ქუნთრუშას შემთხვევები ოზურგეთში – რას ამბობს ეპიდემიოლოგი

ოზურგეთის საბავშვო ბაღში ქუნთრუშას შემთხვევები დაფიქსირდა. 

როგორია მდგომარეობა ოზურგეთში და რა ზომებია მიღებული – ამის შესახებ “გურია ნიუსი” ოზურგეთის საზოგადოებრივი ჯანდაცვის ცენტრის ეპიდემილოგს ელზა სიმონიშვილს ესაუბრა.

როგორც ეპიდემიოლოგმა ჩვენთან საუბრისას აღნიშნა, ოზურგეთის მუნიციპალიტეტში სეზონურად, შემოდგომა-ზამთრის პერიოდში ბავშვთა კონტიგენტში დაფიქსირდა ქუნთრუშას შემთხვევები. ანალოგიური სიტუაცია იყო  გასულ წელსაც, თუმცა, დროულად გატარებული პრევენციული და შემზღუდველი სამედიცინო ღონისძიებების შედეგად თავიდან ავიცილეთ შემთხვევათა მასიური მატება და ლოკალური ეპიდაფეთქებები. ამჟამად ბავშვთა ასაკში ფიქსირდება ჯერ-ჯერობით ერთეული შემთხვევები, თუმცა ცალკეული ბაღის ჯგუფები გადაყვანილია საიზოლაციო რეჟიმზე, ჯერჯერობით აღნიშნული ჯგუფები ფუნქციონირებს, თუმცა ეპიდემიოლოგის რჩევით გამკაცრებულია მონიტორინგი და ზედამხედველობა ყველა იმ სიმპტომზე, რომელიც არის დამახასიათებელი აღნიშნული დაავადებისთვის.

_  რა არის ქუნთრუშა?

_ ეს არის ინფექციური დაავადება, რომელიც ძირითადად ბავშვთა ასაკში ვლინდება, თუმცა მოზრდილსაც ემართება, თუ მას ბავშვობის ასაკში არა აქვს გადატანილი დაავადება. ეპიდემიოლოგიური კვლევის შედეგად გამოვლინდა,  რომ სიმპტომები ბავშვთა ასაკში ხშირად მშობლებისათვის ბუნდოვანია, რის გამოც, ინფიცირებულ ბავშვს გადამდებლობის პერიოდში ხშირად უშვებენ საბავშვო ბაღში. ბაღების სამედიცინო პერსონალი, ჯგუფის აღმზრდელები, ბაღების მენეჯერები გაფრთხილებულნი არიან, მკაცრად გააკონტროლონ ბაღში, დილის საათებში, ჯგუფებში დაშვებამდე ბავშვთა ჯანმრთელობის მდგომარეობა. ნებისმიერი სიმპტომის გამოვლენის შემთხვევაში გააფრთხილონ მშობელი და არ დაუშვან ბავშვები ჯგუფში გამოჯანმრთელების შემდგომ სამედიცინო ცნობის გარეშე.

_ რა სიმპტომები აქვს ქუნთრუშას?

_ იმისთვის რომ მშობლებმა და სამედიცინო პერსონალმა იცოდეს თუ რა სიმპტომებია დამახასიათებელი ქუნთრუშასათვის, ჩამოგითვლით ძირითად სიმპტომებს, რაც ამ დაავადებას ახასიათებს. უპირველესად, აღსანიშნავია ის ფაქტი, რომ ეს არ არის ვაქცინაციით მართვადი დაავადება. გეგმიურ ვაქცინაციაში არ შედის ქუნთრუშას საწინააღმდეგო ვაქცინა მისი არ არსებობის გამო. გამომდინარე იქედან, რომ დაავადება ხასიათდება მაღალი კონტაგიოზურობით განსაკუთრებული სიფრთხილეა საჭირო ბავშვთა ასაკში – დამახასიათებელი სიმპტომების გამოვლენისთანავე საჭიროა, აუცილებლად მივიყვანოთ ბავშვი შესაბამის სპეციალისტთან. ეს არის პედიატრი, ბავშვთა ინფექციონისტი, ოჯახის ექიმი. დაავადება იწყება მწვავედ. მაღალი ტემპერატურით 40 გრადუსამდე. ამას თან სდევს ნუშურა ჯირკვლების მწვავე ანთება, ე.წ. ანგინა. ასევე დამახიასეთებელია ლიმფური ჯირკვლების მტკივნეულობა და გადიდება. შემდეგ იწყება გამონაყარის ფაზა. ეს არის წვრილი, უხვი გამონაყარი რომელიც სახის მიდამოებიდან თანდათან ვრცელდება ტანსა და კიდურებზე. გამონაყარისგან თავისუფალია ცხვირი და მის გვერდით არსებული ბუნებრივი ნაოჭები, რომლებიც ერთგვარ სამკუთხედს ქმნის. მისი სიფითრე თვალშისაცემია აალებული სახის ფონზე. ქუნთრუშით დაავადებული ბავშვი იღებს დამახასიათებელ იერს: თვალები უბრწყინავს, გუგები ოდნავ გაფართოებული აქვს, ლოყები – აღაჟღაჟებული, ტუჩები – ალუბლისფერი. დაავადება ჩვეულებრივი მიმდინარეობის პერიოდში გამოირჩევა იმით რომ სხვა ბავშვთა ინფექციებისგან განსხვავებით იოლი კლინიკა აქვს. სამი დღის შემდეგ გამონაყარი ალაგდება და ჩანაცვლდება ე.წ. აქერცვლის ფაზით, როდესაც კანის ზედაპირი იწყებს აქერცვლას. ხშირად ამას სდევს ქავილი და არის საფრთხე, რომ კანის დაზიანების ან ნაკაწრების შემთხვევაში გარედან მოხდეს ინფექციის შეღწევა ორგანიზმში. ჩვეულებრივად, ინკუბაციური პერიოდი გრძელდება ორიდან შვიდ დღემდე და დაავადება ალაგდება ძირითადად გართულებების გარეშე, მაგრამ შანსი იმისა, რომ დაავადების დამძიმება მოხდეს, რა თქმა უნდა არსებობს. შეიძლება ანთებითი კერები აღმოცენდეს როგორც ცალკეულ ორგანოებში, ასევე ორგანოთა სისტემებში და ინფექციამ მიიღოს გენერალიზებული ფორმა, ე,წ, სეფსისის სახით. სწორედ ამიტომ დაავადების ნიშნების გამოვლენისთანავე მშობელმა არ უნდა მიმართოს სახლის პირობებში თვითმკურნალობას და წაიყვანოს ბავშვი სპეციალისტთან.

_ როგორ ვრცელდება ქუნთრუშა?

_ გადამდებლობა არის ძირითადად ჰაერწვეთოვანი მექანიზმით, ანუ ახლო დისტანციიდან ლაპარაკის, ხველების, დაცემინების შემთხვევაში. გარდა ამისა, ეს შეიძლება იყოს დაბინძურებული საგნების ზედაპირი. ამას განსაკუთრებული მნიშვნელობა აქვს ბავშვთა ასაკში, ბავშვთა ბაღებში, ბაგებში ან სკოლების დაწყებით კლასებში, სადაც ბავშვებს ძალიან ხშრად აქვთ კონტაქტი დაბინძურებულ ზედაპირთან. ეს არის მაგიდის ზედაპირი, კარის სახელური, სათამაშოები. ამიტომ ეპიდემიოლოგიური კვლევის პროცესში ყოველთვის განსაკუთრებულად ხაზს ვუსვამთ იმას, რომ ბავშვთა სააღმზრდელო დაწესებულებების პერსონალმა ყოველდღიურად სველი წესით დაამუშავოს ოთახის სივრცე, მაგიდის ზედაპირები, სტანდარტის შესაბამისად მოხდეს (მ/შ სათამაშოების) რეცხვა და დეზინფექცია, რითაც ჩვენ თავიდან ავიცილებთ დაავადების მასიურად გავრცელების საფრთხეს, ლოკალური ეპიდაფეთქებებისა და ზოგადად, ეპიდემიოლოგიური ფონის დამძიმების რისკს. დაავადება გადატანის შემდეგ ტოვებს მყარ იმუნიტეტს. ერთხელ დაავადების შემდეგ ადამიანს ქუნთრუშა მეორედ აღარ ემართება.

კიდევ ერთხელ ვთხოვთ მშობლებს, სააღმზრდელო დაწესებულებათა პერსონალს, განსაკუთრებული ყურადღება გამოიჩინონ სიმპტომებისა და კონტაქტების აღმოსაჩენად, რადგანაც მართალია, ქუნთრუშა არ არის სეზონური ინფექცია, თუმცა სტატისტიკა აჩვენებს, რომ შემოდგომა-ზამთრის პერიოდში მისი რაოდენობა მატულობს.