გუშინ, კატარის მუნდიალზე კიდევ ორი მერვედფინალური შეხვედრა გაიმართა. იაპონიის ნაკრებმა ხორვატიას შეუპოვარი წინააღმდეგობა გაუწია. მატჩის ძირითადი და დამატებითი დრო ფრედ – 1:1 დასრულდა. თერთმეტმეტრიანი დარტყმების სერიაში უფრო ზუსტი ევროპული გუნდი აღმოჩნდა – 3:1.
ბრაზილიის ნაკრებმა თავისი ნამდვილი ძალა გამოავლინა და სამხრეთ კორეას დამაჯერებლად სძლია – 4:1. ერთი ბურთი ტრავმამოშუშებული ნეიმარის ანგარიშზეა.
მეოთხედფინალში ბრაზილია ხორვატიას დაუპირისპირდება.
ხვალ, კატარის მუნდიალის მერვედფინალურ სტადიაზე პორტუგალიის ეროვნული გუნდი შვეიცარიას დაუპირისპირდება. ამ მატჩის წინ პორტუგალიურმა გამოცემამ „A Bola“ თანამემამულე ქომაგთა შორის მოაწყო გამოკითხვა – „უნდა ითამაშოს თუ არა კრიშტიანო რონალდომ სასტარტო შემადგენელობაში?“
საინტერესოა, რომ გამოკითხულთა 70-მა პროცენტმა კითხვას უარყოფითად უპასუხა. მათი პოზიცია შემდეგია – რაც ვნახეთ, აშკარაა, რომ კრიშტიანო მხოლოდ საკუთარი თავისთვის და პირადი რეკორდებისთვის თამაშობს. ურტყამს კარში, საიდანაც დასარტყმელი არ არის და, შესაბამისად, ვერ ამჩნევს უკეთეს პოზიციაში მყოფ პარტნიორებს. ამის გარდა, ნეგატიური გამოხმაურება მოჰყვა დაჟინებულ მოთხოვნას, მისთვის ჩაეთვალათ ურუგვაისთან ბრუნო ფერნანდეშის მიერ გატანილი გოლი. ამასთან, სამხრეთ კორეის ნაკრებთან მის შეცდომას მოჰყვა გოლი პორტუგალიელთა კარში.
ბრიტანული გამოცემა „Guardian“-ის მტკიცებით, ინგლისის ეროვნული გუნდის შემტევი ჰარი კეინი მსოფლიოს ჩემპიონატის ჯგუფურ ეტაპზე თავისი ქვეყნის ნაკრების ყველაზე შეურაცხყოფადი ფეხბურთელი გახდა. თურმე, ჰარი კეინს სოციალურ ქსელში 426 შეურაცხმყოფელი პოსტი მიუძღვნეს, რომელიც ინგლისის ნაკრებში საერთო რაოდენობის 28 პროცენტს შეადგენს.
მეორე ადგილი დაიკავა ნახევარმცველმა მეისონ მაუნტმა (167 პოსტი), მესამე – მცველმა ჰარი მაგუაირმა (152).
ხალხის სურვილის წინააღმდეგ წავიდა ხორვატიის ნაკრების კაპიტანი ლუკა მოდრიჩი. ნახევარმცველის სიტყვებით, ის ვერ ხედავს ხორვატიის ნაკრებში კარიერის დასრულების აუცილებლობას.
„მე არ ვტოვებ ეროვნულ გუნდს. თავს კარგ ფორმაში ვგრძნობ და დავრჩები აქ, სადამდეც შევძლებ. არ მაქვს წასვლის მიზეზი. ეს ჩემი არჩევანია. ხალხი ამბობს, რომ უნდა დავტოვო ნაკრები და საკლუბო ფეხბურთზე გავაკეთო კონცენტრაცია. მე ამას არ ვეთანხმები“.
გუშინ, არგენტინის ნაკრების თავდამსხმელმა ლეო მესიმ თანამემამულე მასმედიასთან მიმდინარე მუნდიალის ფავორიტებზეც ისაუბრა.
,,ტურნირის დაწყებიდან მოყოლებული, ყველა მომენტით სიამოვნებას ვიღებ. ჩემი გამოცდილებით და ასაკით, უკვე ყველაფერს განსხვავებულად ვუყურებ.
ნიდერლანდების ნაკრების წინააღმდეგ რთული მატჩი გველოდება, ისევე, როგორც ეს მთელს მსოფლიო ჩემპიონატზეა. ეს შესანიშნავი გუნდია, შესანიშნავი მოთამაშეებით და მწვრთნელით.
ავსტრალიის ნაკრებთან მატჩს ვაკონტროლებდით, 2:0-ს ვიგებდით, თუმცა მათ არსაიდან გაგვიტანეს. ეს მსოფლიო თასია და სწორედ ასეთი მომენტები უნდა გადალახო, თუ გინდა, რომ წარმატებას მიაღწიო. სიმართლე ის არის, რომ ბედნიერი ვარ. იმ თამაშის შემდეგ, რაც ჩვენ ვანახეთ, სიგიჟე იქნებოდა ანგარიში რომ გაეთანაბრებინათ.
რა თქმა უნდა, მთელ მუნდიალს თვალს ვადევნებ. კამერუნთან მარცხის მიუხედავად, დასაწყისიდანვე ვთქვით, რომ ბრაზილია ძალიან ძლიერი გუნდია. ასევე ერთ–ერთი ფავორიტია საფრანგეთიც. ესპანეთის ნაკრებს რაც შეეხება, იმის მიუხედავად, რომ იაპონიასთან დამარცხდნენ, ძალიან კარგად თამაშობენ და როდესაც ბურთს აკონტროლებენ, მთელ თამაშსაც საკუთარი კონტროლის ქვეშ აქცევენ. გერმანიის ნაკრების გამოვარდნა ძალიან გამიკვირდა, რადგან მათ კარგი ახალგაზრდა ფეხბურთელები ჰყავთ, თუმცა ეს მსოფლიო ჩემპიონატია და ეს ფაქტიც აჩვენებს, თუ რაოდენ რთულია აქ თამაში,“ – განაცხადა ლეო მესიმ.
პოლონეთთან შეხვედრაში საფრანგეთის ნაკრებმა დაამტკიცა რომ კატარის მსოფლიო ჩემპიონატის ერთ–ერთი ფავორიტია.
საფრანგეთის ნაკრების მთავარმა მწვრთნელმა დიდიე დეშამმა პოლონეთთან გამარჯვების შემდეგ შემდეგი კომენტარი გააკეთა:
„იოლი მატჩი არ იყო, რადგან პოლონეთის ნაკრები კარგად გახლდათ ორგანიზებული და მეოთხედფინალში გასვლა უნდოდა. ტაქტიკური კორექტირება შევიტანეთ და მერე უკეთ ვითამაშეთ.
მბაპე? მას ბევრი პრობლემის გადაჭრის უნარი აქვს, რაც ჩვენთვის უფრო უკეთესია. ექვსი დღე გვაქვს მომდევნო მატჩამდე და შეგვიძლია ამოვისუნთქოთ, დავისვენოთ და ცოტა დრო ოჯახთან ერთად გავატაროთ. მბაპე საუკეთესო ფეხბურთელია? ობიექტური არ ვარ, ფრანგი ვარ და თან მისი მწვრთნელი, მაგრამ დიახ, რა თქმა უნდა. ის ამ მსოფლიოს ჩემპიონატისთვის განსაკუთრებულად ემზადებოდა და მიუხედავად იმისა, რომ პირველ ტაიმში საუკეთესო თამაში არ უჩვენებია, აჩვენა, რომ მატჩის მიმდინარეობის შეცვლის უნარი აქვს.
ოლივიე ჟირუ წარმოუდგენელი ფეხბურთელია, ახლა ამას ბევრი ამბობს, მაგრამ მახსოვს, რომ აკრიტიკებდნენ. ოლივიე ყოველთვის სამაგალითოა თავისი დამოკიდებულებით, ის კრიტიკასაც კარგად იღებს და მას გოლებს გუნდური გამარჯვება ურჩევნია“.
კილიან მბაპემ კი კიდევ ერთხელ მსოფლიო ჩემპიონობასა და „ოქროს ბურთის“ მოგებაზე ისაუბრა.
„ოქროს ბურთზე“ ოცნება არის თუ არა მოტივაცია მუნდიალზე კარგად თამაშისთვის? – არა. მხოლოდ ერთი მიზანი მაქვს, მსოფლიო ჩემპიონატი კიდევ ერთხელ მოვიგო! ეს არის ის, რის გამოც კატარში ვიმყოფები, მაგრამ თუ „ოქროს ბურთს“ მოვიგებ, რა თქმა უნდა, ძალიან ბედნიერი ვიქნები“, – განაცხადა მბაპემ.
საფრანგეთის პრეზიდენტმა ემანუელ მაკრონმა მსოფლიოს ჩემპიონატზე თავისი ქვეყნისა და პოლონეთის ნაკრებების მატჩის შედეგი წინასწარ გამოიცნო.
„ვფიქრობ, ჩვენ მოვიგებთ – 3:1! ლევანდოვსკი ერთს გაიტანს, ისევე როგორც მბაპე, შესაძლოა, ჟირუც, რომელსაც ისტორიაში შესვლა სურს. საფრანგეთის მესამე გოლის გატანა ჯოკერს შეუძლია“, – განაცხადა მაკრონმა შეხვედრის წინ გამოცემა „პარიზიენთან“ ინტერვიუში.
ინგლისის ნაკრებმა მერვედფინალში დამაჯერებლად დაამარცხა სენეგალი და მეოთხედფინალში საფრანგეთს დაუპირისპირდება.
ინგლისი – სენეგალის შეხვედრის შემდეგ კომენტარი გააკეთა ინგლისის ნაკრების წარსულში ცნობილმა ფორვარდმა გარი ლინეკერმა:
„ისევ ლამაზი ფეხბურთი ინგლისის ნაკრების შესრულებით. მადლობა გარეთ საუთგეითს მიღებული გადაწყვეტილებებისთვის. მისი ორი გადაწყვეტილება კითხვებს აჩენდა და ორივემ გოლი გაიტანა და თავისი როლი ითამაშა გამარჯვებაში. ეს ახალგაზრდული გუნდი არ არის მარტო შესანიშნავი, ის ძალიან სასიამოვნო სანახავია, გიყვარდეთ ის. ბელინგემი სენსაციური, ის ყველაფერს აკეთებს“.
საინტერესოა, რომ გამოცემა „The Telegraph“–ის ცნობით, თუ გარეთ საუთგეიტის გუნდი კატარის მუნდიალს მოიგებს, ნაკრების თითოეული მოთამაშე საშუალოდ 400-450 ათას ფუნტს მიღებს.
თავად გარეთ საუთგეიტი საფრანგეთთან შეხვედრის წინ შემდეგ კომენტარს აკეთებს:
„საფრანგეთის ნაკრებთან დაპირისპირება ჩვენთვის ყველაზე დიდი გამოწვევაა. ისინი მოქმედი მსოფლიოს ჩემპიონები არიან და ინდივიდუალურად ძალიან ნიჭიერი ფეხბურთელები ჰყავთ. კილიან მბაპე მსოფლიო დონის მოთამაშეა, მან დიდ ტურნირებზე უმაღლესი ხარისხსის ფეხბურთი აჩვენა, ასევე ანტუან გრიზმანი, რომელსაც ნაკრებში 100-ზე მეტი შეხვედრა აქვს ჩატარებული, იგი ფენომენალურია. ჩვენ კარგად ვაფასებთ ოლივიე ჟირუს შესაძლებლობებსაც, ხოლო მათი ახალგაზრდა ნახევარმცველები წარმოუდგენელ სამუშაოს ასრულებენ. როდესაც საფრანგეთის ნაკრებს კარგად დააკვირდებით, ყველა პოზიციაზე ნიჭიერ ფეხბურთელებს აღმოაჩენთ, მათთან თამაში ჩვენთვის დიდი გამოცდა იქნება“.
მსოფლიო პირველობას უკვე დაემშვიდობა სენეგალის ეროვნული გუნდი. გუშინ, ტრავმირებულმა სადიო მანემ, რომელიც მსოფლიო ჩემპიონატზე სენეგალის ნაკრებს ვერ დაეხმარა, ინგლისთან მარცხის შემდეგ ემოციური წერილი გამოაქვეყნა:
„ძვირფასო ძმებო, სენეგალელი ხალხი ძალიან ამაყობს თქვენი მოგზაურობით. თქვენ ყველა სენეგალელის გული მოიგეთ ეროვნული დროშის ღირსეულად დაცვით. გააგრძელეთ სწავლა და წარმატებებს გისურვებთ. ჩვენ კვლავ განვაგრძობთ ტიტულებისთვის ბრძოლას“, – დაწერა სადიო მანემ საკუთარ სოციალურ ქსელში.
და კვლავ კილიან მბაპე. საფრანგეთის ნაკრების თავდამსხმელმა მიმდინარე მუნდიალზე 5 გოლი უკვე გაიტანა.
23 წლის შემტევმა 4 ბურთი 2018 წლის მსოფლიოს ჩემპიონატზე გაიტანა , ხოლო 5 ამჟამად. ცხრა გოლის გასატანად მბაპეს 11 თამაშის ჩატარება დასჭირდა და უკვე გაასწრო სახელოვან დიეგო მარადონას, რომელმაც მუნდიალზე 21 შეხვედრაში 8 გოლი გაიტანა. კილიანი საფრანგეთის საფეხბურთო ისტორიაში მეორე ადგილზეა. მასზე წინ მხოლოდ ჟიულ ფონტენია 13 გოლით.
ფრანგ ვარსკვლავს მხოლოდ ერთი გოლი აშორებს ჰელმუტ რანის, გარი ლინეკერის, გაბრიელ ბატისტუტას, ტეოფილო კუბილასის, ტომას მიულერისა და გჟეგოჟ ლიატოს დაწევამდე, რომლებმაც მუნდიალზე 10-10 გოლი მიითვალეს.
მსოფლიოს ჩემპიონატის ყველა დროის ბომბარდირობამდეც ბევრი არაფერი რჩება – მიროსლავ კლოზემ 24 მატჩში 16 გოლი გაიტანა.
ავტორი
