წელს გურიაში უთოვლო ზამთარი იყო, თუმცა, გაზაფხულის წვიმიანმა ამინდებმა ხვნა-თესვის სეზონი შეაფერხა. წინასააღდგომო დღეებში კი, გამოდარებისთანავე, საყანე ფართობებში ტრაქტორები დასახნავად შევიდნენ.
„გურია ნიუსი“ დაინტერესდა, რა მდგომარეობაა ამ მხრივ ოზურგეთის მუნიციპალიტეტში და დაწყებულია თუ არა ყველა სოფელში შესაბამისი სამუშაოები.
ოზურგეთის მუნიციპალიტეტში სულ 4 272 ჰა სახნავ-სათესი ფართობია. თუმცა, ყოველ სეზონზე, ჩვენი ინფორმაციით, მიწების, სულ ცოტა, 40% დაუხნავი რჩება. მიზეზი ამისა, ძირითადად, მდინარისპირა ფართობებია, რომელთა უმეტესობა იმიტომ არ ითესება, რომ ბოლო წლების განმავლობაში, მდინარეების ადიდების გამო, წყალი თანდათან სიღრმეში იკეთებს კალაპოტს და ხდება სათესი ზოლების მიტაცება. როგორც მოსახლეობის უმრავლესობა ამბობს, მდინარეების ასეთი უარყოფითი გააქტიურება, კარიერებმა გამოიწვია.
მიწის დამუშავების მასშტაბმა განსაკუთრებით იკლო ხვნა-თესვის სახელმწიფო პროგრამის დასრულების შემდეგ. გარდა ამისა, მიწის მფლობელთა საერთო თვალსაზრისით, მოსავალი იმდენად მცირეა საჭირო ხარჯთან შედარებით, ამას დაემატა ფაროსანას საწინააღმდეგო შეწამვლითი სამუშაოები სიმინდის სავეგეტაციო პერიოდში, რომ გარჯად არ ღირს ყანის დამუშავება.
შპს „მექანიზატორის“ დირექტორი ბესო გოგიტიძე „გურია ნიუსთან“ ამბობს, რომ დახვნის პროცესი უკვე დაწყებულია, თუმცა, წელს უფრო ნაკლები ფართობი დამუშავდება.
_ ფაქტია, წელს ნაკლები ფართობი დაითესება. ამის მიზეზი მავნებელ ფაროსანას გამოჩენაცაა. ხალხი ამბობს, რომ ისედაც უჭირდათ საყანე ფართობების დათესვა და მოყვანა. განსაკუთრებით მათ, ვისაც შორ მანძილზე უწევთ წასვლა. ახლა კი ყველა ამბობს, რომ ფაროსანას წინააღმდეგ შეწამვლითი სამუშაოები ცალკე ჯაფას და ხარჯებს ითხოვს. გურიაში, ძირითადად, დახვნა აპრილის შუა რიცხვებიდან იწყება, თუ ამინდმა ხელი არ შეგვიშალა. ახლა წვიმების გამო შევჩერდით და 29 აპრილიდან უკვე მუშაობას შევუდექით. დღეისთვის ჩვენგან 35 ჰექტარია დახნული. ეს არის ჭახვათასთან, ორმეთსა და ნატანებში. მთავარია, მოგვმართოს მცხოვრებმა. ამასთანავე, ჩვენ 2500 კვმ. ფართობზე ნაკლებ ნაკვეთში ვერ შევდივართ, რადგან ტრაქტორს უჭირს მობრუნება. არის შემთხვევა, როცა 1000 კვმ. ფართობზე შესვლასაც გვთხოვენ, რაც შეუძლებელია. საერთოდ , ბოლო ბენეფიციარიც კი სანამ იქნება, ჩვენ მოვემსახურებით. ჯერჯერობით, დახვნის პროცესში ვართ, შემდეგ კი, დავიწყებთ დათესვას, _ გვითხრა გოგიტიძემ.
ოზურგეთის მუნიციპალიტეტის სოფლის მეურნეობის განყოფილების გამგე ამირან გირკელიძე დაკონკრეტებულ ინფორმაციას გვაწვდის, სოფლების მიხედვით, სად რამდენი ჰა ფართობი დაიხნა: ასკანაში _ 15 ჰა, ლიხაურში _ 4 ჰა, ნაგომარში _ 8 ჰა, ნატანებში _ 100 ჰა, სოფელ ოზურგეთში _ 15 ჰა. სულ დღეისთვის 142 ჰექტარია დახნული. ეს არის მხოლოდ დახნული ფართობი. ჯერჯერობით, ხვნა გრძელდება. დათესვას კი, სავარაუდოდ, ათ დღეში დაიწყებენ, _ გვითხრა გირკელიძემ.
ცალკეული ადამიანები, რომლებიც საყანე ფართობებს წლების მანძილზე ამუშავებდნენ, დღეისთვის იმედგაცრუებას გამოთქვამენ და ამბობენ, რომ სხვა გზა არაა, თორემ ყანა დათესვად არ ღირს:
_ ახალგაზრდობას, ძირითადად, ეზარება მიწასთან მუშაობა, რადგან, ჯერ ერთი, სამუშაო ტექნიკა უმეტესობას არ აქვს. თოხის ქნევის დრო წავიდა. მოსავალი ბევრი არაფერია. ზამთრისთვის რომ სიმინდი გქონდეს, მარტო ამისთვის ყანაში ჩასვლა უმეტესობას არ უღირს. ამიტომ ხალხს მეტად უნდა მიაქციოს მთავრობამ ყურადღება, სოფელში განსაკუთრებით, _ გვითხრა სოფელ ლიხაურის მკვიდრმა რევაზ გობრონიძემ.
სოფელ ჭანიეთის მცხოვრები, ელდარ თავაძე, რომელიც დიდხანს მუშაობდა აგრონომად და კვალიფიციურ სპეციალისტად იყო რაიონში ცნობილი, თავისი ხედვა აქვს:
_ ჩვენს სოფელში 130 ჰა ფართობი ითესებოდა. პრივატიზაციის შემდეგ 92 ჰა გადავიდა კერძო საკუთრებაში. გავიდა დრო და საერთო ფართობად შემოღობილ მრავალი კაცის საკუთრებაში, ღობის გასამაგრებლად, ყოველ სეზონზე 30 კაცი თუ ჩადიოდა. შემდეგ ამ ოცდაათმა კაცმა იყოჩაღა და თავისი ფართობი შემოიღობა. დანარჩენმა სულ აიღო ხელი მიწის დამუშავებაზე და მივიღეთ უკვე ბალახად ქცეული გარემო. ზოგმა კი გააშენა თხილი, მაგრამ დღეს ამაზეც ბევრმა აიყარა გული. შედეგი მძიმეა. სოფელი თანდათან იცლება. კომუნისტებს დავცინეთ და უკეთესად უნდა გავაკეთოთ. ხუთ მაისს სამარცვლე სიმინდის თესვა რომ არ ყოფილიყო დასრულებული, ბიუროზე გააშავებდნენ ყველას. მაშინ არ იყო წვიმა და ქარი ან ცუდი ამინდი? დისციპლინა, კონტროლი და გლეხიკაცისადმი მეტი გულისყურია საჭირო. ცოტა რამ უნდა გაიგოს და ძველ ხალხსაც მოუსმინოს ახლანდელმა ხელისუფლებამ. ყველაფერი ვიცითო და აგერ ჩანს, რაც ვიცით და რასაც ვშვებით. დააკვირდით, ყოველ წელს უარესი ამბავია. სოფელი თუ ასე დაიცალა, სად იქნება საქართველო? _ გვეუბნება ბატონი ელდარი და ამბობს იმასაც, რომ პრივატიზაციაში ბევრმა საქმის არმცოდნემ მიიღო მონაწილეობა.
მისი აზრით, საყანე ფართობების მცირე ნაკვეთებად დაყოფა არ იყო სწორად გათვლილი ქმედება.
_ სხვათა შორის, მაშინ სპეციალისტი ვინც იყო, ამბობდა, რომ ასე პატარ-პატარა ადგილებად დაყოფილ-დანაწევრებული ნაკვეთების მოვლა გართულდებოდა და ეფექტურობა დაეცემოდა. ასეც მოხდა _ ერთ შემოღობილ პატარა ნაკვეთში ერთმა დათესა, მეორემ დახვნაც ვერ მოახერხა. ტრაქტორი წავიდა სხვაგან. მერე ისევ მოსვლას მეტი დრო და საწვავი დასჭირდა. ამ და კიდევ უამრავმა ფაქტორმა მიგვიყვანა აქამდე, რასაც დაუხნავ-დაუთესავი ფართობები და მიწაზე გულაყრილი მოსახლეობა ჰქვია, _ ამბობს ის.
ოზურგეთის მუნიციპალიტეტში თესვა, სავარაუდოდ, კარგი ამინდის პირობებში, ერთ კვირაში დაიწყება. 4272 ჰა ფართობიდან, თუ გასულ წელს ორმოცი% დაუთესავი დარჩა, საინტერესოა, რამდენი დარჩება წელს. „გურია ნიუსი“ თვალს მიადევნებს ამ პროცესს და შედეგებს გავაცნობთ ჩვენს მკითხველებს.
