დღეს საქართველოს საფეხბურთო პირველობის მორიგი 30-ე ტურის შეხვედრები გაიმართება. ჩემპიონატის დასრულებამდე შვიდი ტურია დარჩენილი და პირველ ადგილზე მყოფი ბათუმის “დინამო” თბილისის “დინამოს” შვიდი ქულით უსწრებს. ლიდერები ერთმანეთს ბათუმში დაუპირისპირდებიან.
ორი “დინამოს” დღევანდელი პაექრობა მიმდინარე ჩემპიონატის ცენტრალური დაპირისპირებაა. მოიგებს კახი ცხადაძეს კრებული და პირველობის დასრულებამდე ექვსი ტურით ადრე ბათუმელებთან სხვაობას ოთხ ქულამდე შეამცირებს; იმარჯვებენ მასპინძლები და საქართველოს ჩემპიონის წოდებას ერთი ხელის გაწვდენაზე მიუახლოვდებიან.
გუშინ ცნობილი გახდა, რომ ქართულ “სუპერკლასიკოს” მაყურებელიც დაესწრება. საკოორდინაციო საბჭოს გადაწყვეტილებით, სტადიონის საერთო ტევადობის 33%-ზე დასწრება შესაძლებელი გახდა.
“დინამო” ბათუმისა და “დინამო” თბილისის შეხვედრა 18:30 საათზე დაიწყება. ტურის და სეზონის გამორჩეულ პაექრობას არა ქართველი, არამედ თურქი მსაჯები მოემსახურებიან. მთავარი არბიტრი ჰუსეინ გოჩეკი იქნება, მას ჯანდაშ ელბილი და მეჰმეთ ემირ თუღრალი დაეხმარებიან.
გუშინ ცნობილი გახდა, რომ საქართველოს ეროვნული საფეხბურთო ნაკრები მიმდინარე წლის ნოემბერში ამხანაგურ შეხვედრას გამართავს _ ვილი სანიოლის გუნდი 2021 წლის ბოლო მატჩში, საკუთარ მოედანზე, უზბეკეთის ეროვნულ ნაკრებს დაუპირისპირდება. შეხვედრა 15 ნოემბერს, 18:00 საათზე დაიწყება.
უზბეკეთის ნაკრები ფიფას რეიტინგში ამ დროისთვის 84-ეა და 12 საფეხურით უსწრებს საქართველოს. გუნდს მომდინარე წლის აგვისტოდან ცნობილი სლოვენიელი სპეციალისტი სრეჩკო კატანეცი წვრთნის.
გუშინ ნიდერლანდების ქალაქ ზეისტში ფუტსალის “ევრო 2022”-ის ჯგუფური ეტაპის წილისყრა გაიმართა და საქართველოს ნაკრების მეტოქეები გაირკვა.
საქართველოს ეროვნული გუნდი ევროპის ჩემპიონატის დებიუტანტია და წილისყრის წინ ბოლო _ მე-4 კალათაში მოხვდა, მასპინძელ ნიდერლანდებთან, ფინეთთან და სლოვაკეთთან ერთად. ამგვარად, ამ გუნდების ერთ ჯგუფში მოხვედრა თავიდანვე გამოირიცხა.
წილისყრის შედეგად, საქართველოს ნაკრები D ჯგუფში აღმოჩნდა, სადაც მისი მეტოქეები ბოსნიის, აზერბაიჯანისა და ესპანეთის ნაკრებები იქნებიან.
რუსული სპორტული მასმედიის მტკიცებით ამ ქვეყნის “პრემიერ ლიგის” “TOP 5” დრიბლიორში ორი ქართველი ლეგიონერია: ხვიჩა კვარაცხელია და ზურიკო დავითაშვილი. მართალია, ხვიჩას კარიერის საუკეთესო დროება არ უდგას, თუმცა, ის მოედანზე მაინც ერთ-ერთი გამორჩეულია.
გუშინ აშშ-ში ეროვნული საკალათბურთო ასოციაციის (NBA) მორიგი პირველობა დაიწყო. მიმდინარე სეზონში უპირველეს ამერიკულ საკალათბურთო ლიგაში ორი ქართველი მოთამაშე გვეყოლება _ გოგა ბითაძე (“ინდიანა პეისერსი”) და სანდრო მამუკელაშვილი (“მილუოკი ბაქსი”).
გუშინ NBA-ს ექსპერტმა ჯიმ ოვჩარსკიმ სანდრო მამუკელაშვილის შესახებ საკუთარი მოსაზრება გამოთქვა.
“სანდრო მამუკელაშვილს ძლიერი წინასასეზონო ტურნირი გამოუვიდა. სეზონის დაწყებასთან ერთად ის “მილუოკის” განაცხადშია, ასევე, ითამაშებს G ლიგაში “ბაქსის” სარეზერვო გუნდ “ვისკონსინ ჰერდში”. მაგრამ როგორია მისი პერსპექტივა დიდ კლუბში ამ სეზონში?
ის “მილუოკის” კარგად ერგება ათლეტური თვალსაზრისით. “ბაქსს” სურს ისეთი მოთამაშეები, რომელთაც მოედნის ნებისმიერ წერტილში ნახავთ. სანდრო მაღალია, მაგრამ კარგად ისვრის 3-ქულიანებს, შეუძლია ფარქვეშ შესვლები. კლუბში ასეთი სტილის მოთამაშეების მოთხოვნილებაა.
ახალბედაა, მაგრამ მწვრთნელი მას სროლებში არ ზღუდავს. თან, სანდრო გუნდური მოთამაშეა და მწვრთნელის დარიგებებს ყოველთვის ასრულებს. ის ამ მხრივ კარგად ეწყობა “ბაქსს”.
დარწმუნებული ვარ რომ სანდრო არასტანდარტული კონტრაქტის მიუხედავად, სათამაშო დროს მიიღებს. მას აუცილებლად ვნახავთ “მილუოკის” ფორმით მოედანზე. ძალიან ბევრს აქვს სურვილი, რომ “მამუ” იხილოს ბრძოლისთვის მზადყოფნაში. ჩემი აზრით, ძალიან მალე სანდრო სტანდარტულ კონტრაქტსაც დაიმსახურებს”.
გუშინ ჩემპიონთა ლიგის ჯგუფური ეტაპის მესამე ტურის შეხვედრები გაიმართა.
A ჯგუფი: “ბრიუგე” _ “მანჩესტერ სიტი” 1:5, “პარი სენ-ჟერმენი” _ “ლაიპციგი” 3:2;
B ჯგუფი: “ატლეტიკო” (მადრიდი) _ “ლივერპული” 2:3, “პორტო” _ “მილანი” 1:0;
C ჯგუფი: “ბეშიქთაში” _ “სპორტინგი” 1:3, “აიაქსი” _ “ბორუსია” (დორტმუნდი) 4:0;
D ჯგუფი: “ინტერი” _ “შერიფი” 3:1, “შახტარი” _ “რეალი” (მადრიდი) 0:5.
[sexy_author_bio]
