„ფრთხილად, წინ საშიში წარსულია!“ _ ასეთია იმ პროექტის სახელწოდება, რომელზეც არასამთავრობო ორგანიზაცია “Post-ალიონი“ მედია სახლ „გურია ნიუსთან“ ერთად მუშაობს. პროექტი საქართველოს დამოუკიდებლობის 100 წლისთავს ეძღვნება და საქართველოს პრეზიდენტის ფონდის მხარდაჭერით ხორციელდება.
სწორედ ამ პროექტის ფარგლებში, 30 ივნისს, ჩოხატაურის ხელოვნების სასახლეში, გურიის საზოგადოება დაესწრო დამოუკიდებელი საქართველოს პირველი შინაგან საქმეთა მინისტრის ნოე რამიშვილის შესახებ გადაღებული ფილმის პრეზენტაციას, რომელიც შინაგან საქმეთა სამინისტროს არქივის მიერ მომზადდა. დამსწრე საზოგადოებამ ასევე იხილა ნოე რამიშვილის დის _ მართა რამიშვილი-ბერიშვილის ტრაგიკული ისტორიის შესახებ მომზადებული ვიდეო სიუჟეტი. ხელოვნების სასახლის ფოიეში გამოფენილი იყო მართა ბერიშვილის ბიოგრაფიული დოკუმენტების ასლები, რომლებიც, პროექტის განმავლობაში ჩოხატაურის მხარეთმცოდნეობის მუზეუმს.
პროექტის დირექტორმა ია მამალაძემ ისაუბრა, თუ რამდენად მნიშვნელოვანია საქართველოს უახლესი წარსულის – საქართველოს დამოუკიდებლობისდროინდელი წარსულის კვლევა და ახალგაზრდებისთვის გაცნობა დღევანდელ პოლიტიკურ კონტექსტში _ რუსული აგრესიის და ჰიბრიდული ომის პირობებში.
შინაგან საქმეთა სამინისტროს არქივის დირექტორის ომარ თუშურაშვილის თქმით, საქართველოს უახლესი ისტორიის დეტალების ცოდნა ყველასთვის მნიშვნელოვანია, რათა კარგად გავიაზროთ წარსულის შეცდომები და ისტორიული კანონზომიერება. მან ქვეყნის სამწლიანი დამოუკიდებლობის ისტორიულ მნიშვნელობასაც გაუსვა ხაზი, რომლის დროსაც საქართველომ მოახერხა ევროპაში ყველაზე მოწინავე სახელმწიფო, სამოქალაქო, მედია ინსტიტუტებისა და საკანონმდებლო ბაზის შექმნა.
დარბაზში მძიმე განწყობები შექმნა რუსული ოკუპაციის თავზარდამცემმა სისასტიკემ და მსხვერპლთა ტრაგიკული ბედის გაცნობამ. შეხვედრას ესწრებოდა მართა ბერიშვილის შვილიშვილი ასმათ ბერიშვილი.
საზოგადოებას საინტერესო ისტორიები, მეხსიერებას შემორჩენილი ამბები მოუთხრო პედაგოგმა რუსუდან ბერიშვილმა, რომელიც რამდენიმე ათეული წელია თავს უყრის, წერს და აქვეყნებს ცალკეული პირების, რეპრესიების მსხვერპლი ოჯახის შესახებ, ლეგენდებად ქცეულ ამბებს.
_ მე, ბერიშვილების შთამომავალი ვარ და სიმართლე გითხრათ ბევრი რამ მაინც არ ვიცოდი… უამრავი ახალი და საინტერესო ფაქტი გავიგე და დიდი მადლობა თქვენ ამისთვის, _ აღნიშნა ერეკლე ბერიშვილმა.
ოზურგეთის საკრებულოს თავმჯდომარის დავით დარჩიას თქმით, კარგი იქნება თუ მსგავსი ღონისძიებები ოზურგეთშიც გაიმართება:
_ ემოციებისგან ისე დავიტვირთე, რომ რთულია ამაზე საუბარი. ერთადერთი რამ მინდა გთხოვოთ _ ეს ფილმი და სიუჟეტი ოზურგეთშიც აჩვენეთ. ყველამ უნდა გაიგოს ჩვენი ისტორია, ჩვენი წარსული და ის შემზარავი ფაქტები, რომლის შესახებაც, სამწუხაროდ, დღემდე არაფერი ვიცით, _ თქვა დავით დარჩიამ.
ძალიან მნიშვნელოვანია, რომ ხელოვნების სასახლეში გამართულ პრეზენტაციას მრავლად ესწრებოდა ახალგაზრდობა გურიის სამივე მუნიციპალიტეტიდან.
