ლანჩხუთის მუნიციპალიტეტის საკრებულოს სხდომაზე ა(ა)იპ კულტურის დაწესებულებათა გაერთიანების ხელმძღვანელმა ადელინა კილაძემ დეპუტატებს მოკლედ ის პრობლემები გააცნო, რომელიც ხსენებულ სამსახურს აქვს ინფრასტრუქტურის კუთხით.
„კატასტროფული მდგომარეობაა ნინოშვილში, რომლის საგამოფენო დარბაზში დამთვალიერებლის შესვლა, ფაქტობრივად, შეუძლებელია. მხარეთმცოდნეობის მუზეუმში გარეფასადი, საიდანაც ფილები ცვივა, მოსაწესრიგებელი. განსაკუთრებული პრობლემები გვაქვს ინფრასტრუქტურის მხრივ “, _ დახმარების თხოვნით მიმართა კილაძემ ადგილობრივ პირველ პირებს.
კილაძის შემდეგ გაერთიანებაში არსებულ პრობლემებზე თავად მუზეუმის ხელმძღვანელებმა ისაუბრეს.
ის, რომ კულტურის გაერთიანებაში ინფრასტრუქტურის კუთხით პრობლემები არის სამსახურის ხელმძღვანელს აცანის მაჟორიტარი ემზარ თედორაძეც დაეთანხმა, რომლის გამოსვლაშიც გარკვეული ბრალდებები ჩანდა ამ სამსახურის მისამართით. თედორაძე განსაკუთრებით უკმაყოფილო გაერთიანებაში შემავალი ინფრასტრუქტურის სამსახურისა და მისი ხელმძღვანელის მუშაობით იყო.
„მართლაც გაქვთ პრობლემები ინფრასტრუქტურის კუთხით. რატომღაც გაერთიანების ხელმძღვანელს არ გაუჟღერებია ის პრობლემები, რაც აცანაშია. არადა, ყველაზე მეტი პრობლემა აქაა _ რემონტის, კადრების და ადამიანთა დაჩაგვრის მხრივაც კი. მითხარით, აქამდე რატომ არ დაინიშნა კულტურის სახლის ხელმძღვანელი აცანაში. ზოგი მეუბნება პარტიაა წინააღმდეგიო, ზოგიც _ სუსიო, ზოგმა კი თანხებს ვზოგავთო.
თუ თანხები დაზოგეთ, გამაგებინეთ, სად წაიღეთ?! ბიბლიოთეკაში გისოსები მაინც გაგეკეთებინათ. ინფრასტრუქტურის სამსახური გაქვთ შექმნილი, სადაც ხელფასი ორი ათასი ლარია, ხარჯი კი ათასი ლარი“, _ ცხარობდა აცანის მაჟორიტარი.
ვალოდია წულაძის სახელობის მუზეუმის ხელმძღვანელმა, მაია ჩხაიძემ კი საკრებულოს სხდომაზე ის შიდა დაპირისპირება გაასაჯაროვა, რომელიც გაერთიანებაში არსებობს თანამშრომლებს შორის.
„ქართული ოცნების“ წევრი ვარ და აქამდე ყველანაირად თავს ვიკავებდი შექმნილი სიტუაციის გასაჯაროებისგან, სანამ კულმინაციამდე არ მივედი. ის, რაც ხდება სრული ნონსენსია. კულტურის დაწესებულებათა გაერთიანების ხელმძღვანელს მოადგილის პოსტზე განაცხადი მქონდა შეტანილი, თუმცა, მე უარი მეთქვა და ამ თანამდებობაზე დანიშნეს პროფესიით ინჟინერი, საკმაოდ მძიმე ბრალდებით ნასამართლევი პიროვნება მერაბ ქარჩავა, რომლის სიძე შინაგან საქმეთა სამინისტროში მაღალ თანამდებობას იკავებს.
ქარჩავას მხრიდან თანამშრომლების მიმართ დისკრიმინაციული ქმედებები მხდის იძულებულს, მსგავსი განცხადებები გავაკეთო საჯაროდ. მადლიერმა სიძემ, კეთილი ინებოს და ჭკუა ასწავლოს მის გათავხედებულ სიმამრს. კიტრივით წაგაცლი თავსო, _ კაცი მემუქრება. ან რომელი კრიმინალი ნახა ქარჩავამ ანსამბლ „აცაურას“ წევრები მათ სამსახურიდან გაშვებით და დაპატიმრებით რომ დაემუქრება. არ ვაპირებ ამაზე გაჩუმებას, ქარჩავამ სასწრაფოდ ბოდიში უნდა მოიხადოს. თუ მისი საკითხი არ მოგვარდება შიმშილობას გამოვაცხადებ“, _ თქვა მაია ჩხაიძემ მერაბ ქარჩავას მისამართით, რომელიც კულტურის დაწესებულებათა გაერთიანებაში ინფრასტრუქტურას კურირებს. ჩხაიძისვე თქმით, ქარჩავა გაერთიანებაში ორ თანამდებობას იკავებს.
კრიტიკული იყო მხარეთმცოდნეობის მუზეუმის ხელმძღვანელი ნონა იმნაძეც, რომლის თქმითაც, მუზეუმისთვის სასიკეთო არაფერი გაკეთებულა.
„ბევრს საუბრობენ აქ გაკეთებულ სიკეთეებზე, თუმცა, მსგავსი არაფერი მომხდარა. მხოლოდ ფუჭი დაპირებები გვესმის. ა(ა)იპ-დან ათი ათასები, როგორც არაფერი, ისე ქრება, სად მიდის ეს თანხები არავინ იცის და დასჯილიც არავინაა. ხუთი ათასი ლარი გვჭირდება, წიგნი რომ გამოვცეთ და არ იქნა ამ თანხის მოძიება. მორიელების ბუდედაა ქცეული ჩვენი მუზეუმი“, _ მუზეუმში არსებული პრობლემების გადაჭრა ითხოვა ნონა იმნაძემ. გარდა ამისა მხარეთმცოდნეობის მუზეუმის თანამშრომლებმა დაბალ სახელფასო ანაზღაურებაზეც გააკეთეს აქცენტი.
კულტურის დაწესებულებათა გაერთიანების ხელმძღვანელს კომენტარი ვთხოვეთ ჩხაიძესა და ქარჩავას შორის არსებული დაპირისპირების შესახებ, თუმცა, ადელინა კილაძემ არ ისურვა ამ თემაზე საუბარი.
„მაია ჩხაიძის ჭკუაზე დადიხართ?! არ ვაკეთებ ამ საკითხზე არანაირ კომენტარს“, _ გვითხრა კილაძემ, რომელმაც დეპუტატების წინაშე გამოსვლისას ჩხაიძეს რჩევაც მისცა: „მე შენთან ასე საჯაროდ პოლემიკაში არ შემოვალ, მაია, უბრალოდ რჩევას მოგცემ, რომ სხვის თვალში ბეწვს თუ ხედავ, იქნებ საკუთარში ბოძიც დაინახო“.
