ცნობილი გახდა, რომ საქართველოს ნაკრებისა და „ნაპოლის“ შემტევი ხვიჩა კვარაცხელია „პარი სენ-ჟერმენის“ დაინტერესის სფეროშია.
ფრანგული მედიის მტკიცებით, პარიზელები კილიან მბაპეს შემცვლელს უკვე ეძებენ. მბაპეს ხელშეკრულება მიმდინარე სეზონის ბოლოს ეწურება და კარიერას ალბათ მადრიდის „რეალში“ გააგრძელებს.
მბაპეს შემცვლელთა შორის ერთ-ერთი ხვიჩა კვარაცხელიაც არის, რომლითაც სხვა ევროპული გრანდებიც ინტერესდებიან. ფრანგულ კლუბში კარგად იციან, რომ ქართველის სანაცვლოდ „ნაპოლის“ საბანკო ანგარიშზე დიდი თანხის გადახდა მოუწევთ.
„ნაპოლის“ ყოფილმა ფეხბურთელმა ლორენცო ინსინიემ კი ხვიჩა კვარაცხელიაზე მოკლე კომენტარი გააკეთა.
„კვარაცხელიას, როგორც ფეხბურთელს არ ვიცნობდი, მაგრამ შარშან ის „ნაპოლის“ დამატებითი ღირებულება იყო, განსაკუთრებული რაღაცები გააკეთა“, – აღნიშნა ინსინიემ.
გუშინ, იტალიელმა მწვრთნელმა ანდრეა აგოსტინელიმ განაცხადა, რომ სეზონის სტარტზე ხვიჩა კვარაცხელიამ და ვიქტორ ოსიმენმა სიმშვიდე დაკარგეს.
„მაძარიმ იცის, როგორ აგრძნობინოს ნდობა ისეთ ფეხბურთელებს, როგორებიც ოსიმენი და კვარაცხელია არიან, რომლებმაც ალბათ, ცოტათი თავდაჯერება და სიმშვიდე სეზონის დასაწყისშივე დაკარგეს. ორივეს სჭირდება ნორმალურ დონეზე დაბრუნება და მწვრთნელი ყველაფერს აკეთებს, რომ ისინი საუკეთესო ფორმაში ჩააყენოს“, – განაცხადა ანდრეა აგოსტინელიმ.
8 დეკემბერს, იტალიის პირველობის მორიგ ტურში, „იუვენტუსისა“ და „ნაპოლის“ შეხვედრა გაიმართება. მატჩი ტურინში, თბილისის დროით 23.45 წუთზე დაიწყება.
გუშინ, ამ მატჩის შესახებ „უვენტუსის“ ყოფილმა პრეზიდენტმა ჯოვანი კობოლი ჯილიმ ისაუბრა.
„განსაკუთრებით მეშინია კვარაცხელიას, რომელიც მგონია, რომ კარგ ფორმაშია. გარდა ამისა, მეშინია ოსიმენის, რომელიც დიდებული ფეხბურთელია, მიუხედავად იმისა, რომ ჯერ საუკეთესო ფორმაში არ არის. „ნაპოლი“ ძლიერია და ალეგრის ბიჭებს მეტოქის წინააღმდეგ ყურადღებით თამაში მოუწევს. თუმცა, ვფიქრობ, „იუვენტუსი“ ძალიან გაბრაზებული იქნება შარშან ნეაპოლში წაგების გამო“, – განაცხადა კობოლი ჯილიმ.
გუშინ, ესპანურმა გამოცემამ „Tribuna Deportiva“ გაავრცელა ინფორმაცია, რომ „ვალენსია“ 2024 წლის ზაფხულში გუნდის ერთ-ერთ ლიდერს, ქართველ მეკარე გიორგი მამარდაშვილს, გაყიდის.
ვალენსიურ გუნდს ფინანსური კრიზისი აქვს და იმედოვნებენ, რომ ქართველის გასხვისებით მინიმუმ 25 მილიონ ევროს მიიღებენ, რითაც საგრძნობ შევსებას მიიღებენ.
გამოცემა „Miami Herald“-ის მტკიცებით კი, ვეტერანი ურუგვაელი თავდამსხმელი ლუის სუარესი კარიერას მაიამის „ინტერში“ გააგრძელებს.
სუარესი 2024 წლიდან თავისუფალი აგენტი გახდება, აშშ-ის კლუბში უსასყიდლოდ გადავა და ხელს ერთწლიან ხელსეკრულებას მოაწერს.
სუარესის ბოლო კლუბი ბრაზილიური „გრემიო“ გახლდათ, სადაც 32 მატჩში 15 გოლი გაიტანა და 11 შედეგიანი გადაცემა გააკეთა.
ავტორი
