ახლახან ოზურგეთის თეატრმა, ბულგარეთში, სატირით და იუმორით განთქმულ ქალაქ გაბროვოს საერთაშორისო თეატრალურ ფესტივალში მიიღო მონაწილეობა.
ჩვენებურებმა მსახიობ ბელა კიკვაძის მონოსპექტაკლი _ „ნეტაი, დამბადებელო“ წარადგინეს, რომლის სცენარიც ვაჟა-ფშაველას ნაწარმოებების მიხედვით არის აგებული.
_ გაბროვო არის იუმორისა და სატირის საოცარი სამყარო. კლასიკურ სიმაღლეზეა აყვანილი სატირისა და იუმორის ხელოვნება. კიდევ იმითაა ნიშანდობლივი, რომ ფესტივალის მონაწილეები ასევე სატირულ -იუმორისტული თვალით უყურებენ საკუთარ თავს. კარნავალი იწყება შავი კატისთვის კუდის მოკვეთის ერთგვარი ცერემონიალით, რაც გაბროვოში ისედაც მიღებული წესია. საოცარი მასპინძლობით ხომ აღფრთოვანებული ვართ და წარმატებული გამოსვლა რომ გვქონდა, ამითაც, _ აღნიშნა ჩვენთან საუბრისას სპექტაკლის დამდგმელმა რეჟისორმა ვასილ ჩიგოგიძემ, რომელიც ოზურგეთში ჯილდოებით დაბრუნდა.
ფესტივალზე შესრულებული საუკეთესო აქტიორული როლისთვის, მსახიობ ბელა კიკვაძეს ჟიურიმ სპეციალური საპატიო დიპლომი გადასცა. ასევე ,დიპლომი გადაეცა ოზურგეთის სახელმწიფო თეატრს.
ვასილ ჩიგოგიძის თქმით, გარდა ამისა, ფესტივალის ორგანიზატორ თეატრ „ტეატრრანჩოს“ და ოზურგეთის სახელმწიფო თეატრს შორის მალე ურთიერთთანამშრომლობის ხელშეკრულება გაფორმდება.
_ ეს მოხდება 5-14 ივლისის შუალედში, როცა აქ, გურიაში, ოზურგეთში, ნოდარ დუმბაძის საერთაშორისო ფესტივალი გაიმართება. სწორედ იმ დროისთვის არის დაგეგმილი ბულგარეთის თეატრალური დელეგაციის ვიზიტი საქართველოში, _ გვითხრა ჩიგოგიძემ.
მისივე თქმით, მემორანდუმის თანახმად, შემდგომ პერიოდში, საქართველოში მათ ფესტივალს ოზურგეთის თეატრი წარადგენს, ხოლო გაბროვოს ფესტივალი, პირიქით, ოზურგეთის ფესტივალის წარმდგენი იქნება მთელ აღმოსავლეთ ევროპაში.
