დღეს,დილიდან, ყბადაღებული ოზურგეთის „ბაზრისწყალის“ კალაპოტის გაწმენდა დაიწყეს.
ოზურგეთის მუნიციპალიტეტის მომსახურების ცენტრის თანამშრომლები კალაპოტს თავქვე დაუყვნენ და სხვადასხვა სახის ნაგავისგან გაათავისუფლეს.
„რა აზრი აქვს გაწმენდას. ამფერ ბინძურს მეორეს ვერ ნახავ საქართველოში, ტუალეტზე უარესია და ეს თავმომწონე ოზურგეთელების ნახელავია. უცხოპლანლეტელები კი არ ყრიან ციდან“,_ ამბობდნენ ბაზრის ტერიტორიაზე მოსიარულე მოქალაქეები.
_დღეს მარტო ვწმენდთ? უბრალოდ, ახლა ეჩვენებათ ასე, რადგან ბაზარი დახურული იყო და სისუფთავეზე საუბარი უფრო აქტუალური გახდა. ხან კვირაში სამჯერ მოუყვებიან კალაპოტს. დღეს ნაგავისგან კალაპოტის ამოწმენდის გარდა, გაიკაფა ეკალ-ბარდიანი სანაპიროები. მდინარე ბჟუჟის კალაპოტამდე, რომელსაც უერთდება ეს პატარა ნაბჟუარა, ყოველთვის ვწმენდთ, თუმცა ხალხმა ვერა და ვერ გაიგო, რომ წყალში ამდენი ნაგავი არ ჩაყარონ. ყველა ქუჩაზე დგას ნაგვის ურნა, ასევეა სოფლებშიც.. _ გვითხრა მუნიციპალიტეტის მომსახურების ცენტრის დირექტორმა თენგიზ ქუტიძემ.
შპს „სოფლის ნობათის“ დირექტორმა სოსო სიხარულიძემ კი თქვა, რომ ამ მდინარეში მარტო ბაზრის ტერიტორიაზე მომუშავე პერსონალი არ ყრის.
_ ეს პატარა მდინარე მელექედურიდან მოდის და ქალაქს გამოივლის. ყველა ყრის ნაგავს, დიდი თუ პატარა. მე თვითონაც ვწმენდ. იქნებ, ცოტათი გამოფხიზლდნენ და ნაგავი ნაგვის ურნებში ჩაყარონ ადამიანებმა, სხვა დრო დაგვიდგა, – გვითხრა სიხარულიძემ.
