პროკურატურამ დღეს გაზეთ ლანჩხუთი „პლუსის“ რედაქტორი, ქეთევან ნაკაშიძე გამოკითხვა გასაღების ან გამოყენების მიზნით ყალბი პირადობის მოწმობების შესაძლო დამზადების ფაქტზე დაწყებული გამოძიების ფარგლებში.
პროკურატურა ქეთევან ნაკაშიძეს მას შემდეგ დაუკავშირდა, რაც ტელეიმედის ეთერში ინფორმაცია გაჟღერდა აღნიშნულ საკითხთან დაკავშირებით, სადაც ერთ-ერთ ვერსიად გაჟრერდა, რომ „ნაციონალური მოძრაობის“ ადგილობრივ ლიდერს, კახა ასკურავასა და ქეთევან ნაკაშიძეს შორის გარიგება შედგა და რის შემდეგაც ამ უკანასკნელმა ასკურავას მის ხელთაარსებული გარდაცვლილ პირთა პირადობის მოწმობები გადასცა.
პოლიციის შენობასთან დაკითხვაზე მყოფი ქეთევან ნაკაშიძისთვის სოლიდარობის გამოსახატად მისი ადგილობრივი კოლეგებიც იმყოფებოდნენ.
„სირცხვილია, რაც წუხელ „იმედის“ ეთერში ვიხილეთ. მე მაქვს ინფორმაცია, რომ ქეთევან ნაკაშიძესთან ერთად ჩემი დადანაშაულებაც იგეგმებოდა, თუმცა რატომღაც ნუგზარ ცინცაძემ მერე ეს გადაიფიქრა. ვფლობ გარკვეულ ინფორმაციებს თუ ვინ დგას ამ ბინძური ცილისწამების უკან, თუმცა ჯერჯერობით ხელთ არ მაქვს ამის დამადასტურებელი დოკუმენტები და კონკრეტიკისგან თავს შევიკავებ. ამ ეტაპზე მხოლოდ იმის თქმა შემიძლია, რომ ამის უკან ჩვენი წარუმატებელი კოლეგები დგას“ _ აღნიშნა გაზეთ „ჰო და არას“რედაქტორმა ნონა გიგინეიშვილმა.
ტელეიმედში გასულ რეპორტაჟს სოციალ ქსელშიც მოჰყვა არაერთი გამოხმაურება:
„რა მიკვირს იცით? ადამიანი (რესპონდენტი)მტკიცებით ფორმაში ადანაშაულებს ადამიანს და ჟურნალისტს არ უჩნდება ელემენტარული შეკითხვა: აქვს თუ არა ბრალმდებელს მტკიცებულებები რის საფუძველზეც აკეთებს განცხადებას? პ.ს. კიდე კაი, 37 წელი რომ არაა!!! და კიდევ, “იმედმა” და ზოგადად ტელევიზიებმა, პრესამ გადახედოს ჟურნალისტების კვალიფიკაციას და ერთხელ და სამუდამოდ შემუშავდეს ჟურნალისტის ეთიკის კოდექსი“ _ წერს „პატრიოტთა ალიანსის“ წევრი დარეჯან ბურჭულაძე.
„გურია ნიუსმა“ დაკავშირება ნუგზარ ცინცაძესთან (იგივე ცანცუა) სცადა, რომელიც “ტელეიმედის” მთავარი წყაროა და აცხადებს, რომ ნაკაძიემ ასკურავას ნამდვილად გადასცა პირადობის მოწმობები. რამდენიმე მცდელობის მიუხედავად, ცინცაძემ ჩვენს სატელეფონო ზარებს არ უპასუხა.
სხვათაშორის, რედაქციაში რეპორტაჟის მოსამზადებლად „იმედის“ გადამღები ჯგუფის სტუმრობას იმ დღესვე გამოეხმაურა ქეთევან ნაკაშიძე და საკუთარი გაზეთით გააკეთა კომენტარი:
„ნომრის გამოშვებასთან დაკავშირებით ჩვეული გაწამაწია გვქონდა, რედაქციის ოფისში მოვიდა ორი ახალგაზრდა, რომლებმაც თავი გაგვაცნეს ტელეკომპანია „იმედის“ თანამშრომლებად — ერთი ჟურნალისტი და ერთიც — ოპერატორი. სტუმრებს პირადობის დამადასტურებელი არავითარი დოკუმენტი რატომღაც თავად არ წარმოუდგენიათ.
როგორც გაირკვა, მათი ვიზიტის მიზანი იყო იმის მიღწევა, რომ მე, როგორც გაზეთის რედაქტორს, უნდა მეღიარებინა, რომ კახა ასკურავას ის „ცნობილი“ პირადობის მოწმობები თურმე პირადად გადავეცი. ჟურნალისტი გოგონა საკმაოდ აგრესიული ტონით მოითხოვდა იმის აღიარებას, რა ინფორმაციაც მას „ვინმე“ წყაროსგან ჰქონდა მოპოვებული. მართალია ცოცხალი თავით წყაროს ვინაობა მან არ გაამჟღავნა, თუმცა კარგად ვხვდები, რას ისახავს მიზნად ეს ცილისწამება. როგორც ჩანს, ვიღაცას ჩემი რეპუტაციის შელახვა სურს. ვნახოთ, რას მიაღწევენ, დაველოდოთ მოვლენათა განვითარებას“, _ წერს ნაკაშიძე.
ჟურნალისტი, რომელმაც სიუჟეტი მოამზადა და რომელზეც ქეთევან ნაკაშიძე წერს, დაჯი ჩხიკვაძეა.
იგი „გურია ნიუსთან“ საუბრისას ამბობს, რომ სიუჟეტი ყველა სტანდარტის დაცვით მოამზადა:
_ გვყავდა წყარო, რომლის მიერ მიწოდებული ინფორმაციის გადასამოწმებლად მივედი ქალბატონ ქეთინოსთან. ჩვეულებრივი მუშა პროცესი იყო. ქალბატონმა ქეთინომ პირადობის მოწმობებთან დაკავშირებით განსხვავებული ვერსია მოჰყვა და ამ ვერსიაზეც ვიმუშავე. არ ვიცი, სხვა რა უნდა გითხრათ. არანაირი აგრესია არ გამომივლენია. სიუჟეტი მოვამზადე ყველა წესის დაცვით, ჩავწერე ყველა მხარე და ყველას ჰქონდა საკუთარი აზრის დაფიქსირების საშუალება, _ გვითხრა ჩხიკვაძემ.
როგორც ირკვევა, გამოძიება ასევე გამოკითხავს ყველა იმ პირს, რომლებიც სატელევიზიო სიუჟეტში ფიგურირებდნენ და ლანჩხუთის საკრებულოს წევრის კახა ასკურავას მიერ გავრცელებულ ინფორმაციასთან დაკავშირებით საუბრობდნენ.
ცნობისთვის, ლანჩხუთის საკრებულოს დეპუტატი „ნაციონალური მოძრაობიდან“ კახა ასკურავა მთავარ პროკურატურაში 3 დეკემბერს მას შემდეგ გამოიკითხა, რაც მან სოციალური ქსელით გაავრცელა ინფორმაცია, რომ ლანჩხუთში გადაყრილი პირადობის მოწმობები აღმოაჩინა.
