„ევროკავშირის ბანკი საქართველოს სოფლებში ეროვნული ფართოზოლოვანი ქსელის გაფართოებისთვის 34 მილიონ ევროს გამოყოფს”, _ ამის შესახებ ინფორმაციას ევროპის გუნდი ავრცელებს.
განცხადებაში აღნიშნულია, რომ ევროპის საინვესტიციო ბანკის ეს სესხი უზრუნველყოფილია ევროკავშირის გარანტით, საგარეო დაკრედიტების მანდატის ფარგლებში. დაახლოებით, 500,000 ადამიანი 1000 სოფელში სწრაფი, საიმედო და ხელმისაწვდომი ინტერნეტით ისარგებლებს, რომელიც, როგორც მოსალოდნელია, ასევე, ხელს შეუწყობს ადგილობრივი ბიზნესის განვითარებას.
ევროკავშირის მიერ გარანტირებული ევროპის საინვესტიციო ბანკის სესხი მხარს უჭერს საქართველოსთვის ციფრული კავშირის გაუმჯობესებას აღმოსავლეთ პარტნიორობისთვის ევროკავშირის ეკონომიკური და საინვესტიციო გეგმის ფლაგმანი ინიციატივის ფარგლებში.
ევროპის საინვესტიციო ბანკი, ევროკავშირის ბანკი, განახორციელებს ინვესტიციას 34 მილიონი ევროს ოდენობით მაღალსიჩქარიანი ინტერნეტის ქსელის გაფართოებაში, რომელიც უზრუნველყოფს სწრაფ და საიმედო ინტერნეტ სერვისებს საქართველოს 1000 სოფელსა და შორეულ დასახლებაში მცხოვრები 500 000 საქართველოს მოქალაქისთვის. ევროკავშირის ბანკის ინვესტიცია დააფინანსებს 5000 კმ ოპტიკურ-ბოჭკოვანი სატელეკომუნიკაციო ქსელის ინსტალაციას და უზრუნველყოფს ღია დაშვების ინფრასტრუქტურის დანერგვას საქართველოს საკომუნიკაციო ქსელის ოპერატორებისთვის მათ მიერ სწრაფი ინტერნეტის სერვისების უზრუნველსაყოფად. ევროკავშირმა გარანტია გარე დაკრედიტების მანდატის საფუძველზე გასცა.
ევროპის საინვესტიციო ბანკის ეს ახალი ოპერაცია არის ევროპის გუნდის უფრო ფართო ძალისხმევის ნაწილი, რათა საქართველოს მხარი დაუჭიროს ციფრული ტექნოლოგიების დანერგვაში, ეკოლოგიური და მდგრადი სოციალური და ეკონომიკური ზრდის დაჩქარებაში და ქვეყნის მასშტაბით სტიქიური უბედურებებისადმი, როგორიცაა COVID-19 პანდემია, მდგრადობის გაზრდაში“.
როგორც საყოველთაო ინტერნეტიზაციის სახელმწიფო პროგრამის განმახორციელებელ ორგანიზაცია ა(ა)იპ „ოუფენ ნეტის“ პრესსამსახურში განგვიცხადეს, მსოფლიო ბანკთან ერთად, რომლის მხარდაჭერით ხორციელდება პროექტი “Log in Georgia”, მნიშვნელოვანია კიდევ ერთი წამყვანი ფინანსური ინსტიტუტის, ევროპის საინვესტიციო ბანკის ჩართულობა საქართველოს რეგიონების ციფრული ტრანსფორმაციის პროცესში.
მათივე ინფორმაციით, პროგრამის ფარგლებში მიმდინარე ეტაპზე, ქსელის მშენებლობა დასრულებულია ოზურგეთის მუნიციპალიტეტში, სადაც აშენდა 140 კმ ოპტიკურ-ბოჭკოვანი ინფრასტრუქტურა.
მშენებლობა დასრულების ეტაპზეა ქობულეთის მუნიციპალიტეტში, რომელიც მოიცავს 50 კმ-იანი მაგისტრალის მშენებლობას, 13 დასახლებულ პუნქტს და 10,500 მოსახლეს. ამასთან, გამოცხადებულია ტენდერები ოპტიკური ქსელის მშენებლობაზე რაჭასა და ლეჩხუმში.
გარდა რაჭა-ლეჩხუმისა, უახლოეს მომავალში, პროექტის ფარგლებში უკვე დაგეგმილია შემდეგი სამიზნე გეოგრაფიული არეალები: სამტრედია-ჩოხატაური და ქობულეთი (ჩაქვის მიმართულება) – ხელვაჩაური. ასევე, 2022 წლის I ნახევარი – წყალტუბო და ხონი, ვარციხე, მესტია, ზუგდიდი, ხობი, სენაკი და აბაშა. 2022 წლის II ნახევარი – ჩხოროწყუ, მარტვილი, წალენჯიხა, ტყიბული, ვანი, ზესტაფონი, ბაღდათი და ქედა.
“ოუფენ ნეტის” ინფორმაციით, კერძო სატელეკომუნიკაციო ოპერატორების მხრიდან, ოუფენ ნეტის ქსელის გამოყენებით, უკვე მიმდინარეობს მოსახლეობის ქსელში ჩართვა.
ოზურგეთში ორი კომპანია _ “ეარნეტი“ და “სკაიტელი“ ემსახურება მომხმარებლებს.
“ეარნეტის“ დირექტორი შოთა მიქაძე “გურია ნიუსთან“ საუბრის დროს ამბობს, რომ ამ ეტაპზე პროექტის ფარგლებში 300 აბონენტს შეუყვანეს ინტერნეტი.
“ამ ეტაპისთვის ერთი სოფელი მაკვანეთი აქტიურია და უახლოეს თვეებში იგეგმება 7 სოფლის ჩართვა. ასევე, ოზურგეთის მუნიციპალიტეტის მერიაში გვაქვს შეტანილი 17 სოფელზე პროექტი და ველოდებით მის დამტკიცებას.
2021 წლის სექტემებრიდან დღემდე 300 აბონენტს მიეწოდება ინტერნეტი და პროექტის დასრულების შემდეგ 2 700-3 000 ოჯახს ექნება ინტერნეტი ამ პროექტის ფარგლებში”, _ გვითხრა შოთა მიქაძემ.
“გურია ნიუსი“ დაუკავშირდა “სკაიტელის“ წარმომადგენლობას. სატელეფონო საუბრის დროს გვითხრეს, რომ ელექტრონულ ფოსტაზე გაგვეგზავნა კითხვები. მათ ჩვენს კითხვებს არ უპასუხეს.
[sexy_author_bio]
