ოზურგეთის მუნიციპალიტეტის კურორტ გომისმთაზე დღეისთვის უკიდურესად მწვავე, უკონტროლო მდგომარეობაა შექმნილი _ აქ კურორტის სტატუსის მინიჭებიდან დღემდე, ყოველგვარი კონტროლისა და ზედამხედველობის გარეშე გრძელდება ფიზიკური პირების მიერ მიწის ნაკვეთების უკანონო მიტაცება და თვითნებური მშენებლობები (ძირითადად სააგარაკე სახლები შენდება).
მოქალაქეებს თვითნებურად გაჰყავთ გზები და აწყობენ სხვადასხვა დანიშნულების ინფრასტრუქტურულ ობიექტებს _ ცხოველთა სადგომებს, საპირფარეშოებს, სამუშაო ინვენტარის შესანახი სათავსოებს. ასევე, ხდება მიწების ათვისება ერთწლიანი სასოფლო-სამეურნეო კულტურების წარმოების ორგანიზაციის მიზნით.
არავინ არაფრად დაგიდევთ მოქმედ კანონმდებლობას, რომელიც ითვალისწინებს მიწების მიტაცებისა და უკანონო მშენებლობის აკრძალვის სხვადასხვა ფორმას და წესს, სადამსჯელო ღონისძიებების და სანქციების გატარება კი სერიოზულ გართულებებთან არის დაკავშირებული.
საქმე იმაშია, რომ კურორტ გომისმთის ტერიტორიაზე მიწის ნაკვეთების მიტაცება და უნებართვო მშენებლობები რამდენიმე ათეული წლებია გრძელდება. ბოლომდე დაუზუსტებელი მონაცემებით, დღეისთვის კურორტის ტერიტორიაზე 800-მდე მოქალაქე ფლობს უნებართვოდ აშენებულ, შესაბამისად დაურეგისტრირებელ სააგარაკე სახლებს და მიზნობრივი დანიშნულების სხვადასხვა ნაგებობებს.
რაც ყველაზე მიუღებელია, კურორტ გომისმთაზე დღეს არსებული ფაქტობრივი მდგომარეობის მეტნაკლებად მოწესრიგების ღონისძიებების გახორციელებას ხელს უშლის კურორტ გომისმთის პროექტის სახით არსებული მიწათსარგებლობის გენერალური გეგმის დაუმტკიცებლობა იმის გამო, რომ შესაბამისი უწყების მიერ, ჯერჯერობით, ვერ მოხერხდა აღნიშნული კურორტისთვის დასახლების რომელიმე კატეგორიის სტატუსის მინიჭება.
თემა ძალზე, მწვავე და აქტუალურია, რაც მოქალაქეთა დიდ ინტერესს იწვევს.
ჩვენ ვესაუბრეთ ოზურგეთის მუნიციპალიტეტის საკრებულოს სივრცით-ტერიტორიული დაგეგმარების და ინფრასტრუქტურის კომისიის თავმჯდომარეს ლავრენტი ბიგვავას, რომელიც ამბობს, რომ კომისიამ, ფრაქცია “ქართული ოცნება-დემოკრატიული საქართველო”-სთან ერთად, შეისწავლა კურორტ გომისმთაზე არსებული მდგომარეობა, მოახდინა მოკვლეული ფაქტობრივი შედეგების ანალიზი და ერთობლივ სხდომაზე მიიღეს სარეკომენდაციო გადაწყვეტილებები.
_ ბატონო ლავრენტი, საზოგადოებაში დიდი ინტერესი გამოიწვია ინფორმაციის გავრცელებამ იმის თაობაზე, რომ კურორტზე არსებული მშენებარე სახლების ის კატეგორია, რომელთა 30%-ია აშენებული, არ შეეხებიან.
_ ეს ინფორმაცია არ არის სწორი და ზუსტი _ ჩვენ არაფერი დაგვიკანონებია. სარეკომენდაციო მიმართვა გავაკეთეთ, რომლის მიხედვით, ოზურგეთის მუნიციპალიტეტის მერიამ მიმდინარე წლის 15 აგვისტოდან კურორტ გომისმთის ტერიტორიაზე არ დაუშვას უნებართვო მშენებლობებისა და ფიზიკური პირების მიერ მშენებლობის მიზნით ადგილების მონიშვნის არც ერთი ფაქტი. ხოლო ასეთის გამოვლენის შემთხვევაში, იმოქმედოს მოქმედი კანონმდებლობის მოთხოვნების შესაბამისად. დროის უმოკლეს პერიოდში კი დაასრულოს, კონკრეტულად ეს რიცხვი 2019 წლის 15 აგვისტომდე იყო, უნებართვოდ აშენებული სააგარაკე სახლების და სხვა ნაგებობების (ქონების), აგრეთვე, მშენებლობის პროცესში მყოფი სააგარაკე სახლების (შესრულებული სამუშაოების 30% და მეტი ოდენობით) ინვენტარიზაცია და მოახდინოს მიღებული შედეგების სისტემატიზაცია კურორტის უბნების, აშენების წლებისა და ნაგებობების ტიპების მიხედვით.
_ და მოახდინეს? უკვე აგვისტოს ბოლო რიცხვებია…
_ სამწუხაროდ, ეს რთული პროცესია, ხელს უამინდობაც უშლით, არის წვიმებიც, ხშირად ნისლია. მუშაობა დაწყებულია და გრძელდება. უნდა მივაღწიოთ იმას, რომ მერიამ შეძლოს კურორტზე შექმნილი ფაქტობრივად უმართავი პროცესების სამართლებრივ ჩარჩოებში მოქცევისა და იქ მიმდინარე სოციალურ-ეკონომიკური პრობლემების დაარეგულიროს. შეიმუშაოს და აღნიშნული დანიშნულების დოკუმენტი აუცილებლობის შემთხვევაში წარუდგინოს საქართველოს პარლამენტს და მთავრობას.
ოზურგეთის მუნიციპალიტეტის საკრებულომ, ასევე, საკუთარი კომპეტენციის ფარგლებში უნდა უზრუნველყოს კურორტ გომისმთის დასახლების რომელიმე კატეგორიის სტატუსის მინიჭებისა და შესაბამისად, აღნიშნული კურორტის მიწათსარგებლობის გენერალური გეგმის დამტკიცების მიმდინარე პროცესების დაჩქარება.
_ გურიის სამხარეო ადმინისტრაციას რა მოთხოვნა წარუდგინეთ?
_ სამხარეო ადმინისტრაციას ეთხოვა, რომ საკუთარი უფლებამოსილების ფარგლებში ოზურგეთის მუნიციპალიტეტის მერიას აღმოუჩინოს სათანადო დახმარება (მეთოდური, საკონსულტაციო) ზემდგომ ორგანოებთან კურორტ გომისმთასთან დაკავშირებული უმწვავესი პრობლემების მოგვარებისთვის, _ გვითხრა ბიგვავამ.
