,,ქართველი ოლიგარქის გადაწყვეტილებით, მთელი მსოფლიოს თვალწინ საქართველოს ყოფილი პრეზიდენტი იღუპება და ამას არავინ უნდა შეეგუოს“, – ამის შესახებ პოლონეთის პარლამენტის თავმჯდომარის მოადგილემ, მალგოჟატა გოშევსკამ პრეზიდენტ სალომე ზურაბიშვილის ინიციატივით, თბილისში გამართულ ქალთა საერთაშორისო კონფერენციაზე განაცხადა.
მისი თქმით, ბრალდებები საქართველოს მესამე პრეზიდენტის წინააღმდეგ აბსურდულია და რომ არცერთი ევროპული სასამართლო არ დაიწყებდა ამ საქმეების წარმოებასა და განხილვას.
“საქართველოს ციხეში, ახლა საავადმყოფოში, რთულ მდგომარეობაში იმყოფება საქართველოს ყოფილი პრეზიდენტი, მიხეილ სააკაშვილი. ეს როგორც ჩანს პირველი შემთხვევაა ევროპაში მეორე მსოფლიო ომის შემდეგ, რომ პრეზიდენტი გასამართლებულია მისივე ქვეყნის სასამართლოს მიერ. ბრალდებები მის წინააღმდეგ არის აბსურდული. არცერთი ევროპული სასამართლო არ დაიწყებდა საქმის წარმოებასა და განხილვას, მაგრამ ახალა არ ვისაუბრებ ბრალდებებზე, უფრო მეტად ადამიანურობაზე გავამახვილებ ყურადღებას. საქართველოს მთავრობის მიერ უარი ეთქვა ექიმთა საერთაშორისო ჯგუფს, რომ ჩაეტარებინათ ყოფილი პრეზიდენტის სამედიცინო კვლევა, ასევე მისთვის შეუძლებელია ჰუმანიტარულ ფარგლებში მიიღოს შესაბამისი მკურნალობის კურსი საზღვარგარეთ. ეს ბარბაროსობაა, რასაც არაფერი საერთო არ აქვს ევროპულ ღირებულებებთან. ძვირფასო ქალბატონებო და ბატონებო, ერთი ქართველი ოლიგარქის გადაწყვეტილებით, მთელი მსოფლიოს თვალწინ იღუპება ადამიანი, ამ ქვეყნის ყოფილი პრეზიდენტი, არ შევეგუოთ ამას”, –განაცხადა გოშევსკამ სიტყვით გამოსვლისას.
მან, ასევე რუსეთიდან დევნილი ბლოგერის, ინსა ოგუზის საქართველოში არშემოშვების გამო, საქართველოს ხელისუფლება გააკრიტიკა.
ცნობისთვის, ბლოგერი რამდენიმე დღეა, ლარსის გამშვებ პუნქტზეა გაჩერებული და ამბობს, რომ რუსეთში დაბრუნების შემთხვევაში, მის სიცოცხლეს საფრთხე დაემუქრება. ბლოგერს რუსეთის მთავრობა ტერორისტულ ორგანიზაციასთან კავშირს ედავება.
