“პარვუს ჯგუფი” ბჟუჟის ხეობაში სამი მცირე ჰესის მშენებლობას გეგმავს, _ ამის შესახებ ინფორმაცია მედიისთვის და არასამთავრობო ორგანიზაცია “ეკოს” წარმომადგენლებისთვის დღეს გახდა ცნობილი. კონკრეტულად, ცოტა ხნის წინ, სოფელ გომში, კომპანია “პარვუს ჯგუფის” წარმომადგენელი ამავე სოფლის მცხოვრებლების მცირე ნაწილს შეხვდა. შეხვდრას, დაახლოებით, 20 ადგილობრივი ესწრებოდა.
“პარვუს ჯგუფის” დამფუძნებელმა ზურაბ ბესელიამ თავისი სიტყვის გამოსვლის დროს აღნიშნა: “ჩვენს კომპანიას აქვს ყველა ნებართვა აღებული და კანონის ფარგლებში, დაგეგმილი გვაქვს სამი მცირე ჰესის მშენებლობა. ამ ეტაპზე მიმდინარეობს საპროექტო გზის მშენებლობა. კარგი იქნებოდა, უფრო ადრე მომხდარიყო ეს შეხვედრა, მაგრამ ახლაც არ არის გვიან. ჩვენ მზად ვართ, მსგავსი შეხვედრები კიდევ გავაკეთოთ და ეს ასეც იქნება. ვაპირებთ მედიის და არასამთავრობო ორგანიზაციის წარმომადგენლებთან შეხვედრას. “ – თქვა ზურაბ ბესელიამ.
“ეკოს” დამფუძნებელმა ირმა გორდელაძემ შეხვედრის დროს აღნიშნა, რომ “2 მეგავატამდე სიმძლავრის ჰესებს არ სჭირდება გარემოს ზემოქმედების შეფასება, მაგრამ ისეთ ხეობაში აპირებთ ჰესების მშენებლობას აუცილებლად ჭირდება გზშ და კვლევები”.
სოფელ გომის მკვიდრი გია დუმბაძემ თქვა, რომ ის მთა, სადაც ჰესის მშენებლობა იგეგმება, ვერ გაუძლებს. ამიტომ ის არ ეთანხმება ჰესების მშენებლობას ბჟუჟის ხეობაში. ჰესის აშენების წინააღმდეგი შეხვედრაზე არაერთი ადამიანი იყო. კომპანიის წარმომადგენლები კი საუბრობენ, რომ სამი მცირე ჰესის მშენებლობა არანაირ ზიანს მიაყენებს ხეობას.
ირმა გორდელაძის თქმით, მსგავსი შეხვედრები ადრე უნდა ჩატარებულიყო და არ დღეს, როდესაც კომპანიას უკვე დაწყებული აქვს გზის გაყვანის სამუშაოები.
“გურია ნიუსი” ამ თემასთან დაკავშირებით აგრძელებს მუშაობას და ეტაპობრივად შემოგთავაზებთ ახალ ინფორმაციებს.
ავტორი
