“პროკურატურამ საქმის გამოძიების პროცესს ხელი არ უნდა დააფაროს” _ კაიკაციშვილი

ორგანიზაცია ახალგაზრდა ადვოკატებმა მიკრო საფინანსო ორგანიზაცია ლაზიკა კაპიტალის საქმეზე მომზადებული სამართლებრივი კვლევის შედეგები წარმოადგინა და სარეკომენდაციო წინადადებით მთავრობას, მთავარ პროკურატურას და სახალხო დამცველის აპარატს მიმართა. როგორც ცნობილია, მონიტორინგის მთავარ მიზანს კომპანიის მიმართ ჩადენილი დანაშაულის გამოძიების ეფექტიანობისა და მიუკერძოებლობის შეფასება წარმოადგენდა.

როგორც “გურია ნიუსთან” საუბრისას ახალგაზრდა ადვოკატების ხელმძღვანელმა, არჩილ კაიკაციშვილმა განაცხადა, პროკურატურამ საქმის გამოძიების პროცესს ხელი არ უნდა დააფაროს.

“ჩვენ მიერ წარმოდგენილმა კვლევამ ცხადყო, რომ პრობლემა სისტემურია. იქედან გამომდინარე, რომ აღნიშნული სესხების უმრავლესობა გაცემულია სამეგრელო-ზემო სვანეთის ოლქში მოქმედი და ყოფილი პროკურორების მიმართ, შესაბამისად, მნიშვნელოვანია, რომ პროკურატურამ არ დააფაროს ხელი საქმის გამოძიების პროცესს. სამართალწარმოების პროცესი იყოს გამჭირვალე და ობიექტური. საქმეში არსებობს მოწმეთა ჩვენებები, დაკითხულია კომპანიის წარმომადგენლები,წარმოდგენილია ექსპერტიზის არაერთი დასკვნა. წარმოდგენილი მტკიცებულებების ერთობლიობა მიუთითებს, რომ კომპანიის წინაშე დანაშაულია ჩადენილი. თუმცა, დანაშაულის ჩადენას დამტკიცება ჭირდება და ამის კომპეტენტური ორგანოა საქართველოს მთავარი პროკურატურა. როგორც იქნა, საქმე სამეგრელო ზემო სვანეთის საოლქო პროკურატურიდან მთავარ პროკურატურაში გადმოვიდა, თუმცა, დღემდე არ ხდება აქტიური სამართალწარმოების პროცესის უზრუნველყოფა“, _ ამბობს კაიკაციშვილი.

მისი თქმით, მხარე საქმეზე შემაჯამებელ გადაწყვეტილებას მოითხოვს.
“შემაჯამებელი გადაწყვეტილება ნიშნავს, რომ კომპანია დაზარალებულად უნდა იქნეს ცნობილი ან არა. იმ შემთხვევაში, თუ კომპანია დაზარალებულად იქნა ცნობილი, მოცემულ შემთხვევაში მნიშვნელოვანია ის გარემოება, რომ კომპანიას წარმოეშვება ქონებრივი და არაქონებრივი ზიანის ანაზღაურების მოთხოვნა. მოცემულ შემთხვევაში, პროცესი ამ მიმართულებით, სამწუხაროდ, არ მიდის”,_ამბობს კაიკაციშვილი.

როგორც კაიკაციშვილი აღნიშნავს, ფინანსური დანაშაულის საქმე სწრაფად იქნება გახსნილი.

“ვიმედოვნებთ, რომ წარმოდგენილი კვლევა, საქმის გასაჯაროება და მასზე მაღალი რეზონანსი, გამოხმაურება პროკურატურაში საქმის მწარმოებლებს დაარწმუნებს რომ ლაზიკა კაპიტალის წინაშე ჩადენილი ფინანსური დანაშაულის საქმე სწრაფად უნდა იქნას გახსნილი. ჩვენ საქმეს უნდა შევხედოთ როგორც ბიზნესის ინტერესს. სახელმწიფო ვალდებულია, დაიცვას ბიზნესი, შესაბამისად, ვალდებულია, არა მხოლოდ გამოიძიოს, არამედ ხელი შეუწყოს ბიზნესის ფუნქციონირებას. როდესაც ბიზნესკომპანიის წინაშე ჩადენილ დანაშაულზეა საუბარი სახელმწიფო უნდა იყოს დაინტერესებული სწრაფი გამოძიებით. მოცემულ შემთხვევაში წარდგენილი მტკიცებულებების უმრავლესობა, თუ არ ჩავთვლით დაკითხული მოწმეების ჩვენებებს კომპანიის მიერ პროკურატურაშია წარდგენილი. შესაბამისად, არსებობს ყველა საფუძველი, იურიდიული წინაპირობა, რომ საქმეზე შემაჯამებელი გადაწყვეტილება იქნა მიღებული”, _ აცხადებს კაიკაციშვილი.

ახალგაზრდა ადვოკატების ხელმძღვანელი იმედოვნებს, რომ პროკურატურა საზოგადოებას ლაზიკა კაპიტალის საქმეზე მიმდინარე გამოძიების შესახებ საქმის კურსში ჩააყენებს. როგორც ცნობილია, ორგანიზაციამ მონიტორინგის ფარგლებში საქართველოს მთავარ პროკურატურას წერილით 2017 წლის 18 აპრილს მიმართა, რასაც გამოხმაურება ამ დრომდე არ მოჰყოლია. ახალგაზრდა ადვოკატების შეფასებით, 2015 წლის 30 იანვარიდან დღემდე, რაც საქმეს მთავარი პროკურორია იძიებს, მხარისთვის უცნობია, რა საგამოძიებო მოქმედებები მიმდინარეობს ან რატომ ვერ ხდება შემაჯამებელი გადაწყვეტილების მიღება.

როგორც ცნობილია, “ლაზიკა კაპიტალი” მნიშვნელოვანი გამოწვევის წინაშე 2010-2013 წლებში დადგა, როდესაც კომპანიაში ჩადენილი ფინანსური დანაშაულის შესახებ ცნობილი გახდა. სასამართლოს კანონიერ ძალაში შესული გადაწყვეტილებით, დადგინდა, რომ სოსო ზარქუამ და მანანა მიქავამ ყალბი სესხების გაცემით 807 741,76 ლარის ოდენობის ზიანი მიაყენეს კომპანიას. როგორც ცნობილია, 2006 წლის 13 ოქტომბერიდან 2010 წლის 23 თებერვლამდე სამეგრელო ზემო სვანეთის საოლქო პროკურატურის ყოფილი პროკურორის ფელიქს ჯალაღონიას მიმართ 4 სესხია გაცემული, გარდა ამისა, 3 სესხია ამავე პროკურორის მეუღლის სახელზე პარალელურად გაცემული, სესები, ასევე, პროკურორთან დაახლოებულ პირებზეცაა გაცემული. სესხები გაიცემოდა კომპანიაში აღიარებული წესებისა და პროცედურების დაცვის გარეშე.