საქართველოს ფეხბურთის ფედერაციის პრეზიდენტი ლევან კობიაშვილი, პირველი ვიცე-პრეზიდენტი კახა ჭუმბურიძე და ვიცე-პრეზიდენტი ნიკა ჯღარკავა გურიას სტუმრობდნენ.
ფეხბურთის ფედერაციის ხელმძღვანელები ჯერ ლანჩხუთში ჩავიდნენ, შემდეგ კი შეხვედრა ქალაქ ოზურგეთის საფეხბურთო კლუბ „მერცხალის“ სტადიონზე გამართეს, სადაც კომპანია „ნენას“ დამფუძნებელთან ზურაბ ჩხაიძესთან ერთად “მერცხალის” და ჩოხატაურის “ბახმაროს” ფეხბურთელებს სპორტული ინვენტარი გადასცეს.
შეხვედრას გურიის მხარის და მუნიციპალიტეტის პირველი პირებიც ესწრებოდნენ.
ლევან კობიაშვილმა ფედერაციის სამომავლო გეგმებზე ისაუბრა და აღნიშნა, რომ მათი ერთ-ერთი მთავარი საზრუნავი რეგიონის გუნდების გაძლიერებაა.
შეხვედრაზე, განსაკუთრებული ხაზი “ბახმაროს” წარმატებებს გაესვა და როგორც ჩოხატაურის საკრებულოს თავმჯდომარესთან, ზაალ მამალაძესთან და გამგებლის მოვალეობის შემსრულებელთან თამაზ ჯინჭარაძესთან საუბარში ფეხბურთის ფედერაციის პირველმა პირებმა აღნიშნეს, ქართული ფეხბურთის ისტორიაში ჩოხატაურელთა გუნდმა პირველად მოახერხა, რომ 6 თამაშიდან მათ კარში აცერთი გოლი არ გასულა, რაც რეკორდული მაჩვენებელია.
აღსანიშნავია, რომ 15 მაისს ჩოხატაურის “ბახმარო” და ოზურგეთის “მერცხალი” ერთმანეთს ჩოხატაურის ბორის პაიჭაძის სახელობის სტადიონზე დაუპირისპირდებიან.
თამაშს, “გურია ნიუსის” და გურიის ახალგაზრდული გაზეთის “21-ს ქვევით” მოწვევით ლევან კობიაშვილთან და ფეხბურთის ფედერაციის პირველ პირებთან ერთად, ცნობილი ქართველი ფეხბურთელი ზურა ხიზანიშვილი დაესწრება.
თუმცა, თამაშის დაწყებამდე ისინი ბავშვთა აკადემიის ფეხბურთელებს შეხვდებიან, მათ საკუთარი წარმატების საიდუმლოს გააცნობენ და უფრო მეტიც _ სიმბოლურ მატჩსაც გამართავენ.
15 მაისს, ასევე გაიმართება სტადიონის პროექტის პრეზენტაცია, რომელიც ფეხბურთის ფედერაციამ “ბახმაროს” საჩუქრად გადასცა.
