ლეგენდარული ჩარლი ჩაპლინის „წერილი ჯერალდინას“, რომლის დიდაქტიკა თუ რიტორიკა ზოგადსაკაცობრიო იდეალის გამოხატულებაა და აქტუალობას არასდროს კარგავს, 8 თებერვალს, ოზურგეთის სახელმწიფო თეატრის მსახიობებმა სპექტაკლის სახით წარმოადგინეს.
რეჟისორ ელენე მაცხონაშვილის სპექტაკლის პრემიერა ოზურგეთის ფოლკლორის ცენტრში შედგა, რადგან თეატრის რეაბილიტაციის პროცესი ჯერ არ დასრულებულა.
სპექტაკლის დასაწყისშივე მაყურებელი ერთგვარი სიახლის წინაშე აღმოჩნდა _ თოჯინების მეშვეობით დიდებისთვის დიადი აზრების ნოვატორული ხერხით მიტანა, რომელიც ამავდროულად, ავტორის ინდივიდუალური განუმეორებლობიდან გამომდინარე, ერთნაირად გასაგებია ყველასთვის და ასაკობრივ ბარიერს არ ქმნის. წერილის ფორმატის გამო, მეტი იყო გამომსახველობითი მხარე და ნაკლები ტექსტური ნაწილი, მძაფრი და მომენტალური იყო ჩაპლინისეული მუსიკა, ზოგჯერ მდუმარე კადრების მონაცვლეობით და მაინც, ეს ერთგვარი მიქსტურა, მსახიობების მაღალი საშემსრულებლო ხელოვნებით, ისეთ ჰარმონიულ ჭრილში გადმოიღვარა სცენიდან, რომ მათ გარინდული მაყურებელი ემოციების ტყვეობაში მოთენთეს.
თოჯინების მხატვარმა ვახტანგ ქორიძემ, ახალგაზრდა მსახიობებმა: ანი გოდერძიშვილმა, გიორგი დოლიძემ, თეა კეჭაყმაძემ, გიორგი ჩავლეშვილმა, ვახო ჩხარტიშვილმა და მარიკა ასათიანმა ემოციების უზუსტესად გადმოცემა მოახერხეს _ ჩარლ ჩაპლინის მიერ ლაღად და მოხდენილად თქმული, თავისი ზოგადსაკაცობრიო არსით, ზუსტად მიიტანეს მაყურებლეთან. და ეს შეძლეს არა მხოლოდ მაღალი საშემსრულებლო ხელოვნების ფლობით, არამედ ახალგაზრდა მსახიობებმა აჩვენეს, რომ მათი სულიერი სამყარო ესადაგება ამ წერილის დედააზრს. ალბათ, ამიტომ შეძლეს მათ ასეთი ფურორის მოხდენა.
ამიტომაც იყო დარბაზი სავსე და გასუსული, პატარა მაყურებლები დარბაზის შესასვლელში იდგნენ ფეხზე, უფროსები კი – გასასვლელში.
სპექტაკლის თანმიმდევრულობა ძალზე ჰარმონიულად იყო დიფერენცირებული და ამავე დროს შეკრულიც მუსიკის, ტექსტების თუ გამომსახველობითი ჟესტების ერთობლიობით.
მსახიობებმა „წერილი ჯერალდინას“_ ამ სიბრძნის წყაროდან, მეტად ამორჩეული ფრაზები სამკაულებად წარმოაჩინეს, რაც ურთულეს დღევანდელ რეალობაში, ძალიან ეხება, პირველ რიგში ხელისუფალთ და მერე კი თითოეულ მოკვდავს:
„ დრო და დრო მეტროში ჩადი. ქალაქი დაათვალიერე, იარე ფეხით ან ავტობუსით. ხალხს დააკვირდი! ქვრივ-ობლებს შეხედე! და თუნდაც დღეში ერთხელ მაინც შენს თავს უთხარი:”მეც ერთ-ერთი ამათთაგანი ვარ!’დიახ, შენ ერთ-ერთი იმათაგანი ხარ, ჩემო გოგონა. ხელოვნება, სანამ ცაში ასაფრენად ფრთებს უბოძებდეს ადამიანს, ჯერ ფეხებში ურტყამს… როცა დადგება წამი და იგრძნობ, როგორ მაღლდები მაყურებელზე, მაშინვე გადი სცენიდან… ადამიანს ძირს, მყარ მიწაზე უფრო ადვილად შეიძლება ფეხი დაუცდეს, ვიდრე ჯამბაზს იმ ვერაგ თოკზე…“
„მე არ მინდა, ოდესმე სიღატაკე გამოსცადო. ამ წერილთან ერთად გიგზავნი ჩეკის წიგნაკს – ხარჯე, რამდენსაც მოისურვებ, ოღონდ გახსოვდეს: ორ ფრანკს რომ დახარჯავ, შენს თავს უთხარი, მესამე მონეტა ჩემი არ არის-თქო. იგი ეკუთვნის ვინმე სხვას, უცნობს, ვისაც ის ერთი ფრანკიც სანატრელი აქვს. მისი პოვნა არ გაგიჭირდება. საკმარისია მოინდომო და ამ უცნობ ღატაკებს ყოველ ფეხის ნაბიჯზე ნახავ. ფულზე იმიტომ გელაპარაკები, რომ კარგად ვიცი ამ დემონის მაცდური ძალა…“
და ერთ-ერთი ყველაზე გაუხუნარი თეზა ადამიანად არსებობისთვის: „ნუ გაყიდი შენს გულს ოქროსა და სამკაულისთვის. იცოდე, ყველაზე დიდი ბრილიანტი მზეა, ის კი, ჩვენდა საბედნიეროდ, ყველას ერთიანად დაგვნათის“ _ სპექტაკლის მიწურულს მაჟორულ რიტმში გაისმა, რამაც კიდევ ერთხელ გაუსვა ხაზი რეჟისორის გამორცეულ ნიჭიერებას.
აღფრთოვანებულმა მაყურებელმა ხანგრძლივი ტაში არ დაიშურა მსახიობებისთვის. ცრემლიც გაკრთა.
ოზურგეთს თეატრის სამხატვრო ხელმძღვანელმა, ვასო ჩიგოგიძემ მაყურებელს, რეჟისორსა და მსახიობებს მადლობა მოუხადა, მიეფერა მათ და უახლოესი მომავლის გეგმებზე ამცნო დარბაზში მყოფთ:
_ ჩვენ ძალიან ლამაზი სპექტაკლი ვნახეთ ნოვატორული სინთეზით. ეს არის ელენე მაცხონაშვილის საავტორო სპექტაკლი. ეს ჩვენი ბოლო პრემიერაა თეატრს გარეთ, ამ ჟანრში, ამ სტილში : „თოჯინები დიდებისთვის.“ ამიტომ გადავდგით ასე მეგობრული ნაბიჯი, რომ უსასყიდლოდ ენახა მაყურებელს ეს პექტაკლი. ხოლო ამავე ჟანრში , როცა ახალ, გაბრწყინებულ შენობაში გადავალთ, ჩვენი პირობაა, რომ აუცილებლად ვნახავთ „დონკიხოტს“. ვთხოვთ, ელენეს, რომ ეს გააკეთოს, _ თქვა მან.
ახალგაზრდა, ნიჭიერმა რეჟისორმა, ელენე მაცხონაშვილმა „გურია ნიუსთან“ ასეთი კომენტარი გააკეთა:
_ რაც შეეხება კონკრეტულად სპექტაკლს, ის ჩარლი ჩაპლინის „ წერილი ჯერალდინას“ მიხედვით დაიდგა. მნიშვნელოვანია ის, რომ სამუშაო პროცესი იყო ძალიან სასიამოვნო, ხანმოკლე, მაგრამ ძალიან სასიამოვნო. მოკლე დროში ძალზე ბევრი რამ მობილიზებულად მოახერხეს, როგორც შემოქმედებითმა ჯგუფმა, ისე ტექნიკურმა პერსონალმა და შეძლეს, სავარაუდოდ, იმ შედეგის მიღება, რაც გვინდოდა. სპექტაკლს, ალბათ, მაყურებელი უკეთ შეაფასებს. დანარჩენს რაც შეეხება, მე მინდა, მადლობა გადავუხადო თითოეულ მონაწილეს და მთლიანად გურიას. ოზურგეთის თეატრს კი ვუსურვებ წარმატებებს, – გვითხრა მან.
სპექტაკლს ესწრებოდნენ, როგორც გურიის მხარის გუბერნატორი, ისე მუნიციპალიტეტის მერი და სხვა ხელმძღვანელი პირები.
