რუსეთის პრეზიდენტმა ვლადიმერ პუტინმა ხელი მოაწერა კანონს, რომელიც კრძალავს რუსებისა და უცხოელებისთვის სამხედრო სამსახურში გაწევრიანების ზედა ზღვარს. ამის შესახებ CNN რუსულ მედიაზე დაყრდნობით წერს.
რუსეთის სახელმწიფო დუმამ კანონპროექტი ოთხშაბათს მიიღო, მაგრამ პუტინის ხელმოწერა იყო საჭირო იმისათვის, რომ კანონად იქცეს.
მანამდე, 18-დან 40 წლამდე მოქალაქეებს და 18-დან 30 წლამდე უცხოელებს შეეძლოთ რუსეთის სამხედრო სამსახურში გაწევრიანება. ახალი კანონი ზედა ზღვარს საერთოდ აუქმებს.
რუსული გამოცემა TASS-ის ცნობით, მათ მიაჩნიათ, რომ ასაკობრივი ზღვრის გაუქმება მოიზიდავს სპეციალისტებს ისეთ სფეროებში, როგორიცაა სამედიცინო დახმარება, ინჟინერია და კომუნიკაციები.
კანონპროექტის განმარტებით ბარათში, ასევე აღნიშნულია, რომ ასაკობრივი შეზღუდვის მოხსნა ჯარში მეტი პროფესიონალის მოზიდვას შეუწყობს ხელს, რომლებიც 40-45 წლის ასაკში მაღალი სიზუსტის იარაღთან მუშაობის აუცილებელ გამოცდილებას მიიღებენ.
“სენატორებს აინტერესებთ, რა ასაკამდე შევძლებთ სამხედრო სამსახურში რუსეთის ფედერაციის მოქალაქეებისა და უცხო ქვეყნის მოქალაქეების წაყვანას კონტრაქტით. შესაძლებელია, გადაჭრით ვუპასუხოთ – 50-წლამდე”, – თქვა რუსეთის თავდაცვის მინისტრმა, ნიკოლაი პანკოვმა.
მისივე თქმით, ახლადმიღებული კანონი არმიის მძღოლებზე, საპარაშუტო-სადესანტო ძალების მედიკოსებსა და მზარეულებზეც გავრცელდება.
კანონპროექტის ავტორები სახელმწიფო სათათბიროს თავდაცვის კომიტეტის ხელმძღვანელი, ანდრეი კარტაპოლოვი და მისი პირველი მოადგილე, ანდრეი კრასოვი არიან. კარტაპოლოვი 2016 წლის დეკემბრიდან 2017 წლის მარტამდე სირიაში რუსულ ჯარებს მეთაურობდა. კრასოვმა რუსეთის გმირის წოდება 2008 წელს რუსეთ-საქართველოს კონფლიქტში მონაწილეობისთვის მიიღო, სადაც ერთ-ერთი ბატალიონის ტაქტიკურ ჯგუფს ხელმძღვანელობდა.
CNN აღნიშნავს, რომ კანონში ცვლილებები ხდება, უკრაინაში რუსეთის სამხედროების სერიოზული მსხვერპლის ფონზე, სადაც მოსკოვი აწარმოებს იმას, რასაც ის ევფემისტურად უწოდებს “სპეციალურ სამხედრო ოპერაციას”.
კრემლმა თავდაპირველად განაცხადა, რომ გაწვეულები არ იმსახურებდნენ უკრაინაში, მაგრამ შემდგომში აღიარეს, რომ ისინი საბრძოლო მოქმედებებს ასრულებდნენ.
ავტორი
