ადამიანის არსებობისთვის აუცილებელ უპირველეს პროდუქტზე _ პურზე და მისი ფასის ცვლილებების შესახებ, ყოველთვის ვწერდით, განსაკუთრებით კი გასული წლის განმავლობაში, როცა სისტემატურად ხდებოდა ფასის ზრდა.
პურის ფქვილის ფასი, ჯერ კიდევ გასული წლის მარტიდან გაიზარდა, როცა ერთი 50-კილოგრამიანი ტომრის ფასი, თითქმის, ას ლარს მიუახლოვდა, რამაც მოსახლეობა ძალიან შეაშინა.
ჯერ კიდევ ორი წლის წინ, ზაფხულში, ერთი ცალი პურის ფასი, საშუალოდ, 90 თეთრი იყო, ამ დროისთვის კი ეს ფასი უკვე გაორმაგებულია.
როგორც ცნობილია, პურის და ზოგადად, ფქვილის ფასის მატების მიზეზად, კოვიდ პანდემიის პერიოდში მთავრობის მიერ დაწყებული სუბსიდირების პროგრამის დასრულება დასახელდა.
შემდეგ, “ხორბლისა და ფქვილის მწარმოებელთა ასოციაციის” ხელმძღვანელებმა განაცხადეს, რომ ხორბლის ნაცვლად, ფქვილის იმპორტზე გადავიდნენ, თუმცა, არ გაამართლა მოლოდინმა.
სტატისტიკის მიხედვით, საქართველოს თვეში 7 ათასი ტონა ფქვილი სჭირდება პურის გამოსაცხობად. ხოლო საკონდიტრო ნაწარმისთვის _ 30 ათასი ტონა.
ფქვილის ფასმა, ძალზე სწრაფად, 2022 წლის მარტიდან მოიმატა. მაშინ ამბობდნენ, რომ რუსეთიდან ტრანსპორტირების ფასი მძღოლებმა გაზარდეს. ასეთი და მსგავსი მიზეზებით (სახელდებოდა გაზის ტარიფის ზრდაც) ხდებოდა ფასის მატება, რაც მოსახლეობის აღშფოთებას იწვევდა.
ამ წლის მარტიდან მნიშვნელოვნად იკლო პურის ფქვილის ფასმა _ ოზურგეთში ახლა ერთი ტომარა, 25-კილოგრამიანი ფქვილი, ხარისხის მიხედვით, საშუალოდ 37-40-47 ლარი ღირს.
კონკრეტულად, ოზურგეთში მოქმედი წისქვილკომბინატი “გულისტანი” არსებობს, საიდანაც ადგილობრივი მაღაზიებიც მარაგდება.
თაყაიშვილის ქუჩაზე მდებარე მაღაზია “ბარაქა” ის ობიექტია, სადაც მრავალი დასახელების პურის ფქვილი, ქატო და მარცვლეული იყიდება.
აქ ერთი ტომარა, 25 კილოგრამი წონის “გულისტანი” ახლა 37 ლარი ღირს (უმაღლესი ხარისხის). ორიოდე კვირის წინ კი 48 ლარი ღირდა. ასევე, “ბარაქა” _ უმაღლესი ხარისხის ფქვილი 53 ლარი ღირდა, ახლა 40 ლარი ღირს. დაახლოებით, ასეთივე ფასები აქვს სხვადასხვა დასახელების ფქვილსაც. ყველაზე მაღალი ხარისხი, “ექსტრა” აქ, ახლა 48 ლარი ღირს (25 კგ). ცოტა ხნის წინ 55 ლარი ღირდა.
კითხვაზე, გაიაფდება თუ არა პური, აქ პასუხი არ აქვთ. ამბობენ, რომ მათ მხოლოდ ფქვილის ფასები იციან.
_ ბევრია შემომტანი. გაიაფდა და კარგია. ხალხს უხარია. ეშინიათ, რომ კვლავ არ გაძვირდეს და ზოგი ორ-სამ ცალ ტომარას ყიდულობს, _ გვეუბნებიან მაღაზიაში.
_ სიხარულით აღარ ვარ. მითხრეს, 12 ლარით დაიკლო ერთმა ტომარა ფქვილის ფასმაო და არ დავიჯერე. ძიმითიდან ჩამოვედი. სამი ტომარა ვიყიდე. პენსია გადავდე ამისთვის. ქატოც გაიაფებულია. იაფი კი არ ჰქვია, ჩვენს შემოსავლებთან შედარებით, მაგრამ სულ დაგვახრჩეს, ისეთი მდგომარეობა იყო გასული წლის ბოლოს. ახლა გვეშინია, უცებ ისევ არ მოიმატოს. თან გაზაფხულია, “მშიერი დრო” ჰქვია ჩვენში ამ პერიოდს და მოვიმარაგეთ, _ გვეუბნება ძიმითელი ქალბატონი.
ქაქუთის მკვიდრი ოლეგ შავიშვილი ამბობს, რომ მარტო ცხოვრობს და ძირითადად, მაღაზიაში ყიდულობს პურს. თუმცა, გაიაფებული პურის ფქვილის ყიდვა მაინც გადაწყვიტა:
_ ძაღლი მყავს შინ, ქათმებიც. სიმინდის მარცვალიც ისე გაიაფებულია, არ დავიჯერე. ვყიდულობ ახლა. რა ვიცი, ხალხი იძახის, რუსეთიდან შემოაქვთ, რუსეთში შევყავართ და ამიტომ გაიაფდაო. ადრე რომ იყო იაფი, სამი წლის წინ, რუსეთში ვიყავით? გადამრევს ეს ხალხი! ადამიანს იაფი პური არ უნდა ენატრებოდეს. არ მაინტერესებს, საიდან შემოიტანენ. მანამდე არ შემოჰქონდათ რუსეთიდან? _ გვეკითხება ოლეგ შავიშვილი.
არიან მომხმარებლები, რომლებიც შიშობენ, რომ პურის ფქვილი ისევ გაძვირდება. ამიტომ ამჯობინებენ, სხვა პროდუქტის ყიდვაზე უფრო, რამდენიმე ტომარა ფქვილი იყიდონ.
_ იმასაც ამბობენ, რუსეთში უზარმაზარი მოსავალი მოიწიეს და ამიტომ ყიდიანო. უკრაინელებს რომ ხორბალი მოპარეს, თუ წაართვეს, ხომ წერდნენ? მარაგი ხომ არ შეავსეს? _ ამბობენ თაყაიშვილის ქუჩაზე მდგომი ტაქსების მძღოლები.
ფქვილის გარდა, გაიაფებულია ქატო და მარცვლეულიც.
ერთი ტომარა, 25-კილოგრამიანი ქატო, რომელიც ორიოდე კვირის წინ, 30 ლარი ღირდა, ახლა 22 ლარი ღირს. ერთი ტომარა, 50-კილოგრამიანი ყვითელი სიმინდი თუ 70 ლარი ღირდა, ახლა 48 ლარი ღირს…
ფრინველისა და შინაური ცხოველისთვის ასე საჭირო მარცვლეულის თუ ქატოს შედარებით გაიაფება, რა თქმა უნდა, განსაკუთრებით უხარიათ სოფლების მცხოვრებლებს.
_ სოფელში ხალხმა ძროხები გაყიდა. ვერ არჩინეს. პირუტყვს ადამიანივით მოვლა და პატრონობა უნდა. ასე თუ გაგრძელდა, აღარ დარჩება ძროხა და ქათამი. კარგია, რომ მარცვლეული გაიაფდა. სოფელში ქათამი მაინც თუ არ გაზარდე, რა უნდა ქნა? _ ამბობს სოფელ ოზურგეთის მკვიდრი ირა ლაბაძე.
კითხვაზე, პურის ფქვილის ფასი კლების პარალელურად, გაიაფდება თუ არა პური, ფქვილის გამყიდველებს პასუხი არ აქვთ, ჩვენ ცხობასთან კავშირი არ გვაქვსო.
“გურია ნიუსი” ოზურგეთში არსებულ პურის საცხობების (მათ შორის თონის პურის) მფლობელებს ესაუბრა, თუმცა, თითქმის არავინ ისურვა დაკონკრეტებული პასუხის გაცემა.
ძირითადად, ყველა ამბობს, რომ არსებულ მდგომარეობაზე ფიქრობენ. ფასების ცვლა ხშირად ხდება და თუ სტაბილურად დაიწევს ფასი, პურის საცალო ფასის გაიაფებაზე იფიქრებენ.
_ ფასის კლებას თუ მატებას, დასაქმებული პერსონალის ხელფასის ცვლილებაც ახლავს. კიდევ მრავალი ფაქტორია. დაგვიჯერეთ, ჩვენ ყველაზე მეტად გვსურს, პურის ფასმა დაიკლოს. თუ ვითარება გვიკარნახებს, აუცილებლად დავწევთ ფასს, _ ამბობენ ისინი, თუმცა, ამჯერად თავს იკავებენ ვინაობის დასახელებისგან.
ავტორი
