გუშინ პეკინის ზამთრის 24-ე ოლიმპიურ თამაშებზე სამთო მოთხილამურე სოსო ჯაფარიძე ასპარეზობდა. სლალომში პირველი დაშვებისას მან ტრასა წუთსა და 02.02 წამში დაფარა და 41-ე იყო, მეორე ცდაზე შედეგი გააუმჯობესა და 55.87 წამით 30-ე ადგილზე გავიდა, რამაც მას საბოლოოდ (1.57.89) 32-ე ადგილი მოუტანა. მედლებისთვის ბრძოლაში 90 სპორტსმენი ჩაება. მათგან ჩათვლა მხოლოდ 45-მა მიიღო.
საქართველოს ეროვნული გუნდისა და მოსკოვის „ცსკას“ თავდამსხმელი თორნიკე შენგელია 20 თებერვლისთვის ემზადება. ამ დღეს მოსკოვში „VTB“ ლიგის „ყველა ვარსკვლავის მატჩი“ გაიმართება სადაც მონაწილეობას თორნიკე შენგელიაც მიიღებს. მოთამაშეებს ისეთი მაისურების ჩაცმის უფლება მისცეს, სადაც მეტსახელებსაც გამოიყენებენ.
საქართველოს ნაკრების კაპიტანს, რომელიც უცხოელთა სასტარტო ხუთეულშია, ზურგზე GEO SOUL („ქართული სული“) ეწერება.
გუშინ დოჰაში მიმდინარე ჩოგბურთელთა ტურნირზე პირველი წრის შეხვედრა ჩაატარა ნიკოლოზ ბასილაშვილმა.
მესამე ნომრად განთესილი ბასილაშვილი პირველ წრეში თავისუფალი იყო, მეორე წრეში კი შვედ ელიას იმერს ორ საათსა და 3 წუთში 6:4, 7:5 სძლია.
საქართველოს პირველმა ჩოგანმა წელს ზედიზედ ექვსი წაგების შემდეგ პირველი გამარჯვება მოიპოვა.
ნიკოლოზი მეოთხედფინალში უნგრელ მარტონ ფუჩოვიჩს (36) დაუპირისპირდება, რომელმაც სამხრეთ კორეელი კვონ სუნ-ვუ (55) სამ სეტში დაამარცხა.
შოთა არველაძის „ჰალ სიტიმ“ ზედიზედ 3 მარცხის შემდეგ ქულის მოპოვება მოახერხა. ინგლისური გუნდი ჩემპიონშიპის 25-ე ტურის გამოტოვებულ შეხვედრაში სტუმრად „შეფილდ იუნაიტედს“ უგოლოდ დაუზავდა და წაგებების სერია შეწყვიტა.
48 წლის ქართველმა სპეციალისტმა თამაში შეაფასა და თავისი გუნდი შეაქო.
„ძალიან კმაყოფილი ვარ ასეთ რთულ თამაშში ქულის მოპოვებით სტადიონზე, სადაც თამაში ძალიან რთულია. ბოლო შეხვედრაში „ფულემთან“ კარგად ვითამაშეთ და ახლაც ძალიან მძიმე მეტოქეს დავუპირისპირდით. „შეფილდ იუნაიტედის“ ფეხბურთელები დიდი ხანია ერთად არიან, ერთმანეთს ძალიან კარგად იცნობენ, სწრაფად თამაშობენ და დაცვის უკან ბევრ სივრცეს ქმნიან. ადვილი არ იყო ამ შეხვედრაში თავის დაცვა“. – განაცხადა შოთა არველაძემ.
„ჰალ სიტის“ 33 ქულა აქვს და სატურნირო ცხრილში მე-20 ადგილზეა, თუმცა, გასავარდნ ზონას ამ დროისთვის 13 ქულითაა დაცილებული.
ესპანურ მასმედიაში „ვალენსიას“ კარის დარაჯი გიორგი მამარდაშვილის შესახებ ახალი ინფორმაციები გავრცელდა.
გამოცემამ „Eldesmarque“ „ვალენსიას“ საზაფხულო სატრანსფერო ფანჯარას სპეციალური წერილი მიუძღვნა და აღნიშნა, რომ მიმდინარე წლის ზაფხულში კლუბს რიგი მნიშვნელოვანი გადაწყვეტილებების მიღება მართებს.
„მოუკარ დიაჰაბის, იასპერ სილესენსა და ხაუმე დომენეკს კონტრაქტები 2023 წელს უმთავრდებათ. ამიტომ მათ მიმართ გადაწყვეტილება უკვე ახლავეა მისაღები. ზაფხულში ისინი ან გაახანგრძლივებენ ხელშეკრულებებს, ან წასვლა მოუწევთ, რადგან წინააღმდეგ შემთხვევაში, კლუბი ერთ ევროსაც ვერ მიიღებს.
აქ მწვრთნელის სიტყვა გადამწყვეტი იქნება. ხოსე ბორდალასმა და კლუბმა უნდა გადაწყვიტონ, არჩევანი მათზე გააკეთონ თუ საინტერესო წინადადებების მიღების შემთხვევაში გაასხვისონ. ამ შემთხვევაში შანსი გიორგი მამარდაშვილსა და კრისტიან რივეროს მიეცემათ. ეს საკითხი ცენტრალური და ყველაზე რთულია – ქართველი მეორე გუნდში სათამაშოდ ჩამოიყვანეს, მისი კონტრაქტი მხოლოდ ნახევარ მილიონ ევროდ გამოისყიდეს, ძალიან დაბალი ხელფასი აქვს და შესაძლოა, მომავალ 4 სეზონში გუნდის ძირითადი გოლკიპერი გახდეს”.
გამოცემა „superdeporte“ იტყობინება, რომ 32 წლის ნიდერლანდელმა კარის დარაჯმა იესპერ სილესენმა მიმდინარე კვირის სამშაბათ დილით კუნთში სისხლის შედედების გამო სასწრაფო ოპერაცია გაიკეთა. რასაკვირველია, ეს გიორგი მამარდაშვილის თამაშის შანსს მნიშვნელოვნად ზრდის.
გამოცემა „Marca” ვარაუდობს, რომ „ბარსელონასთან“, 20 თებერვალს დანიშნულ შეხვედრაში „ვალენსიას“ კარს გიორგი მამარდაშვილი დაიცავს.
ანალოგიურ ინფორმაციას ავრცელებს გამოცემაც „msn“, რომელიც ამტკიცებს რომ ფეხზე გაკეთებული მცირე ოპერაციის გამო „ვალენსიას“ მეკარე იასპერ სილესენს მინიმუმ ერთი თვე გაუცდება და ამ პერიოდში ქართველი გიორგი მამარდაშვილი ითამაშებს.
გამოცემა წერს, რომ „ვალენსიას“ ნომერი პირველი მეკარე იესპერ სილესენია, ხოლო მამარდაშვილმა ხაუმე დომენეკს იერარქიულ საფეხურზე გაუსწრო.
თუ გიორგიმ კარგად ითამაშა და რაიმე გაუთვალისწინებელი არ მოხდა, რაც იმედია არ მოხდება, უახლოეს 6 მატჩში „ვალენსიას“ კარს ის დაიცავს.
გუშინ ჩემპიონთა ლიგის მერვედფინალური სტადიის ორი შეხვედრა გაიმართა.
„ზალცბურგი“ – „ბაიერნი“ 1:1
„ინტერი“ – „ლივერპული“ 0:2
[sexy_author_bio]
