ჩოხატაურის მუნიციპალიტეტში ბაზრობა ყოველ კვირას იმართება. ამ დღეს მუნიციპალიტეტს სავაჭროდ სხვა რეგიონებიდანაც სტუმრობენ. შესაბამისად, ყოველ კვირას ხალხმრავლობაა.
ბაზარი მუნიციპალურია და ის რამდენიმე წლის წინ გაარემონტეს _ რეაბილიტაცია გადასახადის გადამხდელებს 386 455 ლარი დაუჯდათ.
თუმცა, ამ რეაბილიტაციით არაფერი შეცვლილა _ თევზი, კვერცხი, ყველი, ფქვილი, ტანსაცმელი _ ყველა ტიპის პროდუქტი და ნივთი კანონის დარღვევით სწორედ ბაზრის გარეთ იყიდება.
რეაბილიტირებულ ბაზარში შესულებს დახლების უმრავლესობა ცარიელი დაგხვდებათ _ სამაგიეროდ, შესასვლელის და მიმდებარე ტერიტორიის მსგავსად, ბაზარშიც ბლომად ნახავთ მიწაზე, ტალახსა და წვიმაში დაყრილი ყველს, რომელშიც სრულიად შესაძლებელია, ძაღლის ბეწვიც აღმოაჩინოთ. უპატრონო ცხოველების სიმრავლე, იქ, სადაც ყველი და ხორცი იყიდება, თვალში საცემია.
_ რა ვქნა, მე ხომ ვერ დავუწყებ ძაღლებს დევნას? ყველა ჭიშკარი ღიაა და შემოდიან, _ გვითხრა ბაზრის დირექტორმა თამაზ დევიძემ, რომელმაც ჩვენთან საუბრისას ადასტურებს, რომ ცხოველები, რომელთა უმეტესობა დაავადებულია, ბაზრის ტერიტორიაზე არ უნდა იყვნენ:
_ ვიცი, რომ საშიშია და არ შეიძლება, მაგრამ რა ვქნა?! გუშინ, მუნიციპალიტეტის ტერიტორიიდან წაიყვანეს უპატრონო ძაღლები. ახლაც დავრეკე და მოვლენ, _ გვითხრა დევიძემ წარბშეუხრელად.
არადა, აღნიშნული სიტუაციის შესახებ, რომელიც მომხმარებლების სამართლიან უკმაყოფილებას იწვევს, როგორც სურსათის უვნებლობის სამსახურს, ისე მუნიციპალიტეტის მერიას “გურია ნიუსმა” შეატყობინა.
დევიძე ამბობს, რომ მათი მცდელობა, რომ გამყიდველი მიწაზე დაწყობილ ყველს არ ყიდდეს, უშედეგოა:
_ ვიცით, რომ არც ეს შეიძლება და ადამიანის ჯანმრთელობისთვის საშიშია, მაგრამ ამ ხალხს ვერაფერი გავაგებინე, _ ამბობს ბაზრის დირექტორი, რომელსაც ვეტექიმიც ეთანხმება:
_ სურსათის უვნებლობამაც გვითხრა, მაგრამ ვერაფერს გავხდით ამ ხალხთან, _ თქვა ნინო ჟღენტმა.
ჩვენ, ასევე, დავინტერესდით როდის იყო სურსათის უვნებლობის სამსახური ბაზარში, თუმცა, დაზუსტებული პასუხი ვერ მივიღეთ. არადა, სწორედ მათი მოვალეობაა კონტროლი და მსგავსი სიტუაციების აღკვეთა.
ერთადერთი რაც გავიგეთ, ისაა, რომ ადამიანის ჯანმრთელობაზე ზრუნვა და კანონის დაცვა ჩოხატაურის ბაზარში არავის ადარდებს.
აღსანიშნავია, რომ ეს პირველი შემთხვევა არ არის _ გურია ნიუსმა” არა ერთი რეპორტაჟი მოამზადა ჩოხატაურის ბაზარში არსებულ სიტუაციაზე, მაგრამ ეს ფოტოებიც ცხადჰყოფს, რომ სიტუაცია არ იცვლება! სურსათის უვნებლობის სამსახური, კვირა დღეს, როგორც ჩანს, თავს არ იტვირთავს და ინსპექტირებას არ ახდენს, ხოლო ბაზრის ადმინისტრაცია დაკისრებულ მოვალეობას თავს ვერ ართმევს და კითხვაზე _ თუ საქმეს ვერ აკეთებენ, რატომ არიან აქ, მხრების აჩეჩვით გვპასუხობენ:
_ რაც შეგვიძლია, ვაკეთებთ!
თუმცა, როგორც ჩანს, აკეთებენ მხოლოდ ფულს, ადამიანების ჯანმრთელობა კი არ აინტერესებთ და კანონს არაფრად აგდებენ!
