„ქართული ოცნების“ 87 დეპუტატიდან 41-ს კავშირი აქვს ბიზნესთან”, – ამის შესახებ ნათქვამია კვლევაში, რომელსაც არასამთავრობო ორგანიზაცია „საერთაშორისო გამჭვირვალობა-საქართველო“ აქვეყნებს.
ორგანიზაციის განმარტებით, კვლევაში არსებული მონაცემები არის 2025 წლის 24 ოქტომბრის მდგომარეობით და მოიცავს იმ დეპუტატების მონაცემებს (87 დეპუტატი), რომლებიც იმ დროისათვის მონაწილეობდნენ პარლამენტის საქმიანობაში.
კვლევაში განხილულია პარლამენტის წევრების ბიზნეს კავშირები (წილები კომპანიებში), გამარტივებულ შესყიდვებსა და ტენდერებში დეპუტატების კომპანიების მონაწილეობა, წინასაარჩევნოდ დეპუტატების მიერ განხორციელებული პოლიტიკური დონაციები. მათ შორის კვლევის თანახმად, 87 დეპუტატიდან 41 კავშირი აქვს ბიზნესთან, აქედან შემოსავლის შესახებ დეკლარაციაში უთითებს 17.
„2025 წლის 24 ოქტომბრის მდგომარეობით, ბოლოს წარდგენილი დეკლარაციების შესაბამისად, ბიზნესებიდან მილიონი ლარი და მეტი შემოსავალი მიღებული აქვთ შემდეგ დეპუტატებს:
- ანტონ ობოლაშვილი – 4 860 828, 41 ლარი;
- ბერეკაშვილი შოთა 4 712 134, 18 ლარი;
- ჭყონია გიორგი – 4 373 744, 02 ლარი;
- ზაალ დუგლაძე – 1 470 979, 19 ლარი;
- ბარვენაშვილი გიორგი – 1 033 008, 48 ლარი;
- ლაშა ტალახაძე – 680 000 USD (დეკლარაციაში თანხა დოლარში აქვს მითითებული).
ამავე ანგარიშის მიხედვით, ყველაზე მეტ კომპანიაში წილი აქვს ვასილ ჩიგოგიძეს (21 კომპანია). 5 -ზე მეტი კომპანიის მეწილეები კი შემდეგი დეპუტატები არიან:
- ვასილ ჩიგოგიძე – 21;
- გიორგი ჭყონია – 20;
- გიორგი ბარვენაშვილი – 11;
- ბეჟან წაქაძე – 8;
- ზაალ დუგლაძე 7;
- გიორგი ხახუბია – 6;
- ირაკლი კირცხალია – 6.
რაც შეეხება სახელმწიფო შესყიდვებში მონაწილეობას, იმ კომპანიებმა, რომლებშიც მოქმედი ოცნების დეპუტატები ფლობენ წილს, გამარტივებულ შესყიდვებში მონაწილეობით სახელმწიფოსგან მიიღეს 7 736 986 ლარი; ხოლო იმ კომპანიებმა, რომლებშიც მოქმედი ოცნების დეპუტატები ფლობენ წილს, ტენდერების მოგების შემდეგ მიიღეს 465 900 569 ლარი,“ -ვკითხულობთ „საერთაშორისო გამჭვირვალობა-საქართველოს“ კვლევაში.
წყარო: bpn.ge
