ოზურგეთის მუნიციპალიტეტის გამგებლის, მერაბ ჭანუყვაძის ოჯახის საკუთრებაში ოთხი მიწის ნაკვეთი და საცხოვრებელი სახლია. ამის შესახებ ჭანუყვაძის ქონებრივ დეკლარაციაშია აღნიშნული. ყველა უძრავი ქონება მერაბ ჭანუყვაძის დედის, ეთერ ჭანუყვაძის საკუთრებაშია.
კერძოდ, ეთერ ჭანუყვაძე ფლობს, 2016 წელს ნაჩუქარ ორ მიწის ნაკვეთს ლანჩხუთის მუნიციპალიტეტის სოფელ სუფსაში, რომელთა ფართობიც 84568,00 კვ.მ. და 28106,00 კვ.მ-ია.
ასევე, მის საკუთრებაშია 2004 წელს, მემკვიდრეობით მიღებული 350,00 კვ.მ.-ის ფართობის საცხოვრებელი სახლი ოზურგეთის მუნიციპალიტეტის სოფელ შემოქმედში და ამავე მისამართზე არსებული 3500,00 კვ.მ-ის მიწის ნაკვეთი, რომელიც ასევე მემკვიდრეობით მიუღია.
რაც შეეხება მეორე, 2100,00 კვ.მ-ის ფართობის მიწის ნაკვეთს ამავე სოფელში, ეთერ ჭანუყვაძეს ის 2012 წელს შეუძენია, თუმცა რა თანხა აქვს მის შესაძენად გადახდილი, დეკლარაციაში აღნიშნული არ არის.
რაც შეეხება ოჯახის ფინანსურ მდგომარეობას, როგორც დეკლარაციაშია აღნიშნული, მათი შემოსავალი, მხოლოდ მერაბ ჭანუყვაძის გამგებლის თანამდებობისთვის აღებული 31800,00 ლარია, რომელიც მან 2016 წლის 22 იანვრიდან, ამავე წლის 21 დეკემბრამდე აიღო.
დეკლარაციის შევსების მომენტში, მერაბ ჭანუყვაძეს „ვი–თი–ბი ბანკის“ სახელფასო ანგარიშზე 983,12 ლარი ჰქონდა.
დეკლარაციაში ასევე აღნიშნულია, რომ მერაბ ჭანუყვაძე შპს „ვი აი პი ბროკერთა კლუბის“ პარტნიორია (50% წილის მფლობელი. თანაპარტნიორი – დავით ფირცხალაიშვილი) 2008 წლიდან, თუმცა მას გასულ წელს ამ შპს-დან შემოსავალი მიღებული არ აქვს.
რაც შეეხება წინა წლების შემოსავლებს, როგორც საჯარო სამსახურის ბიუროს ვებ-გვერდზე განთავსებული დეკლარაციებიდან ირკვევა, 2015 წელს, მერაბ ჭანუყვაძის შემოსავალი საქართველოს ადმინისტრაციულ–ტერიტორიულ ერთეულებში (ლანჩხუთის, ოზურგეთის, ჩოხატაურის მუნიციპალიტეტები) სახელმწიფო რწმუნებულის–გუბერნატორის ადმინისტრაციიდან, სადაც მას რწმუნებულის-გუბერნატორის პირველი მოადგილის მოვალეობის შემსრულებლის პოსტი ეკავა – 10930.52 ლარი, ხოლო ოზურგეთის მუნიციპალიტეტის გამგებლის თანამდებობიდან 14042.00 ლარის შემოსავალი ჰქონდა მიღებული. გარდა ამისა, ჭანუყვაძის დეკლარაციაში აღნიშნული იყო, რომ მან შპს „ჯი თი მოტორსის“ მენეჯერის თანამდებობიდან 24668.00 ლარის შემოსავალი მიიღო, თუმცა, როგორც მოგვიანებით მერაბ ჭანუყვაძემ „გურია ნიუსთან“ საუბრისას განმარტა, დეკლარაციის შევსებისას შეცდომა დაუშვა და „ეს არის ძველი ჩანაწერი, რომელიც უნდა წაიშალოს“.
რაც შეეხება 2013- 2014 წლის შემოსავლებს, მერაბ ჭანუყვაძეს შპს „ევროთრეიდიდან“, სადაც მას დირექტორის პოსტი ეკავა – 44135.00 – 44135.00 ლარი ჰქონდა მიღებული.
