გურიის ერთ-ერთ სოფელში 18 წლის ბიჭმა თვითმკვლელობა სცადა – ამ ამბიდან თითქმის 10 დღე გავიდა და როგორც „გურია ნიუსისთვის“ გახდა ცნობილი, საქმეს შინაგან საქმეთა სამინისტრო ისევ იკვლევს.
ვრცელდება ინფორმაცია, რომ ახალგაზრდა ბოლო დროს გახმაურებელ კომპიუტერული თამაშის მსხვერპლი უნდა გამხდარიყო, მაგრამ მეგობრების დახმარებით ყველაფერი კარგად დამთავრდა.
“ყველას გვიკვირს, რაც მოხდა. ნიკა (პირობითად დავარქვით ეს სახელი) კეთილშობილი და შრომისმოყვარე ბიჭია. მამასთან ერთად ცხოვრობს. სეზონურად კი თურქეთში გადადიოდა სამუშაოდ. სკოლიდან ადრე გამოვიდა და ოჯახს ეხმარებოდა. როგორც ჩვენთვის გახდა ცნობილი, თამაში თურქეთში დაიწყო. მე-13 დავალების შესასრულებლად გურიაში დაბრუნდა, რადგან, სადაც მუშაობდა, რკინიგზის ლიანდაგი არ იყო და ამიტომ ჩამოვიდა. საბედნიეროდ, აღმოვაჩინეთ ხელზე ჭრილობები და დავეჭვდით, რომ თამაშის მონაწილე იყო. ყველა უწყება ჩართულია საქმეში.
ჩვენი თხოვნაა, ყველა უნდა გამოფხიზლდეს და უფრო მასშტაბურად შეუდგნენ ამ პრობლემის მოგვარებას, თორემ ეს ახალგაზრდები დაგვეხოცება და მერე ამას არაფერი უშველის. მთელი სოფელი გადარეული ვართ. მეტი ყურადღება არის საჭირო, თუნდაც სკოლებში, რადგან ბავშვებს წიგნის მაგივრად ტელეფონები უჭირავთ ხელში. უმორჩილესად ვთხოვ მშობლებს მეტი კონტროლი დავაწესოთ ჩვენს შვილებზე და მეტად ვიცოდეთ მათ შესახებ _ რა უჭირთ და რა ულხინთ. ეს არის პრობლემა, რომელიც ერთად უნდა ვედგათ გვერდში და ყველაფერი გვერდზე უნდა გადავდოთ“, _ საუბრობს “გურია ნიუსთან“ ნიკას ერთ-ერთი ახლობელი.
შინაგან საქმეთა სამინისტროს პრესსამსახურში კი ამბობენ, რომ რამდენიმე ათეულობით ადამიანის გამოკითხვის და მოკვლეული მასალების საფუძველზე, დღეის მდგომარეობით, ქართულ ინტერნეტ სივრცეში ე.წ. ონლაინ თამაში (თამაშის სახელს შეგნებულად არ ვასახელებთ, ავტ) არსებობის რეალური ფაქტი არ დასტურდება.
შორენა ზედგინიძე, მანდატურის სამსახურის ადმინისტრაციული სამმართველოს უფროსი “გურია ნიუსთან“ საუბრისას ამბობს, რომ 7 ქალაქში (თბილისი, ბათუმი, ქუთაისი, ფოთი, გორი, რუსთავი, თელავი) შეიქმნა ფსიქოლოგიური მომსახურეობის ცენტრები და ყველაფერს აკეთებენ, რომ ეს პრობლემა დაძლეულ იქნას.
“2013 წლიდან მანდატურის სამსახურში არსებობს ფსიქოლოგების მომსახურების ცენტრი, რომელიც დაკომპლექსებულია პროფესიონალებით, რომელიც ძალიან აქტიურად მუშაობს, პრობლემის მოსაგვარებლად. თუ მსგავსი შემთხვევა დაფიქსირდა, მანდატურს აქვს იმდენი უფლებამოსილება და ცოდნა, პირველივე იდენტიფიცირების შემთხვევაში, მოახდინოს შესაბამისი რეაგირება და გადმოამისამართონ ფსიქოლოგების მომსახურების ცენტრში და შეატყობინონ ყველა უწყებას, რომელიც ჩართულიან აღნიშნული პრობლემის მოგვარების საქმეშ. ასევე, ამ მიმართულებით და ძალადობის მიმართულებით ჩვენ გვაქვს 24-საათიანი ფსიქოლოგიური მომსახურების ცხელი ხაზი და ნებისმიერ მსურველს შეუძლია მოგვამრთონ თუ რაიმე პრობლემასთან აქვს საქმე. ასევე, ტარდება სხვადასხდვა სახის ტრენინგები და საგანმანათლებლო პროგრამები, რომ მოხდეს პრევენცია ამ პრობლემისას. მშობლებთან გვაქვს კონტაქტები და სხვადასხვა საკითხებზე საჭირო ინფორმაციას ვაწვდით“, _ გვითხრა ზედგინიძემ.
“გურია ნიუსის“ კითხვაზე, რამდენად ეფექტურია ეს ღონისძიებები პრობლემის მოსაგვარებლად, გვიპასუხა, რომ ყველაფერი კეთდება პრობლემის მოსაგვარებლად.
_ ყველაფერი კეთდება რომ პრევენციული ღონისძიებები დაგეგმილი იყოს სწორად და ზუსტად მიზანმიმართული ვიყოთ ამ პრობლემის აღმოსაფხვრელად. დამერწმუნეთ, შედეგი იქნება, რადგან ძალიან აქტიურად ვმუშაობთ, _ გვითხრა შორენა ზედგინიძემ.
„გურია ნიუსთან“ საუბრის დროს რამდენიმე მოსწავლის მშობელი ამბობს, რომ სკოლაში შემოღებული იქნას მშობლების მორიგეობა.
_ მშობლის მორიგეობასთან დაკავშირებით ეს საკითხი უნდა გადაწყვიტოს სკოლის დირექციამ, მაგრამ, ჩემის აზრით, ამის საჭიროება ამ ეტაპზე არ დგას, _ თქვა შორენა ზედგინიძემ.
მშობლების ერთი ნაწილი მიიჩნევს სკოლებში უნდა აიკრძალოს ტელეფონების შეტანა. ოზურგეთის საგანმანათლებლო რესურსცენტრის უფროსის, ლელა იმედაშვილის თქმით, ტელეფონის ტარებას სკოლაში ადგეს თავად სკოლა საკუთარი შინაგანაწესით.
“მაგალითად, ზოგან ტელეფონის შეტანის უფლება სკოლაში არ აქვს მოსწავლეს და ზოგან კიდევ სასწავლო პროცესის დროს“, _ გვითხრა ლელა იმედაშვილმა.
გამოძიების დღევანდელი მდგომარეობის მიხედვით, მოზარდების თვითმკვლელობებს და თვითმკვლელობის მცდელობებს ინტერნეტთამაშთან კავშირი არ აქვს, – ეს განცხადება შინაგან საქმეთა სამინისტროს კიბერდანაშაულის პრევენციის დეპარტამენტის უფროსმა ივანე კაციტაძემ თავდაცვისა და უშიშროების კომიტეტზე გააკეთა, სადაც კიბერდანაშაულის საკითხებზე მსჯელობდნენ.
კაციტაძის თქმით, ინტერნეტთამაშს არ აქვს არც აპლიკაცია, არც ვებგვერდი და გავრცელებული ინფორმაცია მცდარია.
„ყველა შემთხვევა, რაც ჩვენ მიერ შესწავლილია, ცუდად დასრულდა თუ კარგად, არ უკავშირდება ინტერნეტთამაშს. თამაშს არც აპლიკაციის, არც ვებგვერდის სახე და არც სტარტი აქვს იმისთვის, რომ დავიწყოთ. ეს გავრცელებული ინფორმაცია მცდარია. ეს ფსიქოლოგიური დომინანტის სუსტ მსხვერპლზე ძალადობრივი დომინირებაა“, – განმარტავს კაციტაძე.
ერთი წლის წინ დაწყებული გამოძიების დეტალები და შედეგები კომიტეტზე დეპუტატებს შინაგან საქმეთა სამინისტროს ცენტრალური კრიმინალური დეპარტამენტის კიბერდანაშაულთან ბრძოლის სამმართველოს დეტექტივ-გამომძიებელმა გიორგი ჯაფარიძემ გააცნო.
მისი თქმით, ინტერნეტთამაში ორი წლის განმავლობაში რუსეთში აქტიურად გავრცელდა და დღემდე მითი და რეალობა ერთმანეთში არეულია.
როგორც ჯაფარიძემ განაცხადა, გასულ წელს, 30 მაისს გამოძიება დაიწყო კონკრეტულად თამაშის შემქმნელების მხრიდან არასრულწლოვანთა თვითმკვლელობამდე ან თვითმკვლელობის ცდამდე მიყვანის მუხლით და აღნიშნა, რომ გამოძიება დღემდე გრძელდება.
„საკმაოდ მასშტაბური გამოძიება ჩატარდა, რომლის ფარგლებშიც განათლების სამინისტროს მანდატურთან აქტიურად ვთანამშრომლობდით. ჩვენთან მანდატურის სამსახურიდან უამრავი კონკრეტული შეტყობინება შემოვიდა. ასევე, როდესაც საზოგადოებისთვის ცნობილი გახდა, რომ აღნიშნულ ფაქტზე გამოძიება მიმდინარეობდა, თვითონ მშობლები, დაინტერესებული პირები, ოჯახების ახლობლები განცხადებით მოგვმართავდნენ. უკვე ჩატარებული გამოძიების ფარგლებში, გამოიკითხა რამოდენიმე ათეული ახალგაზრდა, მათი მშობლები, ახლობლები, კონკრეტული პირები, ვისაც, შესაძლოა, კავშირი ჰქონოდა ან რაიმე სცოდნოდა, თუმცა, სრული პასუხისმგებლობით შემიძლია მოგახსენოთ, რომ დღეის მდგომარეობით, არც ერთი კონკრეტული ფაქტი არ დადასტურებულა.
თამაში არსებობს. უკანასკნელი ორი წლის განმავლობაში რუსეთში აქტიურად გავრცელებული იყო. თუმცა, აქაც მითი და რეალობა ერთმანეთში არეულია. დღეის მდგომარეობით, იქ მხოლოდ ორი პიროვნებაა დაკავებული. თამაშის შემქმნელი და ერთ-ერთი მენტორი. საქმის არსებითი განხილვა მიმდინარეობს და მათი ბრალეულობა, ჯერჯერობით, არაა დადასტურებული და არ არის დამდგარი გამამტყუნებელი განაჩენი“, – განმარტავს გიორგი ჯაფარიძე. (წყარო 1tv.ge).
“ჩვენთვის აქამდე არსებობდა წარმოდგენა თითქოს საქართველოში ეს პრობლემა ნაკლებად დგას, თუმცა, ირკვევა, რომ ადამიანების გარკვეული ჯგუფი არის დაკავებული ამ პრობლემატიკის შესწავლით. როგორც კვლევამ აჩვენა, საკმაოდ საყურადღებო პრობლემაა. ისევ იმ პრობლემასთან მივდივართ, რაზეც ძალიან ხშირად გვისაუბრია, რომ ოჯახში ძალიან ხშირად ჩვენი შვილების საქმიანობა ყურადღების მიღმა გვრჩება. მოდის ახალი დრო, ამ ახალ დროს მოსდევს თავისი სიახლეები. ამ სიახლეებს ხშირად მშობლები ჩამორჩებიან, ვერ იაზრებენ რა საშიშროება შეიძლება სდევდეს თან ინტერნეტთამაშებს. ძალიან მნიშვნელოვანი იქნებოდა სპეციალისტების აზრის მოსმენა, მნიშვნელოვანი იქნებოდა ფსიქოლოგებისგან გარკვეული დარიგებების მოსმენა. ჩვენ აქ იმისთვის ვიკრიბებით, რომ ყველა ამ საკითხთან დაკავშირებული სპეციალისტისა თუ უწყებისგან მოვისმინოთ, როგორ ხედავენ ამ პრობლემის გადაჭრის გზებს”, _ განაცხადა ჟურნალისტებთან შეხვედრის დროს კიკეთის ტაძრის წინამძღოლმა მამა ანდრია ჯაღმაიძემ.
