მიმდინარე შაბათ-კვირა ქართველი სპორტის თაყვანისმცემლებისათვის განსაკუთრებით წარმატებული გამოდგა. ხვიჩა კვარაცხელიას „ნაპოლიმ“ იტალიის პირველობაზე მორიგ გამარჯვებას მიაღწია. გიორგი მამარდაშვილის „ვალენსიამ“ ესპანეთის „ლა ლიგაში“ გამარჯვების გემო გაიხსენა. საქართველოს საკალათბურთო ეროვნულმა ნაკრებმა კი მსოფლიოს ჩემპიონატის საკვალიფიკაციო ჯგუფში გამოსვლა მესამე ადგილზე დაასრულა და პირველად ქართული კალათბურთის ისტორიაში ფინალურ ეტაპზე თამაში გაინაღდა.
ისლანდია 80:77-ს იგებდა, როდესაც ზედ საფინალო სირენის წინ სასროლ პოზიციაზე ფრიდრიკსონი დარჩა, თუმცა, სამქულიანი ააცილა და ემოციებმაც იფეთქა… სამი ქულით მარცხი გამარჯვების ტოლფასი აღმოჩნდა.
მსოფლიოს 2023 წლის ჩემპიონატი 25 აგვისტოდან 10 სექტემბრის ჩათვლით აზიის სამ ქვეყანაში – ფილიპინებში, იაპონიასა და ინდონეზიაში ჩატარდება.
ტურნირის ფორმატის თანახმად, 32 ნაკრები 8 ოთხგუნდიან ჯგუფში გადანაწილდება, ორ-ორი საუკეთესო მე-2 ჯგუფურ ეტაპზე გადავა, სადაც ოთხ ოთხგუნდიან ჯგუფში მოხვდება, იქიდან გასული ორ-ორი საუკეთესო კი თასისთვის ბრძოლას უკვე პლეი-ოფში გააგრძელებს.
ფინალური სტადიის წილისყრა 29 აპრილს შედგება, თუმცა, ცნობილია იმ არჩევანის შესახებ, რომელიც მასპინძელმა ქვეყნებმა გააკეთეს. მოგეხსენებათ, მასპინძლებს უფლება აქვთ ჯგუფში თითო მეტოქე ჯერ კიდევ წილისყრამდე დაასახელონ. შედეგად, უკვე ვიცით, რომ აშშ-ს ნაკრები ფილიპინებში ითამაშებს, სლოვენია – იაპონიაში, ხოლო კანადა – ინდონეზიაში.
იტალიის საფეხბურთო პირველობაზე ხვიჩა კვარაცხელიას „ნაპოლი“ გაჩერებას არ აპირება და ჩემპიონის წოდებას სწრაფი ნაბიჯით უახლოვდება.
ნეაპოლურმა გუნდმა „სერია A“-ს 24-ე ტურში „ემპოლის“ სტუმრად აჯობა – 2:0. ხვიჩა კვარაცხელიას არც გოლი გაუტანია და არც საგოლე გადაცემა გაუკეთებია, მაგრამ ორივე გოლში მისი წვლილი ძალიან დიდია.
მე-17 წუთზე ხვიჩამ არაჩვეულებრივი პასი გაუკეთა პიოტრ ჟელინსკის, რომელმაც ერთი შეხებით კარის გასწვრივ გააკეთა გადაცემა, იქ კი, „ემპოლის“ მცველმა ისმაილიმ ავტოგოლი გაიტანა. ნათელია, რომ მომენტში გარდამტეხი კვარას დიდებული პასი იყო.
10 წუთის შემდეგ ხვიჩამ უკვე საჯარიმოს გარედან ძლიერად დაარტყა და მეკარემ ბურთი მოიგერია, მაგრამ არცთუ კარგად, იქვე ვიქტორ ოსიმენი იყო ჩასაფრებული, რომელმაც დამატებაზე ივარგა და სხვაობა გააორმაგა.
კვარაცხელია ლუჩანო სპალეტიმ 70-ე წუთზე შეცვალა, რაც დიდწილად მარიო რუის გაძევებით იყო განპირობებული, რომელიც ერთი წუთით ადრე გააძევეს და იტალიელ მწვრთნელის გუნდის გადაწყობა მოუწია.
შეხვედრის დასრულების შემდეგ იტალიურმა მედიამ ქართველის გარჯა შემდეგნაირად შეაფასა:
Calciomercato.it – „ბურთთან რბილი შეხებით ტკბება, თანაგუნდელებთან კოორდინირებულად მუშაობს, მისი მოქმედება ხსნის ანგარიშს და მეორე გოლიც მისი დარტყმის შედეგია. როგორც ყოველთვის, გადამწყვეტი“.
Tuttomercatowet – „ჩვეულებრივ, გადამწყვეტი ეპიზოდებში. ორივე გოლში ჰქონდა წვლილი და „ემპოლის“ დაცვას საკმაოდ ბევრი პრობლემა შეუქმნა“.
Tuttonapoli – „ბურთთან ყოველი შეხება ბრწყინვალებაა. დარტყმა, რომლის შედეგადაც ოსიმენმა გაიტანა. „ემპოლი“ ხშირად ორი მეტოქით ეთამაშებოდა, მაგრამ ყოველთვის ახერხებდა გამოსავლის პოვნას და გათავისუფლებას“.
Calciomercato.com – „ემპოლის“ ავტოგოლი შორეულ ძელთან მისი ფუნჯით დახატული პასით გავიდა. ასევე მონაწილეობს მეორე გოლში“.
Corriere Dello Sport – „ფეხბურთს შთამბეჭდავი ბუნებრიობით ხატავს, მისთვის ყველაფერი მარტივია. ორივე გოლში მიიღო მონაწილეობა. პირველივე მცირე უყურადღებობაზე, თამაშგარის ხაზის დაუცველობის გამო სპალეტისგან ინგლისურად საყვედურს იღებს. მეორე ტაიმში დაღლილობისგან სუნთქვა შეეკრა, მაგრამ ეს ნორმალურია“.
„ნაპოლის“ მთავარმა მწვრთნელმა ლუჩანო სპალეტიმ „ემპოლისთან“ მატჩის შემდეგ შემდეგი კომენტარი გააკეთა:
„ციფრები ბევრ რამეზე მეტყველებს: ეს არის გუნდი, რომელიც ყველაფერში გაუმჯობესდა. შარშან გვიჭირდა ბალანსის და კომპაქტურობის პოვნა, რომელიც ახლა გვაქვს. მატჩებში არის სურათები, რომლებიც შეიძლება გამოგრჩეთ: „სასუოლოსთან“ ისეთი რამ ვნახე, რაც ფეხბურთში 25 წლის განმავლობაში არ მქონდა ნანახი – კუთხურის დროს ბურთი დავკარგეთ და ჩვენი 10 მანიაკი ფეხბურთელი დაცვაში ბრუნდებოდა, რომ გოლი არ გაგვეშვა. დიდი ჰარმონიაა, ყველა ფეხბურთელი თავის თანაგუნდელს ეხმარება.
მეტოქეების უხეშობა? როცა კვარას დონის ფეხბურთელი გყავს, რთულია მეტოქემ ის ჯარიმის გარეშე არ შეაჩეროს, ამიტომაც, ზოგჯერ ამ მეთოდს მიმართავენ. მისნაირი ძლიერი ფეხბურთელისთვის ეს ნორმალურია. იტალიელი მსაჯები უმაღლესი დონის არიან, შემთხვევითობა არაა, რომ ევროტურნირების ფინალებს ხშირად იტალიელები მსაჯობენ.
სკუდეტო? ფეხბურთელებმა იციან, რომ ჩვენ ძალიან მნიშვნელოვანი შანსი გვაქვს და ეს უნდა გააკეთონ გულშემატკივრებისა და თავიანთი ხალხისთვის. დარწმუნებული ვარ, ისინი ბოლომდე ყველაფერს გააკეთებენ, ამ სეზონში უკვე ვნახეთ რაღაცები, რაც კარგის მომასწავებელია. თუმცა, ხვალინდელ ქათამს, დღევანდელი კვერცხი გვირჩევნია, ჯერ უმჯობესია მატჩიდან მატჩამდე ვიფიქროთ და ძალიან შორს არ გავიხედოთ.
კიდევ ერთი თამაში გაშვებული გოლის გარეშე? ეს მხოლოდ დაცვის ხაზის სიძლიერის დამსახურება არ არის. ვხედავთ კიმი როგორია, რაჰმანი რამდენად განვითარდა, მაგრამ ეს მთელ გუნდს ეხება, სწორედ მთელი გუნდი ქმნის განსხვავებას და ამის ხარჯზე ვახერხებთ კარის მშრალად შენახვას“, – განაცხადა ლუჩანო სპალეტიმ.
„ვალენსიამ“ კი ესპანურ „ლა ლიგაში“, გასული წლის 10 ნოემბრის შემდეგ პირველად მოიგო. ამ პერიოდში გუნდს ჰქონდა რვა მატჩი, შვიდი წაგება და ერთადერთი ფრე, მათ შორის, ზედიზედ 5 წაგება, რის შედეგადაც მე-19 ადგილამდე დაქვეითდა.
„ვალენსიამ“ 23-ე ტურში „სოსიედადი“ დაამარცხა – 1:0.
გიორგი მამარდაშვილმა კარი მშრალად შეინახა: სეზონში მეოთხედ და 10 ნოემბრის შემდეგ პირველად. ქართველმა მეკარემ 3 დარტყმა მოიგერია და გუნდს უმნიშვნელოვანეს გამარჯვებაში დაეხმარა.
„ვალენსიამ“ 23 ქულა დააგროვა და გასავარდნი ზონა ჯერჯერობით დატოვა.
ავტორი
