ოზურგეთის საკრებულოს სხდომაზე უმეტესი დრო კვლავ ჩხუბს და დაპირისპირებას შეეწირა

19 აპრილს ოზურგეთის მუნიციპალიტეტის საკრებულოს მორიგი სხდომა გაიმართა.

სხდომას საკრებულოს თავმჯდომარე დავით დარჩია უძღვებოდა.

მან აღდგომის ბრწყინვალე დღესასწაული მიულოცა საკრებულოს წევრებს და დღის წესრიგით გათვალისწინებული თერთმეტი საკითხი გააცნო.

პირველი საკითხის ირგვლივ, რომელიც სოფლის მხარდაჭერის პროგრამის ფარგლებში ოზურგეთის მუნიციპალიტეტში დასაფინანსებელი პროექტების დამტკიცებას ეხებოდა, ოზურგეთის მერის პირველმა მოადგილემ, გიორგი ღურჯუმელიძემ ისაუბრა. მან თქვა, რომ გასახორციელებელი პროექტების მთავარი მიმართულებაა სოფლების შიდა გზების კრიტიკულ მონაკვეთებში ბეტონის საფარის მოწყობა და რომ ყველა სოფელში, ძირითადად, ასეთ მონაკვეთებზე დაიგება აღნიშნული საფარი.

აღსანიშნავია, რომ ამ მიმართულებით მუშაობა, სოფლების მოსახლეობას, მიუხედავად მრავალი პრობლემისა, უპირველეს საქმედ, პრიორიტეტად მიაჩნია და გამოთქვამენ კიდეც კმაყოფილებას, რომ ბეტონის საფარი ყველა სოფლის კრიტიკულ მონაკვეთზე იგება. განსაკუთრებით იქ, სადაც გადაადგილება, თითქმის, შეუძლებელი იყო:

_ ჩვენ გვქონდა არაერთი შეხვედრა მოსახლეობასთან და ყველგან მხარი დაუჭირეს ამ მიმართულებით პროექტების გახორციელებას, _ განმარტა გიორგი ღურჯუმელიძემ.

მეორე საკითხის ირგვლივ, რომელიც ოზურგეთის მუნიციპალიტეტის 2022 წლის ბიუჯეტის შესრულების წლიური ანგარიშის დამტკიცებას შეეხებოდა, საფინანსო სამსახურის უფროსმა, პავლე ჭყონიამ ისაუბრა.

მან თქვა, რომ 2022 წლის განმავლობაში გახორციელდა სამი ცვლილება.

ბიუჯეტში გახორციელებული ცვლილებებისა და დამატებების შედეგად, 2022 წლის ბიუჯეტი, 31 დეკემბრის მდგომარეობით, განისაზღვრა 66 მილიონ 706,9 ათასი ლარით.

_ ბიუჯეტი შედგენილია პროგრამული ბიუჯეტის ფორმატით, რაც იმას გულისხმობს, რომ მუნიციპალიტეტის პრიორიტეტების ყველა მიზნის მისაღწევად, გასახორციელებელი პროგრამებისა და თუ ქვეპროგრამების ერთობლიობას წარმოადგენს. მასში ასახულია როგორც გეგმიური, ისე ფაქტიური მაჩვენებლები. ასევე, მოიცავს ოზურგეთის მუნიციპალიტეტის ბიუჯეტის შემოსულობების, გადასახდელების, ნაშთის ცვლილებების, ქვეპროგრამებისთვის გამოყოფილი ასიგნებების, საკასო შესრულების შესახებ ინფორმაციაც, _ თქვა პავლე ჭყონიამ და მოიშველია დაზუსტებული რიცხვები.

კერძოდ: 2022 წლის ფაქტიურმა შემოსულობებმა შეადგინა 62 593,2 ათასი ლარი, რაც გეგმიური მაჩვენებლის 101,5 პროცენტია. შემოსულობებიდან გადასახადების სახით მიღებულ შემოსავლებზე მოდის 28 703, 3 ათასი ლარი. გრანტების სახით მიღებულ შემოსავლებზე 28 401,1 ათასი ლარი. პავლე ჭყონიამ, ასევე, ისაუბრა საგადასახადო შემოსავლების ცალკეულ მიმართულებების მიხედვით შესრულების მდგომარეობაზე.

წარმოდგენილი მოხსენების შემდეგ, რაც 2022 წლის ბიუჯეტის შესრულების ანგარიშს ეხებოდა, საკრებულოს “ნაციონალმა” წევრმა, თათია ნიკოლაშვილმა სიტყვა ითხოვა და თქვა, რომ კითხვები აქვს და აუცილებლად უნდა მოუსმინონ, თან წარმოდგენილ დოკუმენტს “ნაჯღაბნი” უწოდა:

_ გამეცით პასუხი! თქვენს წარმოდგენილ დოკუმენტში, რაც აქ დაჯღაბნეთ, ირკვევა, რომ ბიუჯეტის საერთო შესრულება გაქვთ 72%, ანუ, ფაქტობრივად, 2/3 ბიუჯეტის ვერ აითვისეთ. ინფრასტრუქტურის მიმართულებით შესრულება 60%-ია, ანუ ყოველი მეორე სამუშაო ვერ შეასრულეთ. კორუფცია გაქვთ გაჩაღებული. სამაგიეროდ, ხელფასების მხრივ, წარმომადგენლობითი ხარჯი შეასრულეთ 92%-ით. ანუ, სამუშაოს ვერ ასრულებთ, მაგრამ ხელფასებს კი იღებთ. ვერც ჯანდაცვის მიმართულებით ვერ შეასრულეთ ვერაფერი… ეს ხდება იმ მუნიციპალიტეტში, სადაც 62 863 ადამიანი ცხოვრობს და ყოველი მეორე, 30810 ადამიანი ოფიციალურად, სოციალურად დაუცველთა ბაზაში არის რეგისტრირებული, _ გაცხარებით საუბრობდა თათია ნიკოლაშვილი.

მას სიტყვა შეაწყვეტინეს “ქართული ოცნების” წარმომადგენლებმა. საკრებულოს თავმჯდომარე დავით დარჩია მოითხოვდა მისგან, დაესვა კითხვები, რაზეც პასუხს გასცემდნენ. ამასობაში ვითარება, ტრადიციულად, კვლავ დაიძაბა. “ქართული ოცნების” წევრებმა კატეგორიულად უარყვეს ნიკოლაშვილის დასმული კითხვები, იქით უწოდეს კორუმპირებული პარტია და შეახსენეს, რომ ხმაც კი არ აქვთ ამოსაღები.

 საკრებულოს წევრმა, ქეთი ხომერიკმა თათია ნიკოლაშვილს დავით კეზერაშვილი გაახსენა:

_ როგორ არ გრცხვენია, თათია, ხმას როგორ იღებთ? კორუფციით ნაშოვნი ფულით ფინანსდებით! თქვენმა კეზერაშვილმა ევროპელ პენსიონერებს მოპარა ფული, გაძარცვა და ახლა თქვენ გაფინანსებთ, რომ აქ იკივლოთ და იწივლოთ. არ გრცხვენია? ხაბეიშვილს მიხედეთ კიდევ, მუხა ვარო, რომ იძახის, რკო არ დაისხას და ღორმა არ შეჭამოს, _ ურჩია ქეთი ხომერიკმა ნიკოლაშვილს.

დავა და დაპირისპირება ჩხუბში გადაიზარდა. დარბაზში დაცვის პოლიციაც გამოჩნდა, რაც ჩვეულებრივი ამბავია ოზურგეთის საკრებულოს სხდომების ჩატარებისას.

_ ჩემო დათო, გამოიხედე, მსგეფსის კვირაა, არ გვინდა ჩხუბი. გეკითხები, უბრალოდ, რას ამბობს თათია არასწორს? კითხვებს სვამს. ახლა მინდა გკითხოთ, რატომ ვერ მოხერხდა სამი წლის განმავლობაში ნასაკირალის სამკილომეტრიანი საავტომობილო გზის დასრულება? როცა ამის გამო საპროტესტო აქცია ჩაატარა მოსახლეობამ, ჩვენი ორი წევრი, საკრებულოს დეპუტატები დააკავა პოლიციამ. ასევე, წამოდით და ნახეთ, როგორ იშლება სოფელ მშვიდობაურში ერთი კვირის წინ გაკეთებული სკოლა. რომ მოიტანეთ და ქალაქის ცენტრში რკინის კუბოები დადგით, აიღეთ ეს კუბოები, მოაშორეთ აქედან! საქმე გააკეთეთ! მთელი საქართველო დაგვცინის. ახალგაზრდობა ან ნარკოტიკულ საშუალებებს ეტანება ან უცხოეთში გარბის, დაფიქრდით ამაზე! მე ასე ვფიქრობ, მაქვს ეჭვი, რომ კორუფციაშია ჩაფლული მთელი ოზურგეთის მთავრობა, _ მიმართა “ერთიანი ნაციონალური მოძრაობის” დეპუტატმა გოჩა შარაშენიძემ დავით დარჩიას და საკრებულოს სხვა წევრებს.

_ არასწორად საუბრობ, გოჩა! აბა, რას ამბობ? ნახე, რამდენი სკოლა და საბავშვო ბაღი აშენდა ოზურგეთში. თქვენს დროს რა გაკეთდა? როგორც ჩანს, მშვიდობაურის შემთხვევაში არაკეთილსინდისიერ მეწარმესთან გვაქვს საქმე. ასეთი რაღაცეებიც ხდება. თუმცა, ესეც გამოსწორდება, _ ასე უპასუხა შარაშენიძის ბრალდებებს საკრებულოს თავმჯდომარის მოადგილემ, გელა აროშიძემ.

_ თქვენ სულ ცრუობთ. რა გაქვთ სათქმელი? მხოლოდ კამერებთან პოზიორობაა თქვენი საქმე. მარტო ის თქვით, საბავშვო ბაღებში უფასო კვება თუ იყო თქვენს დროს? რამდენი რამ გაკეთდა. თქვენი კეზერაშვილი არის დადასტურებული დამნაშავე და ევროპელი პენსიონერები რომ გაძარცვა, იმ ფულით გაფინანსებთ, _ შეახსენა “ნაციონალებს” გიორგი ღურჯუმელიძემ.

ჩხუბისა და ყვირილის შემდეგ “ნაციონალური მოძრაობის” წევრებმა და ტელევიზიების წარმომადგენლებმა სხდომა დატოვეს.

_ კი, მაგრამ, სანამ უნდა იჩხუბოთ? სულ კინკლაობა და ჩხუბი შეიძლება? სულ დაპირისპირებაში ხართ ჩართული, სულ წარსულს იხსენებთ. წელიწადნახევარია სულ ეს მესმის, მეტი არაფერი! არ მომწონს მე დეპუტატების ერთმანეთთან ასეთი დამოკიდებულება, ხალხი იცინის. რაღაც ხომ უნდა შეცვალოთ? _ მიმართა საკრებულოს წევრებს პარტია “საქართველოსათვის” დეპუტატმა სოფო ქარცივაძემ და მანაც დატოვა დარბაზი.

_ მკვდარი მკვდარს აეკიდა. ესეც ასეა! რაღაც თქვა, ვითომ… _ ჩაიქირქილეს “ოცნების” დეპუტატებმა, ქარცივაძის დარბაზიდან გასვლის შემდეგ.

ამავე სხდომაზე, ოზურგეთის მუნიციპალიტეტის საკრებულომ მიიღო გადაწყვეტილება, უახლოეს მომავალში, ქალაქში, შსს საპატრულო სამსახურისთვის ახალი ოფისის აშენების თაობაზე. ამავე შენობაში გურიის გარემოს დაცვის დეპარტამენტი და მანდატურის სამსახურიც განთავსდება. ამისთვის ოზურგეთის მუნიციპალიტეტის საკრებულომ მიწის ნაკვეთი ქალაქ ოზურგეთში, წერეთლის ქუჩაზე უკვე გამოყო _ ეს არის ნახევარი ჰექტარი, არასასოფლო-სამეურნეო დანიშნულების მიწა, რომელიც მუნიციპალური საკუთრებიდან სახელმწიფო საკუთრებაში გადასცეს.

ოზურგეთის საკრებულოს მიერ მიღებულ დადგენილებაში, რომელსაც დეპუტატებმა ერთხმად უყარეს კენჭი, ნათქვამია, რომ “ოზურგეთის მუნიციპალურ საკუთრებაში არსებული, ქალაქ ოზურგეთში, წერეთლის ქუჩაზე მდებარე უძრავი ქონება, 5,500 კვ.მ. დანიშნულება არასასოფლო-სამეურნეო მიწის ნაკვეთი, გადაეცეს უსასყიდლოდ, საკუთრებაში, სახელმწიფოს შემდგომში შინაგან საქმეთა სამინისტროსთვის გადასაცემად”.

როგორც ვთქვით, ოზურგეთის მუნიციპალიტეტის საკრებულოს ამ მორიგ სხდომაზე, დღის წესრიგით გათვალისწინებულ 11 საკითხზე იმსჯელეს. თუმცა, ხმაური, დაპირისპირება და ჩხუბი, ძირითადად, “ბიუჯეტის 2022 წლის შესრულების ანგარიშის დამტკიცების შესახებ”, განკარგულებას მოჰყვა და ძირითადი დროც სწორედ ამ დავამ და ჩხუბმა “აითვისა”.

საკრებულოს გადაწყვეტილებით დამტკიცდა შემდეგი განკარგულების პროექტები:

“მუნიციპალიტეტის 2022 წლის ბიუჯეტის შესრულების წლიური ანგარიში”;

“საქართველოს სახელმწიფო ბიუჯეტით გათვალისწინებული საქართველოს რეგიონებში გასახორციელებელი პროექტების ფონდიდან სოფლის მხარდაჭერის პროგრამის ფარგლებში ოზურგეთის მუნიციპალიტეტში დასაფინანსებელი პროექტები”;

“მუნიციპალიტეტის საკუთრებაში არსებული ქონების სარგებლობის უფლებით გადაცემაზე ოზურგეთის მუნიციპალიტეტის მერისთვის თანხმობის მიცემის შესახებ”;

“ოზურგეთის მუნიციპალიტეტის საკუთრებაში არსებული, ქ. ოზურგეთში წერეთლის ქუჩაზე მდებარე უძრავი ქონების სახელმწიფოსთვის საკუთრებაში გადაცემის თაობაზე’’;

“მუნიციპალიტეტის საკუთრებაში არსებული მოძრავი ქონების სარგებლობის უფლებით გადაცემაზე ოზურგეთის მუნიციპალიტეტის მერისთვის თანხმობის მიცემის შესახებ”;

“ევროპის საბჭოსა და ოზურგეთის მუნიციპალიტეტს შორის გასაფორმებელი საგრანტო ხელშეკრულების შეთანხმების თაობაზე’’;

“მუნიციპალიტეტის დასახლებებში სახელწოდების არმქონე გეოგრაფიული ობიექტების (ქუჩა, ჩიხი, შესახვევი) არაბული ციფრების გამოყენებით სახელდების შესახებ.”

აგრეთვე, დამტკიცდა შემდეგი დადგენილების პროექტი: მუნიციპალიტეტის მერიის მიერ მშენებლობის შეჩერების შესახებ მიღებული ადმინისტრაციულ სამართლებრივი აქტის შესრულების კონტროლის გახორციელების წესის შესახებ.

საკრებულომ, მოისმინა, დადებითად შეაფასა და ცნობად მიიღო შემაჯამებელი ინფორმაცია 2022 წელს საზოგადოებრივი ჯანდაცვის ცენტრის, სკოლამდელი აღზრდის ცენტრის, ცენტრალური ბიბლიოთეკისა და სამუზეუმო გაერთიანების გაწეული საქმიანობის შესახებ და აგრარულ საკითხთა კომისიის თავმჯდომარის მოხსენება, ოზურგეთის მუნიციპალიტეტის მიერ იჯარით გაცემული მიწის ნაკვეთების მიზნობრივად გამოყენების, საიჯარო ქირის ამოღებისა და ადგილობრივი მნიშვნელობის ტყის გამოყენების ეფექტურობის თაობაზე.