“პურის ფქვილს შემოიტანენ… აბა, გვაშიმშილებენ?!” _ პურის ფქვილის მარაგი იწურება

პურის ფქვილის ფასის ზრდას ოზურგეთში (ზოგადად, ქვეყანაში) ყველა მიეჩვია და ხალხი, რიგითი მომხმარებლები, ძირითადად, კერძო საუბარში წუწუნებენ. თუმცა, პირველ ივლისს გავრცელებულმა ინფორმაციამ, რომ ოზურგეთში წისქვილკომბინატი “გულისტანი” გაჩერდა, ყველა შეაშფოთა.

_ პურის ფქვილი სხვა სადისტრიბუციო ქსელებიდანაც შემოდის, თუმცა, როცა ქალაქში არსებობს წისქვილკომბინატი, მაინც იმედია. ახლა ამბობენ, რომ ბათუმსა და ფოთშიც დაიკეტა წისქვილკომბინატები, რადგან ხორბლის მარაგი ამოწურულა.

საინტერესოა, როდის განაახლებენ მუშაობას?! ჯერჯერობით, კი არის პური და პურის ფქვილი მაღაზიებში, თუმცა, მერე რა ვქნათ, მართლა რომ აღარ შემოვიდეს?! _ შიშობს მოსახლეობა.

პროდუქტების სხვადასხვა საბითუმო თუ საცალო მაღაზიებში “გურია ნიუსს” დაუდასტურეს, რომ დასავლეთ საქართველოში არსებული თითქმის ყველა წისქვილკომბინატი ხორბლის მარაგის ამოწურვის გამო დაიკეტა. კონკრეტულად კი, ოზურგეთში  _ “გულისტანი”, ბათუმში _ “ბარაქა”, ფოთში _ “პურადი”.

_ აღნიშნულ წისქვილკომბინატებში, ყველგან ამოიწურა ხორბლის მარაგი და ამიტომ შეაჩერეს მუშაობა. ეს ინფორმაცია ჩვენ დისტრიბუტორებისგან ვიცით. ყოველ მოსვლაზე, როცა ფქვილი მოაქვთ, ვეკითხებით, რა მდგომარეობა იქნება მომდევნო დღეს. როგორც გვითხრეს, ახლა, ძირითადად, მარაგი ამოწურულია. უმეტესად, დარჩენილია მხოლოდ “ექსტრა” ხარისხის ფქვილი. ჩვენ, მაღაზიებში, სამი დღის მარაგი თუ გვექნება. შემოტანილი რაც გვაქვს, მალე გაიყიდება. სამწუხაროდ, რა იქნება მერე, ვერაფერს გეტყვით. როგორც გითხარით, ეს ინფორმაცია აღნიშნული წისქვილკომბინატებიდან გავიგეთ, _ გვეუბნებიან ოზურგეთში, თაყაიშვილის ქუჩაზე განლაგებულ მაღაზიებში, სადაც ყველაზე ბევრი საწყობია და მომხმარებლები ფქვილს, ქატოს თუ მარცვლეულს, ძირითადად, აქ ყიდულობენ. მათ საწყობშიც შეგვიპატიჟეს.

_ ნახეთ, უმეტესად, ექსტრა ხარისხის ფქვილია დარჩენილი. ასევე, ადრინდელი შემოტანილია ზოგიერთი სახეობა. მაგალითად, ქატო და შავი ფქვილი ცოტა რაოდენობით გვაქვს. მომდევნო კვირაში რა მოხდება, როგორ და საიდან შემოიტანენ პურის ფქვილს, არ ვიცით. იმედს მაინც ვიტოვებთ. გვეუბნებიან, რომ შემდეგ ჩვენი, ადგილობრივი ხორბალიც შემოვა და ცოტა ესეც საშველი და შეღავათი იქნება, _ გვეუბნებიან მაღაზიის ოპერატორები.

თაყაიშვილის ქუჩაზე მდებარე მაღაზიაში, სადაც, ასევე, მხოლოდ ფქვილეული და მარცვლეული იყიდება, ჯერჯერობით, საკმაოდაა გამოტანილი სხვადასხვა დასახელების და ხარისხის ფქვილეული. მათ შორის ჭარბობს “გულისტანის” ეტიკეტები.

_ ოზურგეთში არსებული წისქვილკომბინატი “გულისტანი” ხორბალს აღარ ფქვავს, გაჩერდა. თუმცა, პურის ფქვილის მარაგი ჯერ არის. თუ ხორბალი აღარ იქნება, ალბათ, ფქვილს შემოიტანენ. ასეთი ინფორმაცია გვაქვს, რომ საცალო სახით შემოიტანენ პურის ფქვილს. აბა, შიმშილით ხომ არ მოგვკლავენ?! ასევე, გვეუბნებიან, რომ ფასი კიდევ მოიმატებს, _ გვეუბნება მაღაზიის მფლობელი.

_ კი, კი, პურის ფქვილს, დაფასოებულს, გამზადებულს რუსეთიდან შემოიტანენო, გვეუბნებიან. მერე ლაპარაკსაც რუსულად დავიწყებთ, ძველებურად… _ გვერდით მდებარე მაღაზიიდან გამოსძახეს ჩვენს რესპონდენტს, _ ცოტა თუ არ გავიხუმრეთ, დარდი მოგვკლავს. ჯერ შიმშილი არ დაწყებულა, ფქვილიც, ასე თუ ისე, არის და ამ “დაყრილი ხმებით” მთლად ნუ გადავირევით. გაძვირება მოსალოდნელია, თორემ პურის ფქვილს ვინ გააჩერებს? აშინებენ ხალხს, რომ ფასის მატება ამ მოტივით კიდევ და კიდევ აიტანონო.

ამ დროისთვის ოზურგეთში, ფქვილეულის საბითუმო თუ საცალო მაღაზიებში გამოტანილია უმაღლესი ხარისხის “გულისტანი”, 25 კილოგრამიანი 50 ლარად, “ექსტრა” _ 55 ლარად. ბათუმიდან ახლა დასახელება “ნაღდი” შემოაქვთ, რომელიც (უმაღლესი ხარისხის) 25-კილოგრამიანი ტომარა 48 ლარი ღირს. აქვე გამოტანილია შავი პურის ფქვილი და ქატო, დასახელებით _ “კახური”. აქვეა ეტიკეტით _ “ქართული ხორბალი” _ დამშვენებული გორის წისქვილკომბინატის ნაწარმი. როგორც მაღაზიის მეპატრონეები გვეუბნებიან, აქვთ ინფორმაცია, რომ გორში არ გაჩერებულა წისქვილკომბინატი.

პურის ფქვილის დისტრიბუციასთან დაკავშირებული პირები ამბობენ, რომ აქვთ ინფორმაცია, ხორბლის მარაგის ამოწურვის გამო, პურის ფქვილი საცალო ფორმით შემოდის და კიდევ უფრო მეტი შემოვა (უმეტესად, რუსულ პროდუქციას ასახელებენ).

_ პურის ჰქონდეს ხალხს და რა მნიშვნელობა აქვს, საიდან შემოვა? _ თავისივე ინფორმაციაზე თავადვე სცემენ დისტრიბუტორები პასუხს.

ოზურგეთში არსებული შპს “ვასაძის პურის” დირექტორმა ირაკლი სირაძემ, “გურია ნიუსთან” ასეთი კომენტარი გააკეთა:

_ ჩემი ინფორმაციით, ხორბალი უკვე აღარ შემოდის საქართველოში. პურის ფქვილი მზა სახით შემოაქვთ. მთავარია, შეფერხება არ მოხდეს და ხარისხი იყოს საუკეთესო. შესაძლოა, ეს იგივე წისქვილკომბინატებს შემოჰქონდეთ. ისიც შეიძლება, ასეთ დროს, სხვა მომწოდებელიც გაჩნდეს. ვიმეორებ, მთავარია ხარისხი იყოს კარგი და არ მოხდეს შეფერხება, _ გვითხრა ირაკლი სირაძემ.