ქალაქ ოზურგეთში ნიკო ნიკოლაძის ქუჩაზე მცხოვრები ნიკოლოზ მამულაიშვილის სამსულიანი ოჯახი დახმარებას ითხოვს. ოჯახის ერთი-ერთი წევრი, მაია იაკობიძე ჩვენთან საუბრისას ამბობს, რომ დაზიანებულია სახლის სახურავი და ამ პრობლემის მოგვარება ვერ ხერხდება.
“ძალიან მძიმე მდგომარეობაში ვართ, ყოველ გაწვიმებაზე ტბა დგას ჩემს სახლში. მივმართე, რათქმა უნდა, ადგილობრივ ხელისუფლების წარმომადგენლებს და მომიტანეს სამშენებლო მასალა. არ მიხურავენ სახურავს მთლიანად და ვარ. ხუთი ცალი „ჟეშტი“ და ცხრა ცალი ფიცარი მომიტანეს, მაგრამ ჩვენ ამას ვერ გადავხურავთ, ისეთ მდგომარეობაში ვართ. მეუღლე საწოლს არის მიჯაჭვული, მე და ჩემს შვილს ფიზიკარად არ შეგვიძლია. ახლა მითხრეს, რომ მოვალთ და დაგეხმარებითო, მაგრამ როდის მოვლნენ არ ვიცი ზუსტად. რამდენჯერმე იყვნენ მოსულები და შეისწავლეს მდგომარეობა“,_ თქვა მაიამ იაკობიძემ.
მისივე თქმით, ოჯახი სოციალურ დახმარებას იღებს და ასევე უფასო სასადილოში მომზადებული საკვებით სარგებლობს.
“სოციალურ დახმარებას ვიღებთ და ასევე მეუღლე იღებს პენსიას, მაგრამ გეფიცებით ეს თანხა უმეტესი ნაწილი წამლებში მიდის. სამი ადამიანი ვცხოვრობთ სახლში და სამივეს გვესაჭიროება წამლები. ყოველდღე დავდივარ უფასო სასადილოში და იქ მომზადებული კერძებით ვიკვებებით. სახლში რა მდგომარეობა არის თქვენ თვითონაც ხედავთ. არავის არაფერს ვთხოვ, უბრალოდ თუ არის შესაძლებლობა სახლის სახურავი გადამიხურონ, რადგან ასე თუ გაგრძელდება, ჭერი ჩამოგვენგრევა თავზე“, _ გვითხრა ოჯახის დიასახლისმა.
ქალაქ ოზურგეთის მუნიციპალიტეტის მერიის ინფორმაციით, მაია იაკობიძისა და ნიკოლოზ მამულაშვილის სახლი 23 აპრილის სტიქიის შედეგად დაზიანდა. თუმცა, სახურავის ფართობის დაზიანების შესაბამისად, მათ 33 კვ.მ-ის ფართობის სამშენებლო მასალა (თუნუქის ფურცელი) გადაეცათ.
მერიის პრესსამსახურში ასევე აცხადებენ, რომ მამულაშვილის სახლს უახლოეს დროში აუცილებლად გადახურავენ.
“გამომდინარე იქედან, რომ აღნიშნული მოქალაქეები შეზღუდული შესაძლებლობის მქონე პირები არიან, ქალაქ ოზურგეთის მუნიციპალიტეტის მერია გამონაკლისის სახით, მიმართავს ა.(ა.)ი.პ _ოზურგეთის სერვისცენტრს“ და ამ ოჯახს სახლის სახურავის მთლიან გადახურვაში დაეხმარება. გარდა ამისა, ქალაქ ოზურგეთის მუნიციპალიტეტის მერია, ამ მდგომარეობაში მყოფ სხვა შეზღუდული შესაძლებლობის მქონე მოქალაქეებსაც მსგავს დახმარებას გაუწევს“, _ აღნიშნავენ ქალაქის მერიაში.
მათივე ინფორმაციით, გარდა ზემოთ აღნიშნულისა, მერია მაია იაკობიძესა და ნიკოლოზ მამულაშვილს სხვადასხვა სოციალურ დახმარებასაც უწევს.
„2016 წელს მძიმე საცხოვრებელ პირობებში მცხოვრებ პირთა პროგრამიდან, მათ დახმარება 400 ლარის სახით მიიღეს, ამავე წელს , 200-200 ლარი შეზღუდული შესაძლებლობის მქონე პირთა დახმარების პროგრამიდან გადაერიცხათ და ასევე, კომუნალური სუბსიდირების ვაუჩერით ისარგებლეს.
2017 წელს აღნიშნულმა ოჯახმა , შშმ პირთა დახმარების პროგრამიდან 200 ლარი მიიღო და კომუნალური სუბსიდირების ვაუჩერი გადაეცა. ისინი ასევე ქალაქ ოზურგეთის მუნიციპალიტეტის მერიის მზრუნველობამოკლებულთა ერთჯერადი კვებით არიან უზრუნველყოფილი.
მომართვის შემთხვევაში, ქალაქ ოზურგეთის მუნიციპალიტეტის მერია აღნიშნულ ოჯახს სხვადასხვა პროგრამულ დახმარებას კვლავ გაუწევს“, _ გვითხრეს მერიის პრესსამსახურში.
