილიტაციის და კეთილმოწყობის სამუშაოები;

ნატანების მე-12 ბრიგადაში წყალმომარაგების ქსელის მშენებლობა;

აღნიშნულ საკითხებზე განკარგულებები დაამტკიცეს.

საკრებულოს წევრმა დავით მდინარაძემ სხდომაზე დასვა საკითხი, მოსახლეობიდან შემოსული საკითხების, წერილების განხილვისთვის დროის გამოყოფის თაობაზე:

_ გადაწყვიტონ და ერთი დღე მაინც დაადგინონ, რომ ამ პრობლემებზე სასაუბროდ ხალხს შევხვდეთ.

მე, ხშირ შემთხვევაში, პასუხის გაცემა მიჭირს. ამიტომ, ჯობს ასე შევთანხმდეთ, _ თქვა დავით მდინარაძემ. თუმცა, მას გადაწყვეტილი პასუხი არ მიუღია.