გუშინ იტალიურმა „Radio Kiss Kiss“ საინტერესო ინფორმაცია გაავრცელა. შესაძლოა, ლორენცო ინსინიე „ნაპოლიში“ ოთხთვიანი იჯარით დაბრუნდეს.
ნეაპოლური გუნდის ლეგენდამ მიმდინარე წლის ზაფხულში ამერიკულ „MLS“–ის პირველობას მიაშურა და „ტორონტოს“ რიგებში ჩაირიცხა. აშშ–ში, მარტამდე შესვენებაა და 31 წლის მოთამაშე შესაძლოა, ყოფილ გუნდს დროებით დაუბრუნდეს. ხვიჩა კვარაცხელიას „ნაპოლიში“ სრულფასოვანი შემცვლელი არ ჰყავს და ინსინიეც ამ პერიოდში მისი შემცვლელი იქნება.
ინსინიე „კასტელ ვოლუნტროს“ ბაზას უკვე ესტუმრა, სადაც ნეაპოლურმა კლუბმა წვრთნა განაახლა. ის ყოფილმა თანაგუნდელებმა და მწვრთნელმა ლუჩანო სპალეტიმ განსაკუთრებით თბილად მიიღეს.
რაც შეეხება ხვიჩა კვარაცხელიას. მან ტრავმა სრულებით მოირჩინა, ნეაპოლში დაბრუნდა და გუნდთან ერთად უკვე ივარჯიშა კიდეც.
„ნაპოლის“ ფეხბურთელები ჯერ ტრენაჟორებზე დაიტვირთნენ, შემდეგ მოედანზე გადაინაცვლეს და მოკლე მოედანზე ითამაშეს. კვარაცხელიამ შეუზღუდავად ივარჯიშა და ითამაშა. მცველი ამირ რაჰმანი ბაზაზე ინდივიდუალურად ვარჯიშობდა და მალე ისიც ჩადგება მწყობრში.
გუშინ ცნობილი გახდა, რომ მსოფლიო ფეხბურთის ლეგენდა პელე საავადმყოფოში გადაიყვანეს.
გამოცემა „Goal.com“–ის ინფორმაციით, ბრაზილიელი მისმა მეუღლემ და მომვლელმა სან–პაულოს კლინიკაში მიიყვანეს. ამჯერად ექიმებმა პელეს გულის უკმარისობა დაუდგინეს. ჯერჯერობით სხვა დეტალები უცნობია.
2021 წლის სექტემბერში პელეს სიმსივნე ამოკვეთეს და ქიმიოთერაპიის კურსი ჩაუტარეს.
მას შემდეგ, რაც ტურინის „იუვენტუსის“ ხელმძღვანელობა სრული შემადგენლობით გადადგა, კლუბის ახალი მმართველი ჯანლუკა ფერერო მენეჯმენტის განახლებაზე ფიქრობს.
გუშინ ცნობილი გახდა, რომ ჯანლუკა ფერერომ კლუბის ლეგენდა ალესანდრო დელ პიერო „იუვენტუსის“ დირექტორთა საბჭოში მიიწვია. ფერეროს სურს, რომ 48 წლის დელ პიერო კლუბის ახალი ვიცე–პრეზიდენტი გახდეს და პაველ ნედვედის ადგილი დაიკავოს, რომელმაც კლუბის მენეჯმენტი ანდრეა ანიელისთან ერთად დატოვა.
ალესანდრო დელ პიერო ამჟამად კატარში იმყოფება და მსოფლიოს ჩემპიონატზე სატელევიზიო ექსპერტად მუშაობს. მან უკვე განაცხადა, რომ მზადაა, „იუვენტუსის“ განახლებულ მენეჯმენტში დასაქმდეს.
გუშინ ცნობილი გახდა, რომ მსოფლიოს 2026 წლის ჩემპიონატზე ფიფა ახალი სიახლის დანერგვას აპირებს – პენალტების სერია ჯგუფური ეტაპის მატჩებში.
გამოცემა „The Athletic“-ის მტკიცებით, ფიფა ამ სიახლეს სერიოზულად განიხილავს და საამისოდ საფუძველიც აქვს.
მომდევნო მუნდიალზე 48 გუნდი ითამაშებს, რომლებიც 16 სამგუნდიან ჯგუფში განაწილდება. შესაბამისად, ჯგუფში ბოლო ტურის მატჩების პარალელურად ჩატარება შეუძლებელი იქნება – უფრო მეტიც, სამიდან ერთ გუნდს ჯგუფში თავისი მატჩები უკვე ჩატარებული ექნება, როცა დანარჩენი ორი გუნდი ერთმანეთს დაუპირისპირდება.
ამის გამო ფიფაში შიშობენ, რომ გუნდები, რომლებიც ბოლოს ითამაშებენ, შეიძლება თავიდანვე შეთანხმდნენ იმ შედეგზე, რომელიც ორივესთვის მისაღები იქნება. სწორედ ამის თავიდან ასაცილებლად ფიფას იდეა აქვს, რომ ჯგუფური ეტაპის მატჩებში, რომლებიც ფრედ დასრულდება, პენალტების სერია დაინიშნოს. პენალტების სერიაში გამარჯვებული გუნდი ბონუსის სახით 1 ქულას მიიღებს და ეს შეამცირებს წინასწარი შეთანხმების ალბათობას.
ოთხი წლის შემდეგ მსოფლიოს ჩემპიონატზე უკვე 48 ნაკრები ითამაშებს, ტურნირი კი სამ ქვეყანაში: კანადაში, მექსიკასა და აშშ–ში ჩატარდება.
არაბეთის გაერთიანებული საამიროების უმსხვილესი ქალაქი დუბაი კალათბურთის სუპერგუნდის შექნასა და მის ევროლიგაში ჩართვას აპირებს.
ესპანური გამოცემა „Mundo Deportivo“-ს მტკიცებით, დუბაიში უკვე მუშაობენ, რათა კლუბი რაც შეიძლება მალე დარეგისტრირდეს და ყველა ფორმალობის გავლის შემდეგ, უმთავრეს ევროპულ საკლუბო ტურნირში თამაშის უფლება მიიღოს.
როგორი იქნება ახალი აზიური გუნდის შემადგენლობა? ცნობილი გახდა რომ ამ ჩამოსაყალიბებელი კლუბის ხელმძღვანელები მოლაპარაკებებს ვასილიე მიციჩის, ნიკოლა მიროტიჩის, მაიკ ჯეიმსისა და მათი კალიბრის კალათბურთელებთან აწარმოებენ.
ცნობილი გახდა რომ ამასთან ერთად აზიელებს სურთ ზედიზედ სამჯერ (2024, 2025, 2026) მიიღონ ევროლიგის ოთხთა ფინალი. ისინი მზად არიან საკალათბურთო ევროლიგის უმთავრესი სპონსორებიც გახდნენ. ამჟამად ევროლიგას „Turkish Airlines“ პატრონობს, რომელიც წელიწადში დაახლოებით 10 მილიონ ევროს იხდის, დუბაიში კი მზად არიან ეს თანხა 50 მილიონამდე გაზარდონ, რაზეც ევროპელები ალბათ უარს ვერ იტყვიან.
ავტორი
