“პარვუს ჯგუფის” დამფუძნებელი: “ჩვენ რასაც გავაკეთებთ, ყველაფერი იქნება კანონმდებლობის დაცვით„

როგორც უკვე ვწერდით კომპანია „პარვუს ჯგუფი“ ოზურგეთში, მდინარე ბჟუჟის ხეობაში სამი მცირე ჰესის მშენებლობას გეგმავს.

„გურია ნიუსი“ „პარვუს ჯგუფის“ დამფუძნებელს, ზურაბ ბესელიას ტელეფონით  დაუკავშირდა და კითხვებით მიმართა _  რა ეტაპზე არის ბჟუჟის ხეობაში დაგეგმილი სამი მცირე ჰესის მშენებლობა და აპირებს თუ არა მოსახლეობასთან, მედიასთან და არასამთავრობო ორგანიზაციების წარმომადგენლებთან „პარვუს ჯგუფი“ შეხევდრას?

ჩვენთან საუბრის დროს ზურა ბესელია ამბობს, რომ ჯერჯერობით,  ადრეა საუბარი ჰესების მშენებლობის დაწყების თარიღთან დაკავშირებით.

_  ჯერ, ადრეა ამ საკითხზე საუბარი. ამ ეტაპზე ხდება დეტალური პროექტის შემუშავება უცხოელი სპეციალისტების მიერ. ასევე, მინდა გითხრათ, რომ რადგან მცირე ჰესის მშენებლობას ვაპირებთ, არ მოგვეთხოვება გარემოზე ზემოქმედების შეფასების დოკუმენტის გაკეთება. თუმცაღა, ოთხი კვლევის გაკეთება იგეგმება, რომლის შესახებაც ინფორმაცია მიეწოდება ყველა დაინტერესებულ პირს.

ეს ოთხი ძირითადი კვლევა იქნება: ჰიდროლოგიური, იქთიოლოგიური, გლაცეოლოგიური, სეისმოლოგიური. ახლა კვლევების მზადების ეტაპზე ვართ, რომლის შემდეგი ეტაპი იქნება მშენებლობის ნებართვის აღება და შესაბამისად, ამის შემდეგ ვგეგმავთ მედიასთან, არასამთავრობო ორგანიზაციის წარმომადგენლებთან და მოსახლეობასთან შეხვედრას.

_ თქვენ აღნიშნეთ, რომ მცირე ჰესების მშენებლობისას არ მოგეთხოვებათ არემოზე ზემოქმედების შეფასების დოკუმენტის გაკეთება. არადა, სოფელ გომში ჩატარებული შეხვედრის დროს „ეკოს“ დამფუძნებელმა ირმა გორდელაძემ რეკომენდაციის სახით გითხრათ, რომ ის ადგილი, სადაც ჰესების მშენებლობა იგეგმება, არის 8 ბალიან სეისმურ ზონაში და აუცილებლად საჭიროებს გზშ-ს…

_ გზშ–ს შემადგენლობის კომპონენტები არის ეს ოთხი კვლევა, რომელიც აუცილებლად ჩატარდება და მისი შედეგები ცნობილი იქნება დაინტერესებული პირებისთვის.

_ ოზურგეთის მუნიციპალიტეტის საკრებულოს სხდომა ჩატარდა 30 აგვისტოს. სხდომაზე საუბარი იყო ჰესების მშენებლობის შესახებ. ოზურგეთის მუნიციპალიტეტის მერის მოადგილემ ნათია გოლიაძემ აღნიშნა, რომ თუ ხალხის მოთხოვნა იქნება, არ განხორციელდება ეს პროექტი. თუ მოსახლეობამ უარი გამოუცხადა ჰესების მშენებლობას, ამ შემთხვევაში თქვენი პოზიცია როგორი იქნება?

 _ თქვენთან საუბრის დროს აღვნიშნე, რომ მიმდინარეობს მოსამზადებელი სამუშაოები. ჩვენ რასაც გავაკეთებთ, ყველაფერი იქნება კანონმდებლობის დაცვით. მთავარი ამოსავალი წერტილი ჩვენთვის, რა თქმა უნდა, კანონთან შესაბამისობაა. ასევე, მთავარია, მოსახლეობის ინფორმირებულობა და მათი მხარდაჭერა. ჩვენ ყველაფერს გავაკეთებთ, რომ მოსახლეობას დავუდგეთ გვერდით, _ გვითხრა ზურა ბესელიამ.

ბესელიას თქმით, ჰესების მშენებლობასთან დაკავშირებით თუ იქნება დაინტერესება ოზურგეთის საკრებულოს მხრიდან, მზადაა მიაწოდოს ინფორმაცია.

„თუ იქნება ოზურგეთის მუნიციპალიტეტის საკრებულოსგან დაინტერესება და დამიკავშირდებიან, მზად ვართ ინფორმაცია მივაწოდოთ. საქმის კურსში არიან გურიის სახელმწიფო რწმუნებული გიორგი ურუშაძე და ოზურგეთის მუნიციპალიტეტის მერი ავთანდილ თალაკვაძე. ორივე უწყებას მთელ ინფორმაციას ვაწვდით პროექტის მსვლელობის თაობაზე და ეს ხდება პერიოდულად“, _ აღნიშნა ჩვენთან საუბრის დასასრულს ზურა ბესელიამ.

მისივე თქმით, მედიასთან, არასამთავრობო ორგანიზაციის წარმომადგენლებსა და მოსახლეობასთან შეხვედრას კომპანია „პარვუს ჯგუფი“ სექტემბრის მეორე ნახევარში გეგმავს.

ამავე თემაზე: ის, რაც არ არის ცნობილი ოზურგეთის საკრებულოსთვის, ცნობილია სახელმწიფო რწმუნებულის ადმინისტრაციისთვის