ოზურგეთში, დიდი ალბათობით,  „კუბოქოთნების“ აღება იწყება

ოზურგეთში, ქალაქის ცენტრალურ მოედანზე განლაგებული საყვავილებიის, ე.წ. „კუბოქოთნების“ აღებას, დიდი ალობათობით, მალე დაიწყებენ.

დღეს, აქ, უფრო მცირე და დაბალი ზომის ქოთნებში ყვავილების განსათავსებლად, სერვისცენტრის თანამშრომლებმა აქტიური მუშაობა დაიწყეს. ისინი დილიდან აფხვიერებდნენ და ანოყიერებდნენ საყვავილეებში არსებულ მიწას.

_ ხვალიდან დავრგავთ  არა ჰიბრიდულ, არამედ ისეთ ყვავილებს, რომლებიც წლობით იქნება ამ ქოთნებში, ნაკლებ შრომას  და ხარჯს მოითხოვს და მეტი სილამაზე და ეფექტი გვექნება, _ გვითხრა სერვისცენტრის თანამშრომელმა, ერთ-ერთმა პასუხისმგებელმა პირმა ირაკლი გაბედავამ.

კითხვაზე, როგორ იქნება ყბადაღებული „კუბოქოთნების“ საქმე, მან სასიხარულო ინფორმაცია მოგვაწოდა:

_ მალე ავიღებთ, მცენარეებს გადავიტანთ, ეს ქოთნები დადაბლდება, ცოტა მდებარეობას შეიცვლის, კორექტირდება. მოკლედ, როგორც ხალხი გამოთქვამდა აზრს, – გვითხრა მან.

ჩვენს მკითხველებს შევახსენებთ, რომ ამ თემას „გურია ნიუსმა“  (ასევე სხვა მედიასაშუალებებმაც) მრავალი პუბლიკაცია მიუძღვნა. 

სასიხარულოა, რომ ხელისუფლება, ბოლოს და ბოლოს, თავისი ამომრჩევლის, ასევე სრულიად ოზურგეთის მცხოვრებთა აზრს გაითვალისწინებს…