გუშინ ცნობილი გახდა რომ რუსეთში მოასპარეზე ქართველმა ფეხბურთელებმა ქვეყნის დატოვება დაიწყეს. ლუკა გაგნიძემ და ლუკა წულუკიძემ პუტინის ქვეყანას უკვე უგანეს და კარიერას ევროპაში გააგრძელებენ. ინფორმაცია ფეხბურთელების მენეჯერმა ოფიციალურად დაადასტურა.
„შემიძლია გითხრათ, რომ ლუკა წულუკიძე და ლუკა გაგნიძე რუსეთის ჩემპიონატს ტოვებენ და მინიმუმ ზაფხულამდე, კარიერას რომელიმე ევროპულ ლიგაში გააგრძელებენ, თუმცა ჯერ ქვეყანას ვერ დავასახელებ. ვფიქრობ, ეს ის ნაბიჯია, რომელიც უკრაინაში არსებული ვითარებიდან გამომდინარე უნდა გადაგვედგა, სოლიდარობას მოძმე ხალხის მიმართ ამ ქმედებით გამოვხატავთ“.
19 წლის ლუკა გაგნიძე მოსკოვის „დინამოს“ ეკუთვნის და „ურალში“ იჯარის წესით თამაშობდა, 18 წლის ლუკა წულუკიძე კი რუსულ კლუბს მიმდინარე წლის ზამთრის სატრანსფერო პერიოდში შეუერთდა და „ურალის“ რიგებში არცერთი შეხვედრა არ ჩაუტარებია.
საქართველოს მორაგბეთა ნაკრებმა ოფიციალურად მოიპოვა უფლება, იასპარეზოს მსოფლიოს თასზე, რომელიც 2023 წელს საფრანგეთში გაიმართება.
რუსეთის ნაკრებს, რომელიც რაგბი ევროპამ ტურნირიდან მოხსნა, ყველა დარჩენილ მატჩში ჩაეთვალა წაგება 0:28, რამაც „ბორჯღალოსნებს“ გზა გაუხსნა მეექვსედ მიიღოს მონაწილეობა მსოფლიო სარაგბო ფორუმში!
უკრაინაში კი რუსეთის ოკუპაცია გრძელდება.
ცნობილი გახდა რომ უკრაინის ნაკრების ყოფილი მცველი, 36 წლის არტიომ ფედეცკი ქალაქ ლუცკის თავდაცვის წევრი გახდა და განაცხადა, რომ დასავლეთ უკრაინაში შეჭრის შემთხვევაში, რუს ოკუპანტებს არ დაინდობს.
„მეც მქონდა სადმე წასვლის საშუალება, მაგრამ ცხოვრებაში ასე არასოდეს მოვიქცეოდი. ამიტომ მზად ვარ აქ ბოლომდე ვიდგე. მზად ვარ ჩვენი მიწა დავიცვა. თუ საჭირო იქნა სროლა – ვისვრით. თუ მოსკალები აქ შემოიჭრებიან, იგრძნობენ, თუ რა არის დასავლეთ უკრაინაში პარტიზანული მოძრაობა. იქ მათ ბიჭები წვავენ, ჩვენ კი აქ ღორებივით დავკლავთ. ეს ასე იქნება“.
უკრაინის ნაკრებისა და კიევის „დინამოს“ლეგენდარულმა მეკარე ოლეკსანდრ შოვკოვსკიმ სოციალურ ქსელში მორიგი მიმართა გაავრცელა:
„რუსო! მესმის, რომ ამას ტვინი სჭირდება, თუმცა, მაინც შეეცადე გაიგო! არ ეკითხები საკუთარ თავს, რა გვემართება? რისთვისაა ეს სანქციები? რატომ გვტოვებენ მსოფლიო ბრენდები? რატომ მიდიან ბანკები? რატომ გვიუქმებენ ვიზებს? რატომ დაეცა კურსი და ეს ყველაფერი კიდევ არაა? რატომ გარიყეს რუსული სპორტი? რატომ ეზიზღებით მთელს მსოფლიოში? რატომ უნდა იტანჯოთ თქვენი ხელისუფლების გამო? რატომ კლავენ თქვენი ჯარისკაცები ჩვენს ბავშვებსა და მშობლებს? რატომ ესვრიან უდანაშაულო ხალხს, რომლებიც ცდილობენ თავს მოხვეულ „რუსულ სამყაროს“ გაექცნენ? რატომ გარბიან უკრაინელები დასავლეთისკენ ისე, რომ ყველაფერს ტოვებენ? რა გააკეთეს მათ არასწორი?
მე გიპასუხებთ. სწორედ შენ აირჩიე ეს დამნაშავე ხელისუფლება. შენ მიეცი მათ საშუალება, რომ ქვეყანაში ყველა პროცესი ეკონტროლებინა. ამიტომაც, მათ ქმედებებზე პასუხისმგებლობა შენც გეკისრება. თუკი იარაღს დავყრით, ჩვენი ქვეყანა არსებობას შეწყვეტს, ხოლო თუკი იარაღს თქვენ დაყრით, ჩვენს სამშობლოში მშვიდობა დაისადგურებს! დიდება უკრაინას, დიდება ნაციას, დიდება შეიარაღებულ ძალებს, დიდება უკრაინელებს“.
მსოფლიოს ყოფილმა ჩემპიონმა კრივში, უკრაინელმა ვლადიმირ კლიჩკომ, ქალაქ მარიუპოლში, სამშობიარო სახლზე რუსი ოკუპანტების მიერ განხორციელებული ავიაიერიშის შემდეგ, ვიდეომიმართვა მთელი მსოფლიოსადმი გაავრცელა.
„გული გახეთქვაზე მაქვს. ახლა ბავშვები იღუპებიან! შეხედეთ ამ ფოტოსურათებს! ეს კონკრეტული და რეალური შედეგია ე.წ. პუტინის სპეციალური ოპერაციის. როდესაც ის ამ ანგელოზებს ვერ კლავს, კლავს მათ მშობლებს, პაპა-ბებიებს, ანადგურებს მათ სახლებს, სკოლებს. თავდასხმა ბავშვებზე ნიშნავს სიცოცხლეზე, ცივილიზაციაზე თავდასხმას. თუკი ამ ფოტოსურათების ნახვა არ გსურთ, დრო არ უნდა დაკარგოთ“.
უკრაინის ძიუდოს ნაკრების ახალგაზრდა ვარსკვლავი დარია ბილოდიდი რუსული არმიის მიერ მარიუპოლში სამშობიარო სახლის დაბომბვას გამოეხმაურა. 21 წლის უკრაინელმა სპორტსმენმა პოსტი სოციალურ ქსელში განათავსა:
„რუსულმა არმიამ სამშობირო სახლი დაბომბა. მეზიზღებით, რუსო ოკუპანტებო! გისურვებთ ყველა ის ტკივილი გადაიტანოთ, რომელსაც ახლა ჩვენ ვგრძნობთ. ცხოველებო, უკვე სიძულვილი მავსებს. მეზიზღებით და ყოველთვის ასე იქნება. საძაგელო „გამათავისუფლებლებო!“.
ინგლისური „მანჩესტერ სიტის“ მთავარმა მწვრთნელმა ხოსეპ გვარდიოლამ უკრაინაში მიმდინარე ომს ემოციური შეფასება მისცა და მსოფლიო თანამეგობრობას მოუწოდა, რუსულ აგრესიას წინ უფრო დიდი ძალით აღუდგნენ.
„მსოფლიო დრამა შემდეგში მდგომარეობს: ქვეყანა ინგრევა იმიტომ, რომ ერთმა ადამიანმა გადაწყვიტა უდანაშაულო ადამიანები გაანადგუროს. ხალხი ფეხზე დგას, მსოფლიოს მთავრობები კი, რომელთაც გადაწყვეტილებები უნდა მიიღონ, ჩუმად არიან. თუკი ასე ხდება, აღარ იქნება აღარც პოლიტიკა, აღარც ეკონომიკა და აღარც არაფერი.
სად არის ნატო? სად არის აშშ? სად არის ევროკავშირი? სამშვიდობო გამოსავლის გამონახვა უკვე გვიანი სჩანს. ეს ყველა პოლიტიკური ორგანიზაციის კრახია. წესით, ისინი იმიტომ უნდა არსებობდნენ, რომ ყველამ უკეთ ვიცხოვროთ, რეალობაში კი, ეს, დიდი ჩავარდნაა“.
[sexy_author_bio]
