რაგბი ევროპის ოფიციალურ საიტზე გამოქვეყნებული ცხრილის მიხედვით, 2021 წლის ჩემპიონატი სტარტს 6 ან 7 მარტს აიღებს. პანდემიის გამო, პირველი წრის თამაშები ძალიან უცნაურად გადანაწილდა. ჯერ კიდევ არ არის ცნობილი, ვინ იქნება მე-6 გუნდი, რადგან ბელგიასა და ნიდერლანდებს შორის გასამართი საპლეიოფო მატჩი გადაიდო და ჯერჯერობით, მხოლოდ ის არის ცნობილი, რომ ეს თამაში 13 ივნისამდე უნდა ჩატარდეს, რადგან შემდეგ, ამ დუელში გამარჯვებულმა ნაკრებმა ივნის-ივლისის სანაკრებო პაუზის დროს მოასწროს გადადებული თამაშების ჩატარება.
ჩვენთვის ყველაზე საინტერესო ის არის, რომ საქართველოს ნაკრებს მეტად რთული მარტის თვე ექნება, რადგან 4 მატჩის ჩატარება მოუწევს, თანაც პირველი სამი სტუმრად. მეხუთე თამაში კი ივნისის ბოლოს გაიმართება.
ტურნირს 6 ან 7 მარტს პორტუგალიაში გასვლით ვიწყებთ, ერთი კვირის თავზე ისევ პირინეის ნახევარკუნძულზე გვექნება თამაში ესპანეთთან, საიდანაც რუსეთში ჩასვლა მოგვიწევს. მარტის თვის ბოლო კვირას (27 ან 28 მარტს) კი რუმინეთი გვესტუმრება.
შეგახსენებთ, რომ რაგბი ევროპის ჩემპიონატი ორ წრედ ტარდება და 2022 წლის მარტში გაირკვევა თუ რომელი ნაკრები იასპარეზებენ 2023 წლის საფრანგეთში გასამართ მსოფლიო თასზე. ამ ტურნირის პირველ-მეორე ადგილოსნები პირდაპირ დაიშვებიან მსოფლიოზე, ხოლო მესამე ადგილოსანი რეპეშაჟში ჩაერთვება.
