“პარლამენტში სასამართლო სისტემასთან დაკავშირებით პროცესები თავიდანვე არასწორად წარიმართა. სისტემაში სუფთა სინდისისა და პროფესიონალიზმის მქონე ადამიანები უნდა გაჩდნენ. დღევანდელმა ნაღვაწმა ხვალინდელი დღე უკეთესობისკან აუცილებლად უნდა შეცვალოს“, _ აღნიშნა ’’გურია ნიუსთან“ ’’ქართული ოცების“ დეპუტატმა ზაზა პაპუაშვილმა .
დეპუტატი მიიჩნევს, რომ თანამდებობებზე მოსამართლეების უვადოდ დანიშვნის პროცესი უნდა შეჩერდეს.
_ ბატონო ზაზა, საგამოძიებო უწყებამ, ჯერჯერობით, ვერ დაადგინა, ვინ არის ფარული ჩანაწერის მთავარი გამავრცელებელი წყარო. როგორ ფიქრობთ, აღნიშნულ საქმეზე სამართლიანობა იზეიმებს და ამ დანაშაულის მთავარი შემოქმედი პირი თუ პირები კანონის სრული სიმკაცრით აგებენ პასუხს?
_ ყველასთვის კარგად ცნობილია, ვინ არის ასეთი ჩანაწერების შემოქმედი და თავის დროზე, ვინ განახორციელა ჩაწერა. ამ შხამის ლოკალიზებას „ქართული ოცნება“ ასე მალე ვერ მოახდენდა. ფარული ჩანაწერების გავრცელება „ნაციონალური მოძრაობის“ ყოვლად გარყვნილი მემკვიდრეობაა, რომელთან ბრძოლაც განვითარებული ტექნოლოგიების პირობებშიც ძალიან რთული აღმოჩნდა. რაც შეეხება ფარული ჩანაწერის გამავრცელებლის ვინაობას, ამაზე ვარაუდს ნამდვილად ვერ დავიწყებ. გამოძიების სწორად წარმართვა სამართალდამცველების საქმეა და მოლოდინი მაქვს, რომ აღნიშნული საქმე ბოლომდე იქნება მიყვანილი.
_“ქართული ოცნების“ დეპუტატი ეკა ბესელია თვლის, რომ ფარული ჩანაწერი, შესაძლოა, იმ ადამიანებმა გაუვრცელეს, რომლებიც სასამართლო სისტემასთან დაკავშირებით დაუპირისპირდნენ. კერძოდ, ბესელიამ ხელი გაიშვირა თანაგუნდელებისა და მოსამართლეების იმ ნაწილისკენ, რომლებიც მთელი ამ დროს განმავლობაში აკრიტიკებდნენ. თანაგუნდელის აღნიშნულ მოსაზრებას იზიარებთ?
_ ეკა ბესელიას ვერსიას აქვს არსებობის უფლება, თუმცა უდანაშაულობის პრეზუფციას ვერ დავარღვევთ. დანაშაულის დამამტკიცებელი და მამხილებელი საბუთები რომ გვქონდეს, ბუნებრივია, საქმე ძალიან მალე დამთავრდებოდა. გასაგებია, რომ ყველას აქვს საკუთარი ვერსია, მაგრამ ამ ვერსიის დამადასტურებელი მტკიცებულებები რამდენად არსებობს, ეს სხვა საკითხია.
_ სასამართლო სისტემაში არსებული პროცესების გაჯანსაღების მიზნით, ხომ არ ფიქრობთ, რომ თანამდებობებზე მოსამართლეთა უვადოდ დანიშვნის პროცესი 2024 წლამდე უნდა შეჩერდეს?
_ რასაკვირველია, უნდა შეჩერდეს და ძალიან ბევრი მომხრე ჰყავს ამას „ქართული ოცნების“ შიგნით. ასეთი საღი აზრი პატივისცემას იმსახურებს. ჩვენ ისეთი დრო გამოვიარეთ და ისეთი რეჟიმი გვყავს გაშვებული პოლიტიკიდან, რომ ძალიან დიდი სირთულე შექმნა ამ მემკვიდრეობამ. ასე რომ, ადამიანები, რომლებიც საზოგადოების მეორე მხარეს იდგენენ და პოლიტიკურ დაკვეთებს ასრულებდნენ, უვადოდ თანამდებობებზე არ უნდა განმწესდნენ, ეს აღმაშფოთებელია.
_ იუსტიციის უმაღლესმა საბჭომ ოდიოზური მოსამართლეები, მათ შორის, მაგალითად, ლევან მურუსიძე და სულხან მოლაშვილის საქმის განმხილველი მოსამართლე თანამდებობაზე უვადოდ უკვე განამწესა. არ გრჩებათ განცდა, რომ ცვლილებებზე საუბარი ახლა დაგვიანებულია?
_ არ ვიცი რამდენად დაგვიანებულია, ვფიქრობ, რომ თავიდანვე პროცესი არასწორად წარიმართა. სისტემაში ბევრი ახალი მოსამართლე უნდა გაჩნდეს, რომლებიც თავისი სინდისითა და პროფესიონალიზმით გადაწყვეტენ საქმეებს. როდესაც კეჭისყრაზე მიდგება საქმე, ყველა ადამიანი თავისი შეხედულებითა და რწმენით გააკეთებს არჩევანს. მე ამ საქმეში ვარ არა იმიტომ, რომ თანამდებობა მოვიპოვო, არამედ იმიტომ, რომ დღევანდელმა ნაღვაწმა ხვალინდელი დღე უკეთესობისკან შეცვალოს. რაც ქვეყანას განვითარებას უშლის ხელს, უნდა შეიცვალოს.
_ თანამდებობებზე უვადოდ განსამწესებელ მოსამართლეებთან დაკავშირებით აგორებული სკანდალის შემდეგ, „ქართული ოცნების“ წევრთა ერთიანობა კითხვის ნიშნის ქვეშ კიდევ ერთხელ დადგა. დღეს მმართველ პარტიას ერთიანობის შენარჩუნების რესურსი დარჩა?
_ გუნდის დატოვებაზე საუბარი, ჯერჯერობით, არ არის. ამჟამად მნიშვნელოვანია ისეთი პრეცენდენტები არ შეიქმნას მართლმსაჯულებაში, რომლებიც სამომავლოდ ამ სამართალწარმოებას შეაფერხებს. რასაკვირველია, „ქართული ოცნების“ შიგნით არის მოსაზრებები, რომელიც საკამათოა. ჩვენ დიდი გუნდი ვართ და ბუნებრივია, ყველა ერთ აზრზე ვერ ვიქნებით. ყველას გვინდა, რომ სისტემა არ ჩაიკეტოს. გვსურს, სტრუქტურებში ისეთი ადამიანები გამოჩდნენ, რომლებსაც სუფთა ბიოგრაფიები აქვთ. ვნახოთ, როგორ წარიმართება პროცესები.
