“გურია ნიუსის” ვებ-გვერდზე ჰაკერულ თავდასხმას შინაგან საქმეთა სამინისტროს კიბერდანაშაულთან ბრძოლის სამმართველო ინტენსიურად იძიებს, თუმცა რა ეტაპზეა გამოძიება და არის თუ არა სიახლე ამ პროცესში, უწყებაში კომენტარს არ აკეთებენ.
როგორც „გურია ნიუსს“ აღნიშნულთან დაკავშირებით უთხრეს, კომენტარის გაკეთებისგან შსს გამოძიების ინტერესებიდან გამომდინარე თავს იკავებს.
შეგახსენებთ, რომ მედიასახლი “გურია NEWS“-ის ვებ-გვერდზე ჰაკერული თავდასხმა 21 თებერვალს, გამთენიისას, მოხდა. ჰაკერებმა წაშალეს ყველა ინფორმაცია და ბაზები.
იმავე დღეს, შინაგან საქმეთა სამინისტროს კიბერდანაშაულთან ბრძოლის სამმართველომ აღნიშნულთან დაკავშირებით გამოძიება ორი მუხლით დაიწყო.
გამოძიება დაწყებულია სისხლის სამართლის კოდექსის284-ე მუხლის 1 ნაწილით, რაც კანონით დაცულ კომპიუტერულ ინფორმაციასთან, ესე იგი მანქანამატარებელზე, ელექტროგამომთვლელ მანქანაზე (ეგმ-ზე), ეგმ-ის სისტემაში ან მათ ქსელში ასახულ ინფორმაციასთან არამართლზომიერ შეღწევას გულისხმობს, რამაც ინფორმაციის განადგურება, ბლოკირება, მოდიფიცირება ან მოპოვება ანდა ეგმ-ის, ეგმ-ის სისტემის ან მათი ქსელის მოშლა გამოიწვია. ასევე მობილური მოწყობილობის საერთაშორისო იდენტიფიკატორის შეცვლა. ეს დანაშაული ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით იმავე ვადით გარდა ამისა, გამოძიება მიმდინარეობს ამავე კოდექსის 286-ე მუხლით, რაც ეგმის, ეგმის სისტემის ან მათი ქსელის ექსპლუატაციის წესის დარღვევას ( ეგმის, ეგმის სისტემის ან მათი ქსელის ექსპლუატაციის წესის დარღვევა იმის მიერ, ვისაც ხელი მიუწვდებოდა ეგმზე, ეგმის სისტემაზე ან მათ ქსელზე, რამაც გამოიწვია ეგმის კანონით დაცული ინფორმაციის განადგურება, ბლოკირება, მოდიფიცირება ან გადაღება ანდა რამაც მნიშვნელოვანი ზიანი გამოიწვია) გულისხმობს და ისჯება ჯარიმით ან საზოგადოებისათვის სასარგებლო შრომით ვადით ას ოთხმოციდან ორას საათამდე ანდა თავისუფლების შეზღუდვით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ. ხოლო იგივე ქმედება, რამაც გამოიწვია მძიმე შედეგი,- ისჯება თავისუფლების აღკვეთით ვადით ორიდან ოთხ წლამდე.
შემთხვევიდან მეორე დღესვე განცხადება გააკეთა საქართველოს სახალხო დამცველმა უჩა ნანუაშვილმა და შესაბამისი ორგანოებისგან ფაქტის დროულად გამოძიება მოითხოვა:
„მედიის თავისუფლებისა და ინფორმაციის თავისუფალი გავრცელებისათვის მნიშვნელოვანია, რომ მედიასაშუალებები, ჟურნალისტები შეუფერხებლად მუშაობდნენ. აღნიშნულის უზრუნველსაყოფად, აუცილებელია სამართალდამცავი ორგანოების დროული და ეფექტური რეაგირება უკვე მომხდარ ფაქტზე და დამნაშავე პირების სათანადოდ დასჯა. სახალხო დამცველი მიადევნებს თვალს „გურია ნიუსის“ ვებგვერდზე ჰაკერული შეტევის ფაქტზე გამოძიების მიმდინარეობას”, _ აღნიშნულია სახალხო დამცველის განცხადებაში.
ცნობისთვის, ჯერჯერობით ვერ მოხერხდა “გურია ნიუსის” ვებ-გვერდისა და მასზე განთავსებული ინფორმაციის აღდგენა, რის გამოც, სატესტო რეჟიმში მუშაობს გამოცემის ახალი ვებ-გვერდი.
