პროტესტი მიწის გასხვისებასა და საქონლის გადარეკვას

ოზურგეთის საკრებულოს მორიგი სხდომა, 5 ოქტომბერს, 11 საათზე დაიწყო.

საკრებულოს თავმჯდომარის, დავით დარჩიას მიერ დღის წესრიგის წაკითხვის შემდეგ, ზუსტად ერთი საათი ჩხუბს დასჭირდა.

“ნაციონალური მოძრაობის” წარმომადგენლებმა საკრებულოს წევრებმა, ჯერ მუნიციპალიტეტის ბიუჯეტიდან პირუტყვის გადარეკვაში გადახდილი თანხები, შემდეგ კი შეკვეთილში, მათივე თქმით, რეკრეაციული ზონის ორი ჰექტარი ფართობის გასხვისება გააპროტესტეს.

“ნაციონალმა” დეპუტატმა თათია ნიკოლაშვილმა, სხდომაზე პირველადი მოხმარების პროდუქტები _ პური, შაქარი და ზეთი მოიტანა, მისივე თქმით, მეტი თვალსაჩინოებისთვის:

_ ერთი ძროხის გადადენა გიჯდებათ 500 ლარი? 30 ათასი ლარია გადახდილი უკვე, წელიწადში კი 90 ათასი ლარი გაქვთ გათვალისწინებული. რამდენი ბავშვის გახარება და გაჭირვებულის დახმარება შეიძლებოდა? ნახეთ, რა ღირს შაქარი, ზეთი, პური… და თქვენ რაში ყრით თანხებს? ბიუჯეტის ქურდები ხართ, _ ყვიროდა თათია ნიკოლაშვილი, რომელმაც ტრიბუნასთან მიუტანა მუნიციპალიტეტის მერის მოადგილეს, გიორგი ღურჯუმელიძეს დოკუმენტაცია და მას “ბიუჯეტის წურბელა” უწოდა, გიორგი ღურჯუმელიძემ კი საპასუხოდ “წურბელა და ტკიპა” ხარო, უთხრა ნიკოლაშვილს:

_ თქვენ რომელ პარტიას წარმოადგენთ? ბიუჯეტის ქურდი კეზერაშვილის ფრთას? ჯარისკაცებს რომ ფული მოპარა? კითხვა გაქვს? დასვი, რა გაინტერესებს? თავდაცვის ბიუჯეტის ქურდის ფრთა ხარ! დაადასტურე, მოდი და მაჩვენე… ბიუჯეტის ქურდის წარმომადგენელი ხარ შენ, პირადად თათია ნიკოლაშვილი!

_ სად ისწავლეთ, ქალბატონო, ასეთი დათვლა? _ ჰკითხა ნიკოლაშვილს თავმჯდომარის მოადგილემ, ლავრენტი ბიგვავამ და თავისთვის ჩაილაპარაკა, რა იციან დათვლაო.

ნიკოლაშვილის პროტესტს “ქართული ოცნების” დეპუტატების რეპლიკები _ “არ გისმენთ საერთოდ!” “რეგლამენტი დაიცავით”, “დააოკეთ”, “თათია კარგი მსახიობი იქნება, რომელიმე სპექტაკლში როლი მისცენ”, “დასრულდება სხდომა და გამოდით”, ბოლოს კი ტაში მოჰყვა.

გიორგი ღურჯუმელიძემ არაერთხელ გაიმეორა, რომ ბიუჯეტში ყველაფერი სწორადაა გაწერილი, თუმცა, ქურდი კეზერაშვილის, თავდაცვის ბიუჯეტის გამქურდავის წარმომადგენლის პარტიის წარმომადგენლებს ეს არ აინტერესებთ.

_ სოციალურად დაუცველი თანამდებობის პირები გყავთ ხელისუფლებაში. სირცხვილია… კეზერაშვილი თუ არის დამნაშავე, კეთილი ინებოს სახელმწიფომ და დაიჭიროს. თავი დაანებეთ მაგას და თქვენი ქურდი მინისტრები ნახეთ. შეხედეთ ოთხსართულიანი სახლები აქვთ, მესამეზე “ბასეინი”, მეოთხეზე სასტუმრო. კეზერაშვილმა თუ მოპარა თავდაცვას, თქვენი ხელისუფლება პარავს ხალხს! გარბის ხალხი ქვეყნიდან! ყოველდღე მიდიან. ენა არ იცის, არაფერი არ იცის და გარბის ადამიანი! ამას მიხედეთ… არ გრცხვენიათ?! _ ყვიროდა “ნაციონალი” გოჩა შარაშენიძე.

როგორც იქნა, დროებით დაწყნარდნენ მოდავე მხარეები და გიორგი ღურჯუმელიძემ დღის წესრიგით გათვალისწინებული საკითხის _ მუნიციპალიტეტის საკუთრებაში არსებული უძრავი ქონების საპრივატიზაციო ობიექტების შესახებ საკრებულოსთვის გაცნობა დაიწყო. თუმცა, ამჯერად მას სიტყვა “ნაციონალმა” დეპუტატმა დავით მჟავანაძემ შეაწყვეტინა _ მას ხელში თაბახების დასტა ეჭირა:

_ ადრეც გვქონდა საუბარი _ იქ, სადაც რეკრეაციული ზონაა, იქ, სადაც ტყე-პარკია, გამწვანებაა, აქ კონკრეტულად რაიმე ინვესტიცია უნდა გახორციელდეს? უნდა გაასხვისოთ უნიკალური ტყე-პარკი?! _ თქვა მჟავანაძემ ფოტოების წარმოდგენისას და გააგრძელა რომ ხსენებული ტერიტორიის გაჩეხვას აპირებენ.

_ ან, დიდი ეჭვი მაქვს, შემოიღობავს ოლიგარქი ბიძინა ივანიშვილი. ან საპირფარეშო რა შუაშია, რომელიც ბორენკა ივანიშვილმა შეისყიდა? _ კვლავ ფოტოებს აფრიალებდა მჟავანაძე.

გიორგი ღურჯუმელიძემ მჟავანაძეს უპასუხა, რომ ეს არ არის რეკრეაციული ზონა და რომ განაშენიანების გენგეგმით, რომელიც დამტკიცებულია, მითითებულია კონკრეტული მიწის ნაკვეთები.

_ განაშენიანების გეგმაზე როცა არის საუბარი, ეს არის ორი ჰექტარი ტყე, რომელიც უნდა გაასხვისოთ. იქვე მოსახლეობაა და როცა შესაძლებელია, იქ დასასვენებელი პარკი გაკეთდეს, რატომ უნდა გაიჩეხოს?! ყველას და ყველაფერს უშლის ხელს რუსი ოლიგარქი, ნახეთ, აგერ ფოტოები. ყველა ნიშანი არსებობს იმისა, რომ აქ ოლიგარქი, ბორენკა ივანიშვილი ააშენებს, რაც სურს. ხოლო ურეკი უნიკალური ბიჭვინთის ფიჭვის და ასევე, იშვიათი წიწვოვნების გარეშე დარჩება, _ არ ცხრებოდა მჟავანაძე.

_ ვინ არის ბორენკა?

_ ივანიშვილი, მოფერებით ვეძახი…

_ შენ რა გქვია? შენ რას გეძახიან, შენ? _ არაერთხელ გაუმეორა დავით დარჩიამ მჟავანაძეს.

_ აგერ არის საპირფარეშოც, რომელიც ბორენკამ შეისყიდა, _ კვლავ გადაფურცლა ფოტოები მჟავანაძემ.

_ გადი გარეთ, წადი, იჩივლე, მიმართე სასამართლოს, თუ ასეა, _ უთხრა დავით დარჩიამ.

_ კითხვა დასვი, თუ გაქვს, _ არაერთხელ გაუმეორა ღურჯუმელიძემ.

მჟავანაძემ ფოტოები კათედრაზე დაულაგა ღურჯუმელიძეს:

_ ეს მოგწონთ? _ ყვიროდა ის და იმეორებდა კითხვას, _ ნახე, რამხელა მტკიცებულება მაქვს! შეექმნა თუ არა იმ ხალხს პრობლემა, ვინც იქ ცხოვრობს? გზა დაუკეტა ხალხს. აგერ კიდე საპირფარეშო იყიდა, _ არ ჩერდებოდა მჟავანაძე, თუმცა, მას არავინ უსმენდა.

“აუჰ”, “მტკიცებულება აქვს”… “წადი და იჩივლე”, “არაა კარგად”, “გადი გარეთ”… “უპასუხისმგებლო”, _ ისმოდა საკრებულოს “ქართული ოცნების” წარმომადგენლებისგან, ბოლოს კი, ჩვეულებრივად, ტაში დაუკრეს მჟავანაძეს, რომელიც არაერთგზის იმეორებდა თავისას.

_ მთელი ერთი საათი, ჩემი დრო წაიღეთ თქვენ. იმის მაგივრად, რომ საქმეზე გელაპარაკათ, უაზრო, უშინაარსო, არაკომპეტენტური ლაპარაკით ხალხს ართმევთ დროს. გაკოტრებული პარტია ხართ, _ უთხრა ღურჯუმელიძემ მჟავანაძეს.

ოპოზიციის კატეგორიულობის მიუხედავად, ხანგრძლივი დავისა და ჩხუბის შემდეგ, რაშიც ერთ საათზე მეტი დრო დაიკარგა, საკრებულომ მაინც მიიღო დადგენილება, რომ კურორტ ურეკის ორ ჰექტარ ფართობს აუქციონზე გაიტანს. პროექტი გიორგი ღურჯუმელიძემ წარმოადგინა.

სხდომაზე სიტყვა ითხოვა ა(ა)იპ-ის ყოფილმა თანამშრომელმა ნინო ჯიშკარიანმა და თქვა, რომ უსამართლოდ გაათავისუფლეს:

_ გათავისუფლებაზე ხელი არ მომიწერია, არაფერი გამიფუჭებია, რა დავაშავე? თუ ჩემი 380 ლარი ვინმეს აგაშენებთ? 500 ლარი პენსიასავით რომ სახლში მისდით რვაკლასდამთავრებულებს, არ იცით? _ ხმას აუწია ჯიშკარიანმა.

ღურჯუმელიძემ მას ჰკითხა, დაესახელებინა პოზიცია, სად მუშაობდა და დადიოდა თუ არა სამსახურში.

პასუხად ჯიშკარიანმა “ლენჩები” უწოდა საკრებულოსა და მერიაში მომუშავეთა უმრავლესობას და უკმაყოფილო გავიდა დარბაზიდან.

ხუთ საკითხზე, რომლის ირგვლივაც სხდომაზე იმსჯელეს, საკრებულომ მიიღო შემდეგი განკარგულებები: ოზურგეთის მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხისა და საპრივატიზაციო გეგმის დამტკიცების შესახებ; მუნიციპალიტეტის საკუთრებაში არსებული კონჭკათის, დაბა ნასაკირალის, გურიანთის და ჭანიეთის ადმინისტრაციულ ერთეულებში მდებარე უძრავი ქონების სახელმწიფოსთვის საკუთრებაში გადაცემის თაობაზე; ასევე, ცვლილება შევიდა ოზურგეთის მუნიციპალიტეტის დაბა გომისმთის ადმინისტრაციული ერთეულის სივრცის დაგეგმარების გეგმის კონცეფციის დამტკიცების შესახებ” განკარგულებაში; საჯარო წარმოება კი ერთი საკითხის ირგვლივ დაიწყო _ “ოზურგეთის მუნიციპალიტეტის ქონების პრივატიზების და სარგებლობის უფლებით გადაცემის დამატებითი წესისა და ნასყიდობის ხელშეკრულების ფორმების დამტკიცების” თაობაზე.