ოზურგეთში გრიპის და კოვიდინფიცირების შემთხვევების მატება ფიქსირდება. ამის შესახებ “გურია ნიუსთან” ოზურგეთის საზოგადოებრივი ჯანდაცვის ცენტრის ეპიდემიოლოგი, ელზა სიმონიშვილი საუბრობს.
“სეზონური გრიპის პერიოდში და აგრეთვე სადღესასწაულო დღეების შემდგომ, განსაკუთრებით საყურადღებოა ჰაერ-წვეთოვანი გზით გადამდები დაავადებების პრევენცია და დროული დიაგნოსტირება, რადგანაც ქვეყნის მასშტაბით ისევ ფიქსირდება სეზონური გრიპის შემთხვევათა მატება.
ახალი წლის შემდგომ გვაქვს ისევ მომატებული სტატისტიკა. მაღალი მაჩვენებელი დაფიქსირდა მე-3 კვირაზე. გრიპის შემთხვევები, ისევე, როგორც წლის ბოლოს, ამჟამადაც გადანაწილებული გახლავთ სხვადასხვა ასაკობრივ ჯგუფში. ხოლო საფრთხის შემცველი რისკ-ჯგუფებად, ისევ რჩება მცირე ასაკის ბავშვები, ორსულები, ხანდაზმული პირები, სხვადასხვა ქრონიკული დაავადების მქონე პაციენტები”,_ ამბობს სიმონიშვილი.
ეპიდემიოლოგი გრიპის ახალი შემთხვევების და კორონავირუსის სიმპტომებზეც ამახვილებს ყურადღებას.
“სეზონური გრიპის ახალი შემთხვევები მიმდინარეობს იგივე სიმპტომატიკით, ანუ:ტემპერატურის მკვეთრი მატებით, ყელის, თავის, სახსრების ტკივილით, გამოხატული საერთო სისუსტითა და ინტოქსიკაციის ზოგადი ნიშნებით. რაც შეეხება კორონავირუსის/ომიკრონის /შტამის შემთხვევებს, რომელიც დღეს ჩვენში ცირკულირებს, ახალი წლის შემდეგ ისევ დაფიქსირდა მატება. როგორც არაერთხელ აღვნიშნე, ამ დაავადებებს თავდაპირველი სიმპტომატიკა მსგავსი აქვთ, ამიტომ შემდგომი გართულებების თავიდან ასაცილებლად საჭიროა ტესტირება კორონავირუსზე, რაც ჩვენს მუნიციპალიტეტში მიმდინარეობს საზ. ჯანდაცვის ცენტრსა და სხვა ტესტირების პუნქტებში უფასოდ. სწორი და დროული დიაგნოსტირებით შევძლებთ შემდგომი გართულებების თავიდან აცილებას, ადეკვატურ ანტივირუსულ და საჭიროების შემთხვევაში ანტიბაქტერიულ მკურნალობას, შესაბამისი პრეპარატებით”,_ ამბობს სიმონიშვილი.
ეპიდემიოლოგის თქმით, დღეისათვის სეზონურ გრიპთან და კორონავირუსთან ბრძოლის ყველაზე ეფექტურ ღონისძიებებს მიეკუთვნება პრევენციული ღონისძიებების დაცვა და ვაქცინაცია, რომელიც შემოდგომიდან დაიწყო–ფრანგული წარმოების ოთხ კომპონენტიანი ვაქცინით. ხოლო პრევენციულ-პროფილაქტიკურ ღონისძიებებში იგულისხმება დისტანცირება, პირადი დაცვის საშუალებათა გამოყენება, ნებისმიერი მწვავე რესპირატორული სიმპტომის გამოვლენისთანავე იზოლირება, სიმპტომებზე დაკვირვება, ოჯახის ექიმის საქმის კურსში ჩაყენება.
გარდა ამისა, ელზა სიმონიშვილი აღნიშნავს, რომ ზემოთ ჩამოთვლილი ვირუსული ინფექციების პარალელურად ბავშვთა ასაკობრივ ჯგუფებში ისევ ფიქსირდება ქუნთრუშასა და ჩუტყვავილას შემთხვევები.
“განსაკუთრებით მინდა გავუსვა ხაზი იმ ფაქტს, რომ ეს გახლავთ განსხვავებული ინფექციური დაავადებები, – ვირუსული და ბაქტერიული წარმოშობისაა და მართალია, გადადების გზები აქვთ მსგავსი, ანუ ჰაერ-წვეთოვანი, კონტაქტური, – ისინი გახლავთ სხვადასხვა დაავადებები, განსხვავებული ინკუბაციური პერიოდებით და შესაბამისად, დაავადებული ბავშვების დაშვებას ბავშვთა კოლექტივებში განსაზღვრავს მკურნალი ექიმი.
მინდა მივმართო ბავშვთა დაწესებულებების პედაგოგიურ პერსონალსა და სამედიცინო პერსონალს, აგრეთვე მშობლებს, რომ განსაკუთრებული ყურადღება მიაქციონ დამახასიათებელი სიმპტომების გამოვლენას, რადგანაც ტიპური გამონაყრის დაწყებამდე დამახასიათებელია მწვავე დასაწყისი, ყურადღება მიაქციონ აგრეთვე დაავადებულ სხვა ბავშვებთან კონტაქტის შემთხვევებს, აღნიშნულის შესახებ აუცილებლად აცნობონ ბავშვთა დაწესებულებებს, განახორციელონ დროული ვიზიტი ოჯახის ექიმთან და არავითარ შემთხვევაში არ დაუშვან თვითმკურნალობა, რადგან შეიძლება ასეთ დროს წაიშალოს კონკრეტული ინფექციისათვის დამახასიათებელი სიმპტომატიკა, ხოლო ბავშვი იყოს ინფექციის გამავრცელებელი. გთხოვთ გაითვალისწინოთ ზემოთ აღნიშნული რჩევები, რითაც თავიდან ავიცილებთ ჰაერ-წვეთოვანი და კონტაქტური გზით გადამდები დაავადებების მასიურ გავრცელებას”,_ ამბობს სიმონიშვილი.
