პოლონეთი მის მფლობელობაში არსებულ ყველა MiG-29 თვითმფრინავს აშშ-ს გადასცემს. როგორც ცნობილია, თვითფრინავები გერმანიაში, რამშტეინის საჰაერო ბაზაზეა და ამერიკის განკარგულებაში გადავა. ინფორმაციას პოლონეთის საგარეო საქმეთა სამინისტრო ავრცელებს.
ქვეყანამ გადაწყვეტილება აშშ-ს სახელმწიფო მდივნის, ენტონი ბლინკენის მიერ NATO-ს წევრი ქვეყნებისთვის უკრაინისთვის საბრძოლო თვითმფრინავების გადაცემაზე მწვანე შუქის ანთების შემდეგ მიიღო.
“პრეზიდენტსა და მთავრობას შორის კონსულტაციების შემდეგ, მთავრობა მზად არის დაუყოვნებლივ და უფასოდ განათავსოს ყველა მისი MIG-29 თვითმფრინავი რამშტეინის საავიაციო ბაზაზე ამერიკის შეერთებული შტატების მთავრობის განკარგულებაში.
ამავდროულად, პოლონეთი სთხოვს შეერთებულ შტატებს, მოგვაწოდოს გამოყენებული თვითმფრინავები შესაბამისი ოპერატიული შესაძლებლობებით. პოლონეთი მზად არის, დაუყოვნებლივ შეთანხმდეს თვითმფრინავების შესყიდვის პირობებზე.
პოლონეთის მთავრობა ასევე სთხოვს NATO-ს სხვა მოკავშირეებს, რომლებიც MiG-29 თვითმფრინავებს ფლობს, იმავე პრინციპით იმოქმედოს”- წერია პოლონეთის საგარეო საქმეთა სამინისტროს განცხადებაში.
ცნობისთვის, 6 მარტს ენტონი ბლინკენმა თქვა, რომ NATO-ს წევრი ქვეყნები, რომლებსაც უკრაინისთვის სამხედრო თვითმფრინავების გადაცემა სურთ, მწვანე შუქს მიიღებენ. მისივე თქმით, ამ საკითხის განხილვა უკვე დაწყებული იყო პოლონეთთან.
რუსეთმა უკრაინაზე სრულმასშტაბიანი თავდასხმა 24 თებერვალს, გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
[sexy_author_bio]
