ოფიციალურად გავრცელდა ინფორმაცია, რომ შინაგან საქმეთა სამინისტროს გურიის პოლიციის დეპარტამენტის თანამშრომლებმა, ჩატარებული ოპერატიული და საგამოძიებო მოქმედებების შედეგად, სამსახურებრივ საქმიანობასთან დაკავშირებით, პოლიციელებზე თავდასხმის ფაქტზე, დაბა ურეკში 13 პირი დააკავეს.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ მიმდინარე წლის 24 ივნისს, ოზურგეთის რაიონული სამმართველოს ურეკის პოლიციის განყოფილების თანამშრომლებმა, ადმინისტრაციულ სამართალდარღვევათა კოდექსის 166-ე -173-ე მუხლებით გათვალისწინებული სამართალდარღვევისთვის , დაბა ურეკში 1988 წელს დაბადებული შ.ლ. დააკავეს და პოლიციის ადმინისტრაციულ შენობაში გადაიყვანეს. ჩვენი წყაროს ცნობით, მოგვიანებით პოლიციასთან დაკავებულის მეგობრები მიცვივდნენ, პოლიციელებს თავს დაესხნენ, მიაყენეს როგორც ფიზიკური, ისე სიტყვიერი შეურაცხყოფა და „გამოიხსნეს“ დაკავებული მეგობარი. შემდეგ მოხდა ის, რომ სამართალდამცველებმა დანაშაულის ჩამდენი პირები ბრალდებულის სახით დააკავეს.
თუმცა, ოფიციალურ განცხადებაში არ თქმულა, რომ რომ პოლიციელებს დაკავებული წაართვეს.
ჩატარებული სამძებრო სამუშაოების შემდეგ, დააკავეს თავდამსხმელბი.
ჩვენი წყაროს ცნობით, ბოლო კვირაში, გურიის ზღვისპირეთში, ორჯერ მოხდა პოლიციელებზე თავდასხმა. ჯერ შეკვეთილში და შემდეგ ურეკში.
_ პოლიციელებზე თავდასხმის ფაქტი ორჯერ მოხდა ბოლო პერიოდში, რაც ძალიან ცუდია. ზღვისპირეთში განსაკუთრებით, სამართლადამცავებს ბევრი სამუშაო აქვთ. უფრო რთულდება ვითარება საზღვაო სეზონის დროს. ერთი შემთხვევა შეკვეთილში იყო. ნასვამ მდგომარეობაში მყოფმა მამა-შვილმა პოლიციელს სიტყვიერი და ფიზიკური შეურაცხყოფა მიაყენა. როგორც ვიცი, ქვიშაში მანქანა ჩაფლობიათ და გამოთრევას თხოვდნენ. ნასვამ მდგომარეობაში მყოფი მამა-შვილი დააკავეს. რაც შეეხება ურეკის ფაქტს, აქაც ნასვამ მდგომარეობაში მყოფებმა, ხანძრის დროს, გადააჭარბეს საქციელს. წყალი რატომ გათავდა მანქანებშიო, დაიწყეს ხმაური. პოლიცილელებისგან წესრიგისკენ მითითებას კი დაპირისპირება მოჰყვა. როგორც ამბობენ, მანამდე ეს „დებოშიორი“ ბიჭები მაშველებსაც ეხმარებოდნენ ცეცხლის ჩაქრობაში, მაგრამ ხომ იცით… ნასვამების ამბავი. დაისჯებიან ახლა და კარგიც იქნება. პოლიციელებს, მაშველებს, ასეთ დროს განსაკუთრებით უნდა დაუდგე გვერდით თუ ცემა უნდა დაუწყო?- გვეუბნება წყარო.
„გურია ნიუსი“ შსს-ს პრესსამსახურს დაუკავშირდა და თხოვა, გაეკეთებინათ კომენტარი, შეესაბამება თუ არა აღნიშნული ფაქტები სიმართლეს.
მათ გვითხრეს, რომ დავლოდებოდით და მოგვაწოდებდნენ ინფორმაციას, თუმცა ამ დრომდე არ უწყებისგან პასუხი არ მიგვიღია.
ჩვენ მოწოდებისთანავე გავაცნობთ მკითხველეს შსს-ს კომენტარს.
ავტორი: მარინა ჩიხლაძე
