ცნობილი გახდა რომ უკრაინაში შეჭრის გამო მსოფლიოს სპორტულმა სამყარომ რუსეთის პრეზიდენტი ვლადიმერ პუტინი საჯაროდ მოკვეთა.
გუშინ ძიუდოს საერთაშორისო ფედერაციამ ოფიციალური განცხადება გამოაქვეყნა, რომელიც ვლადიმერ პუტინის მიმართ სტატუსის შეჩერებას გულისხმობს:
„ძიუდოს საერთაშორისო ფედერაცია აცხადებს, რომ ბატონ ვლადიმერ პუტინს ფედერაციის საპატიო პრეზიდენტისა და ელჩის სტატუსი შეუჩერდა.“
ამის გარდა ცნობილი გახდა, რომ უკრაინაში საბრძოლო მოქმედებების გამო, მიმდინარე წლის 20-22 მაისს ყაზანში გასამართი ძიუდოს „გრანდ სლემი“ გაუქმდა.
მას მერე, რაც რუსეთმა უკრაინაში ომი დაიწყო, ბრიტანეთმა რუსეთს სანქციები დაუწესა. ლეიბორისტთა ლიდერმა კრის ბრაიანტმა მოითხოვა, რომ სანქციები უშუალოდ უნდა შეეხოს რომან აბრამოვიჩსაც, „ჩელსის“ ჩამორთმევის ჩათვლით. აბრამოვიჩი გამოუვალ მდგომარეობაში აღმოჩნდა.
გუშინ პუტინის „ძმაკაცმა და ახლობელმა“ შესაბამისი ნაბიჯი თავად გადადგა და კლუბის მართვა საქველმოქმედო ფონდს გადააბარა.
„20 წლის განმავლობაში, რაც ამ კლუბის მფლობელი ვარ, საკუთარ თავს განვიხილავდი, როგორც მის დამცველს. ჩემს ფუნქციად მივიჩნევდი, რომ ყველაფერი გამეღო იმისთვის, რომ „ჩელსი“ წარმატებული ყოფილიყო, როგორც დღეს არის. გადაწყვეტილებას ყოველთვის კლუბის ინტერესების მიხედვით ვიღებდი. ახლაც ამ პრინციპით ვმოქმედებ. სწორედ ამიტომ კლუბის ხელმძღვანელობას გადავცემ საქველმოქმედო ფონდ „ჩელსის“. დღეისათვის, ამ ორგანიზაციას ყველაზე მეტად შეუძლია იზრუნოს კლუბზე, ფეხბურთელებზე და პერსონალზე”, – განაცხადა რომან აბრამოვიჩმა.
ჭადრაკის საერთაშორისო ფედერაციის გადაწყვეტილებით, რუსეთს რიგით 44-ე საჭადრაკო ოლიმპიადის გამართვის უფლება ჩამოერთვა. მისი მასპინძლობა ინდოეთს სურს. საჭადრაკო ოლიმპიადა მოსკოვში 26 ივლისიდან 8 აგვისტოს ჩათვლით უნდა გამართულიყო და მასში 190 ქვეყნის გუნდს უნდა მიეღო მონაწილეობა, მაგრამ რუსეთის უკრაინაში შეჭრას აღნიშნული სანქცია მოჰყვა – ტურნირი რუსეთში აღარ გაიმართება.
აღსანიშნავია, რომ ფიდე-ს პრეზიდენტი არკადი დვორკოვიჩია, რუსი, რომელიც ამ ორგანიზაციის პრეზიდენტად 2018 წელს ბათუმში აირჩიეს. ის 2008-2012 წლებში რუსეთის პრეზიდენტის (ჯერ მედვედევის, შემდეგ პუტინის) თანაშემწედ მუშაობდა.
აქვე დავამატებთ რომ ორი დღის წინ სროლის საერთაშორისო ფედერაციამ რუსეთს ევროპის ჩემპიონატი ჩამოართვა, არადა, ამ ორგანიზაციაშიც პრეზიდენტი რუსია. სროლის საერთაშორისო ფედერაციის პრეზიდენტმა ვლადიმირ ლისინმა პირდაპირ განაცხადა, რომ რუსეთში ბევრი სპორტსმენი არ აპირებდა ჩასვლას უკრაინაში განვითარებული მოვლენების გამო.
გავაგრძელოთ საჭადრაკო თემა. რუსმა მოჭადრაკემ, 27 წლის დიდოსტატმა ვიაჩესლავ ტილიჩეევმა რუსული დროშის ქვეშ აპარეზობაზე უარი განაცხადა.
„ვფიქრობ, უკვე შეუძლებელი და შეუფერებელია, რომ ამის შემდეგ რუსეთის ფედერაციას რომელიმე ტურნირზე წარმოვადგენდე. უკვე გავაგზავნე მოთხოვნა ფიდე-ში და ბულგარეთის ჭადრაკის ფედერაციაში, რომ ან ქვეყანა შევიცვალო, ან ნეიტრალური დროშის ქვეშ ვიასპარეზო. სანამ ეს არ მოხდება, არცერთ ტურნირზე არ ვითამაშებ. ვფიქრობ, ფიდე-მ უნდა მიიღოს ზომები, რათა ასეთი ტრანსფერები შესაძლებელი გახდეს მათთვის, ვისაც არ შეუძლიათ იმის იგნორირება, რაც ხდება. პასუხს ველოდები,” – განაცხადა ვიაჩესლავ ტილიჩეევმა.
ჩეხეთის საფეხბურთო ნაკრები შეუერთდა პოლონეთსა და შვედეთს და მარტში მსოფლიოს 2022 წლის ჩემპიონატის ფლეი ოფში რუსეთთან თამაშზე უარი განაცხადა.
„ჩეხეთის საფეხბურთო ასოციაციის აღმასრულებელმა კომიტეტმა ერთხმად დაუჭირა მხარი გადაწყვეტილებას, რომ ჩეხეთის ნაკრები არცერთ შემთხვევაში არ ითამაშებს რუსეთთან მსოფლიოს 2022 წლის ჩემპიონატის საპლეოფო მატჩში“.
მსოფლიოს 2022 წლის ჩემპიონატის საკვალიფიკაციო ფლეი ოფის ნახევარფინალურ მატჩში რუსეთს პოლონეთთან მოსკოვში უნდა ეთამაშა, ამ მატჩში გამარჯვებული კი ხუთი დღის შემდეგ ფინალში ჩეხეთი-შვედეთის წყვილში მოგებულს უნდა შეხვედროდა. ახლა, სიტუაცია სრულიად შეცვლილია.
ყატარის მუნდიალის საკვალიფიკაციო მატჩებთან დაკავშირებით, ფიფას გადაწყვეტილება ჯერჯერობით არ მიუღია.
ცნობილმა ბრიტანელმა მრბოლელმა – ლუის ჰემილტონმა უკრაინელებს ინსტაგრამით მიმართა და ომში მხარდაჭერა გამოუცხადა.
„როდესაც უსამართლობას ვხედავთ, მნიშვნელოვანია, რომ მას შევებრძოლოთ. მთელი გულით ვუჭერ მხარს მამაც უკრაინელებს, რომლებიც ასეთი მწარე რეალობის წინაში დადგნენ და საკუთარი მომავლისთვის იბრძვიან. ასევე მინდა მხარდაჭერა გამოვუცხადო რუსეთის მოქალაქეებს, რომლებიც მთელი ქვეყნის მასშტაბით ომის დაწყებას აპროტესტებენ და მშვიდობა სურთ.“
[sexy_author_bio]
