ყოველი წლის 3 მარტს საქართველოში დედის დღე აღინიშნება. ამ დღესთან დაკავშირებით იმართება კულტურული ღონისძიებები, ხელისუფლება სტანდარტული ტექსტებით ულოცავს დედის დღეს მოქალაქეებს.
“გურია ნიუსმა” სამი მრავალშვილიანი დედა მოინახულა.
ოზურგეთის მუნიციპალიტეტის სოფელ ლიხაურში მცხოვრები ქეთინო გორდელაძე მეუღლესთან, მეუღლის მშობლებთან და ხუთ შვილთან ერთად ცხოვრობს. ის უმუშევარია _ ოჯახში მხოლოდ ერთი ადამიანი მუშაობს.
“პირველ რიგში, უფრო მეტი ყურადღებაა საჭირო მრავალშვილიანი დედების მიმართ. იმედია, ეს უყურადღებობა როდესმე აღარ იქნება და ჩვენი პრობლემებით უფრო მეტად დაინტერესდებიან ხელისუფლების წარმომადგენლები.
სოციალურად დაუცველთა ბაზაში არ ვართ რეგისტრირებული და აქედან გამომდინარე, სახელმწიფოსგან არანაირ დახმარებას არ ვიღებთ. ჩემი მეუღლე მუშაობს. ჩემს დასაქმებაზე არ მიზრუნია.
არის ოჯახები, სადაც მძიმე სოციალური ფონია და ლუკმა-პურის, პამპერსის ყიდვაში ეხარჯებათ ის ფული, რომელსაც სახელმწიფოსგან იღებენ.
კარგი იქნება, თუ ჩვენთვის დასაქმების პროგრამა ამოქმედდება. არ ვიცი, რამდენად რეალურია ეს ოცნება, მაგრამ… ასევე, ბავშვებს სრული განათლების მისაღებად ბევრი რამე ჭირდებათ, არის უფასო და ფასიანი სასწავლო პროგრამები. კარგი იქნება, მრავალშვილიანი ოჯახისთვის ამ კუთხით თუ იქნება შეღავათები”, _ გვითხრა ქეთინო გორდელაძემ.
ნინო დათუნაშვილი ქალაქ ოზურგეთში ცხოვრობს, მას და მის მეუღლეს ექვსი შვილი ჰყავს.
“ყველა არასრულწლოვან ბავშვზე ოზურგეთის მუნიციპალიტეტის მერიისგან ვიღებთ 25 ლარს, ეს დახმარება ყოველთვიურია, რომელიც ამ ეტაპზე ხუთ ბავშვს ეძლევა. ყველამ კარგად იცის, რომ 25 ლარი მხოლოდ პამპერსის და პურის ფულია, მაგრამ სულ არაფერს, რა თქმა უნდა, ჯობს. ჩემი მეუღლე სეზონურად მუშაობს, მე _ ერთ-ერთ კაფე-ბარში. არ არის ადვილი ექვსი შვილის გაზრდა, რჩენა. რასაც ვიშოვით უმეტესი ნაწილი საკვებში მიდის და დანარჩენი ნაწილი კი ბანკის ვალებში”, _ თქვა ნინო დათუნაშვილმა.
ქეთევან ვასაძე ოთხი შვილის დედაა, სახლში ცხრა სული ცხოვრობს. მას ძალიან უნდა, რომ სამუშაო იშოვოს:
“მიუხედავად იმისა, რომ მაქვს სურვილი, დავიწყო მუშაობა, ვერ ვახერხებ. კარგი იქნებოდა, საბავშვო ბაღში დასაქმება, მაგრამ ეს მარტო ჩემს სურვილზე არ არის დამოკიდებული. უმაღლესი სასწავლებელი მაქვს დამთავრებული, მაგრამ დიპლომი, ჯერჯერობით, არაფერში გამომადგა. ქმარსაც არ აქვს სტაბილური სამუშაო და თვიდან თვემდე ძლივს გაგვაქვს თავი. თან ჩემს მულს, რომელიც ჩვენთან ერთად ცხოვრობს, ჯანმრთელობის პრობლემა აქვს და სერიოზული დახმარება სჭირდება. კარგად ვიცით, რომ დალხინებულ ქვეყანაში არ ვცხოვრობთ, მაგრამ ელემენტარული ყურადღება გვჭირდება და უფრო მეტი დახმარება გვინდა. სტაბილური სამუშაო ადგილების შექმნა არის საჭირო”, _ აღნიშნა ჩვენთან საუბრისას ქეთინო ვასაძემ.
ოზურგეთის მუნიციპალიტეტის მერიის სოციალურ საკითხთა განყოფილების უფროსის მოვალეობის შემსრულებელი ქეთევან სანიკიძე “გურია ნიუსთან საუბრისას ამბობს, რომ “დახმარების პროგრამა მრავალშვილიანი ოჯახებისთვის და ვეხმარებით ოზურგეთის მუნიციპალიტეტის ტერიტორიაზე მცხოვრებლებს, რომლებსაც ჰყავს ოთხი ან მეტი 18-წლამდე შვილი. აუცილებელი მოთხოვნაა, ისინი რეგისტრირებულები იყვნენ სოციალურ სააგენტოში და ჰქონდეთ მინიჭებული, რომელიც უნდა იყოს 100 000 ათასიდან 150 00 ათასამდე. მათ ოზურგეთის მუნიციპალიტეტის მერიიდან ყოველთვიურად, თითოეულ ბავშვზე 25 ლარი ეძლევათ”.
ქეთევან სანიკიძის თქმით, მრავალშვილიანი დედებისთვის 3 მარტისთვის მზადება ერთჯერადი დახმარება.
“ეს იქნება ის ოჯახები, რომელიც ჩვენს ბაზაში არიან დარეგისტრირებულები”, _ აღნიშნა ქეთევან სანიკიძემ.
სოციალური მომსახურების სააგენტოს გურიის სოციალური მომსახურების სამხარეო ცენტრში გვითხრეს:
“სახელმწიფო მრავალშვილიან დედებს მესამე და ყოველ შემდეგ ბავშვზე ორი წლის განმავლობაში,150 ლარს ურიცხავს. თუ ოჯახი არის სოციალურად დაუცველი, ამას ემატება სოციალური შემწეობაც. ერთ წლამდე ბავშვი შეგვიძლია კვების სპეციალურ პროგრამაში ჩავსვათ. შესაძლებელია, კრიზისული ტვირთის პროგრამით სარგებლობაც, რომლის ფარგლებში, ოჯახს მათთვის საჭირო ტექნიკას გადავცემთ (მაცივარი, სარეცხი მანქანა და ა. შ.). 2019 წლის იანვრიდან სოციალურად დაუცველი ოჯახების 16-წლამდე ბავშვთა შემწეობა 10 ლარიდან 50 ლარამდე გაიზარდა”.
ოზურგეთის მუნიციპალიტეტის საკრებულოს განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარე ლელა საჯაია ამბობს, მრავალშვილიანი ოჯახებისთვის წელს მუნიციპალიტეტში მხოლოდ ერთი პროგრამა არსებობს:
“მესმის იმ ადამიანების, რომლებიც სახელმწიფოსგან ითხოვენ დახმარებას. ვაპირებთ, რომ ამ კუთხით დახმარების პროგრამები გავზარდოთ”, _ გვითხრა ლელა საჯაიამ.
