გასულ კვირაში, ოზურგეთის მუნიციპალიტეტის საკრებულოს მორიგი სხდომა შედგა.
საკრებულოს თავმჯდომარემ, დავით დარჩიამ, საკრებულოს წევრებს დღის წესრიგი გააცნო და ითხოვა, ყველა საკითხისთვის გულისყურით მოესმინათ.
ის ის იყო, პირველი საკითხის _ “ოზურგეთის მუნიციპალიტეტის მერის სტიპენდიები წარჩინებულ სტუდენტებს” ფარგლებში გამოყოფილი ასიგნებებიდან წარჩინებული სტუდენტებისთვის სტიპენდიის გაცემის წესის თაობაზე”, ირგვლივ მერიის კულტურის და განათლების სამსახურის უფროსს, ლალი სიჭინავას უნდა ესაუბრა, რომ საკრებულოს ნაციონალმა წევრმა, თათია ნიკოლაშვილმა სიტყვა ითხოვა.
_ სანამ საკითხების მოსმენაზე გადახვალთ, მომისმინეთ. სხვას რომ სჭირდება განცხადების გაკეთება, დროს ხომ უთმობთ?
მიუხედავად იმისა, რომ დავით დარჩიამ შეახსენა, სიტყვა არავისთვის მიმიცია, განცხადების გაკეთება თუ გსურს, სხდომის დასრულების შემდეგ გააკეთეო, ქალბატონმა თათიამ რუსული ჰიმნი ჩართო. ამ დროს, თვითონ ფეხზე იდგა და საკრებულოს დეპუტატებს მიმართა, წამოდექით ფეხზე, თქვენ რუსული მთავრობა ხართ და მოუსმინეთო.
თათია ნიკოლაშვილმა “ნაფტალიან დარბაზში შეკრებილები” უწოდა საკრებულოს წევრებს:
_ თქვენმა მერმა რომ 41 ათასი ფოტო ატვირთა სოციალურ ქსელში, სინამდვილეში ეს ევროკავშირის დახმარებით ხდება. ასეთი სიკეთეები აღარ ეღირსება არც ოზურგეთს და არც საქართველოს, რადგან თქვენმა მთავრობამ რუსული კანონი შემოიტანა. თქვენ ხართ რუსული მთავრობა, _ ყვიროდა ნიკოლაშვილი.
დეპუტატებმა სიცილით და მაგიდაზე ბრახუნით ჩაახშეს მისი ხმა და პასუხად უბრუნებდნენ, ფეხზე შენ დგახარ და შენს ჰიმნს უსმენო.
ნიკოლაშვილმა კვლავ გაიმეორა, თუ როგორ ეხმარება ევროკავშირი ჩვენს ქვეყანას.
საკრებულოს წევრმა “ქართული ოცნებიდან” ქეთი ხომერიკმა ასევე ვიდეომასალა ჩართო ტელეფონის საშუალებით და ნიკოლაშვილს უთხრა: “ნაციონალური მოძრაობა” არის ქვეყნის მტერი. მას სურს ჩვენს ქვეყანაში იყოს მეორე ფრონტი, თუმცა, “ნაციონალების კლოუნი ვერ ეღირსება ომს ჩვენს ქვეყანაში”.
_ თავხედი ხარ! _ მიმართა ნიკოლაშვილს “ფრაქცია “ქართული ოცნების” თავმჯდომარემ, მარი ჩხიკვიშვილმა, _ ტაში დავუკრათ თათიას, გადასარევი პერფორმანსი გამოუვიდა. თვითონ იდგა და უსმენდა რუსულ ჰიმნს. ჩვენი მოსახლეობა კარგად ხედავს ამ მასკარადებს. მათ არ აინტერესებთ არც ერთი მნიშვნელოვანი საკითხი, ოზურგეთის მოსახლეობის შეახებ.
ნიკოლაშვილმა, რომელიც არა ერთხელ გააფრთხილა დავით დარჩიამ, დარბაზს დაგატოვებინებთო, მალე დატოვა სხდომა.
პირველი საკითხის: მუნიციპალიტეტის 2023 წლის ბიუჯეტით გათვალისწინებული ქვეპროგრამის “ოზურგეთის მუნიციპალიტეტის მერის სტიპენდიები წარჩინებულ სტუდენტებს”, ფარგლებში გამოყოფილი ასიგნებებიდან, წარჩინებული სტუდენტებისთვის სტიპენდიის გაცემის წესის თაობაზე”, კულტურის, განათლების და სოციალურ საკითხთა სამსახურის უფროსმა ლალი სიჭინავამ ისაუბრა.
მან წარჩინებული სტუდენტებისთვის ფულადი ჯილდოს თაობაზე ისაუბრა და განაცხადა, რომ წარჩინებულებისთვის სტიპენდიების გადაცემა ოზურგეთის მერის მიერ გადადგმული ნაბიჯია და როგორც კი ოზურგეთის ბიუჯეტი გაიზრდება, შესაბამისად, გაიზრდება სტიპენდიების რაოდენობაც.
წარმოდგენილი პროექტი დაიწუნა საკრებულოს წევრმა, საკრებულოს თავმჯდომარის მოადგილემ ლავრენტი ბიგვავამ:
_ ამ ფორმით არ უნდა წარმოდგენილიყო ეს პროექტი. ის იყო განხილული, მომზადდა რეკომენდაციები ამისთვის. ქალბატონ ლალის უნდა ვუთხრა საყვედური. პირველად ვამბობ ასე! არ შეიძლება ასე! თუ შეიძლება, ჩასწორდეს ეს და შემოიტანოთ ჩასწორებული ვარიანტი.
მიუხედავად იმისა, რომ საკრებულოს წევრებმა ადგილებიდან შესძახეს, შემოსულია ჩასწორებული ვარიანტიო, ლავრენტი ბიგვავამ განმარტა, აქ არ არის ჩაწერილი და ამდენს კი ვხვდებიო. შემდეგ მან, ასევე, მიმართა საკრებულოს, ახლა დავუჭიროთ მხარი, სხდომის დასრულებამდე წარმოადგინეთ ჩასწორებული ვარიანტი და ოქმშიც დაფიქსირდესო.
ლალი სიჭინავამ განმარტა, რომ ტექნიკური ხარვეზი მოხდა, რასაც მალევე გაასწორებდნენ. ასე მიიღეს ეს დადგენილება.
საკრებულოს სხდომაზე ჯანმრთელობის დაცვის და სოციალური სერვისების განყოფილების უფროსმა, მაიზერ ცელაძემ წარმოადგინა ” 2023 წელს სოციალური გაცემის, ჯანმრთელობის დაცვის და სოციალური დახმარების გაცემის და მიღების წესში, ცვლილების შესახებ,” საკითხი.
კონკრეტულად, მან ისაუბრა მეხუთე მუხლში შეტანილი ცვლილების შესახებ _ გადაუდებელი და არაპროგრამული მომსახურების თანადაფინანსება. კერძოდ, დაუყოვნებელი ან დაყოვნებული სასწრაფო დახმარება, თუ რა კატეგორიის ადამიანებს ესაჭიროება ეს.
ადრეული განვითარების პროგრამაში ჩართული ბენეფიციარებისთვის ჩაემატა ტრანსპორტირების ხარჯების სრული ან ნაწილობრივი ანაზღაურება. კერძოდ, თუ ბენეფიციარები სარეაბილიტაციო კურსს გადიან სხვა რეგიონში, თითოეულს ტრანსპორტირებისთვის ასი ლარი დაემატება.
ასევე, ცვლილება შევიდა კიდევ რამდენიმე მუხლში, რაც ბავშვთა თუ შშმ პირ ბენეფიციართა სასარგებლოდ გადაწყდა.
დადგენილება მოიწონეს საკრებულოს წევრებმა და კენჭი ერთხმად უყარეს.
საკრებულოს სხდომაზე ასევე მრავალი ცვლილება შეიტანეს სხვადასხვა დადგენილებებში. კერძოდ:
“მუნიციპალიტეტის საკუთრებაში არსებული ქონების საპრივატიზაციო ობიექტების ნუსხისა და გეგმის დამტკიცების შესახებ”, იურიდიული სამსახურის უფროსმა, ლაშა თავაძემ ისაუბრა და აღნიშნა, რომ კომისიის მიერ განხილულია და თანხმობით მიიღეს.
ოზურგეთის მუნიციპალიტეტის საკუთრებაში არსებული უძრავი ქონებების შპს ოზურგეთის მუნიციპალიტეტის საფეხბურთო კლუბი “მერცხალისთვის” სარგებლობის უფლებით გადაცემაზე მერისთვის თანხმობის მიცემის თაობაზე; სოფელ კონჭკათის ადმინისტრაციულ ერთეულში მდებარე ქუჩისთვის “ზაურ ჩანჩიბაძის” სახელის მინიჭების შესახებ და მუნიციპალიტეტის შეზღუდული შესაძლებლობის მქონე პირთა უფლებების დაცვის 2023 წლის სამოქმედო გეგმის დამტკიცების თაობაზე, _ დადგენილებებსაც მხარი დაუჭირეს.
საკრებულომ მოისმინა, დადებითად შეაფასა და ცნობად მიიღო 2022 წლის ბიუჯეტის IV კვარტლის, მერიის სტრუქტურული ერთეულების შიდა აუდიტისა და განათლების სამსახურების ანგარიშები, ასევე, მუნიციპალიტეტში 2022 წელს გახორციელებული ინფრასტრუქტურული პროექტების თაობაზე ინფორმაციები.
ავტორი
