დღეს, ქალაქ ოზურგეთის საკრებულოს სხდომაზე, სადაც მთავრობის მიერ ინფრასტრუქტურული სამუშაოების დასრულებისთვის ჩამორიცხული ნახევარი მილიონი ლარის ბიუჯეტში ასახვის საკითხი განიხილეს, უმეტესად ყვირილის და ჩხუბის ხმა ისმოდა.
„ყველაზე მატყუარა მერი ხარ“, „შენ ხარ ყველაზე კორუმპირებული მერი“… _ ამ ფრაზებით საკრებულოს ოპოზიციონერმა დეპუტატმა ბეგლარ სიორიძეს მიმართა.
საკრებულოს სხდომაზე ქალაქ ოზურგეთის მუნიციპალიტეტის წმიდა გიორგის ქუჩის მცხოვრებლები იმყოფებოდნენ და მათი ქუჩის რეაბილიტაციისთვის პასუხს ითხოვდნენ.
შეგახსენებთ, რომ ამ ქუჩის მაცხოვრებლებმა რამდენიმე დღის წინ საპროტესტო აქცია გამართეს და კიდევ უფრო დიდი აქციები დააანონსეს, იმ შემთხვევაში თუ პრობლემა არ მოგვარდება.
მათ დღეს, საკრებულოს სხდომაზე საკუთარი მოსაზრებები, კიდევ ერთხელ, პერსონალურად გამოხატეს:
ეთერ მენაბდე: „ამ ქუჩაზე ვცხოვრობ და უნდა გკითხოთ, მიცალებული არავის გყავთ? აქ სასაფლაოს გზა არსაიდან არ აქვს. ხომ შეიძლება, აქ ოდესმე თქვენი მიცვალებულიც იქნეს. შარშან მილიონი ლარი იყო ბიუჯეტში გამოყოფილიო და არ შეიძლებოდა გაკეთება? კიდევ მეხუთე შესახვევში წესიერად არ მიეწოდება შუქი“.
ციცო ლიპარტელიანი: „გზის პრობლემა გვაქვს და ძალიან გთხოვთ, მოგვეშველეთ. მე ბრმა მეუღლე მყავს სახლში და ქალაქის მერიიდან დამეხმარნენ, მადლიერი ვარ, ღმერთი დამსჯის რომ არ ვთქვა, მაგრამ წყლის საკითხიც არის გადასაჭრელი და უნდა ვთქვა. ცენტრალური მაგისტრალიდან 50 მეტრით მაღლა ვართ და არ გააკეთეს, წყალი იქ არ ავაო. იქნებ, მოხერხდეს გაკეთება“.
ლია ონიანი: „გზა გაგვიკეთეთ, გთხოვთ, პატარა ბავშვების დედა ვარ, სიარული უჭირთ“.
საკრებულოზე მოსულმა წმიდა გიორგის ქუჩის მცხოვრებლებმა კიდევ ერთი, მომრავლებული მაწანწალა ძაღლების პრობლემის შესახებაც აღნიშნეს.
ხოლო დეპუტატმა გოჩა ძიმისტარაშვილმა ქალაქში რესტორან „ნატახტარის“ წინ ჩაქცეული გზის მონაკვეთზე ისაუბრა, რომელიც დღემდე არ გაკეთებულა.
ოზურგეთის მერმა თავისი გამოსვლა სწორედ დეპუტატ გოჩა ძიმისტარაშვილისადმი მიმართვით დაიწყო:
„თქვენ დეპუტატი რომ ხართ, სიმართლე უნდა გაიგო და ისე უნდა უთხრა სხვებს, ხალხი შეცდომაში არ უნდა შეიყვანო. რესტორან „ნატახტარის“ შემთხვევაში, ორჯერ გამოვაცხადეთ ტენდერი, თუმცა არავინ არ იყო მსურველი. ახლა მივმართეთ შესყიდვების სააგენტოს და ველოდებით პასუხს.კანონს არ დავარღვევ“, _ განაცხადა ბეგლარ სიორიძემ.
ამაზე გოჩა ძიმისტარაშვილმა აღნიშნა, რომ ბიზნესს ხელი ეშლება.
ოპოზიციონერმა დეპუტატებმა ნათია შარაშენიძემ და თამარ ნადირიძემ უკმაყოფილება ხმამაღლა გამოხატეს, ხალხია აქ მოსული და მათ უნდა გასცე პასუხიო.
„ოპოზიციურმა პარტიებმა უკვე დაიწყეს საარჩევნო კამპანია, მაგრამ ვინც აუნდა იქნეს ქართული ოცნების დეპუტატი, ახლოსაც ვრ მიხვალთ, სულ რომ გაერთიანდეთ მთელი მსოფლიოს ოპოზიციასთან“, _ თქვა პასუხად ბეგლარ სიორიძემ და კონკრეტულად თამარ ნადირიძის მისამართით თქვა, რომ ის „წარბს არ ატოკებს, ისე იტყუება“.
პასუხად ნადირაძისგან გაისმა: „ყველაზე მატყუარა მერი ხარ“, „შენ ხარ ყველაზე კორუმპირებული მერი“…
„კორუმპირებული მერი ვერ შეძლებს უპასუხოს ზემოთ, ქვემოთ, მარცხნივ, მარჯვნივ და თქვენც საკადრისი პასუხი გაგცეთ!“ _კვლავ უპასუხა სიორიძემ და მოუწოდა შეეწყვიტათ ყვრილი, აქ „ხელს ნუ მიშლითო“.
წმიდა გიორგის ქუჩის მცხოვრებთა მოთხოვნის პასუხად, ბეგლარ სიორიძემ განმარტა, რომ ამ ქუჩაზე გზის გაკეთებისთვის საჭიროა 800 ათასი ლარი, რაც გათვალისწინებული იქნება ბიუჯეტში და გაკეთდება 2018 წელს. გზის სიგრძე ერთ კილომეტრზე მეტია.
