აპრილის საკრებულოს ბოლო, შემაჯამებელ სხდომაზე დეპუტატებმა, „ლანჩხუთის მუნიციპალიტეტში გადაუდებელი ამბულატორიული მომსახურების მიწოდების მიზნით 2019 წელს გასახორციელებელი საჯარო შენობების მშენებლობა-რეაბილიტაციის პროექტები“ მოიწონეს. თუმცა, სანამ საქმე კენჭისყრამდე მივიდოდა, ინფრასტრუქტურის სამსახურის უფროსის, ლევან ჩხაიძის მიერ საკითხის საკრებულოს სამსჯავროზე გამოტანას კამათის გარეშე არ ჩაუვლია.
საქმე ისაა, რომ მიმდინარე წელს ამბულატორიის მშენებლობა იგეგმება სუფსაში, ხოლო შუხუთში, აკეთში, ნიგოითსა და აცანაში სარეაბილიტაციო სამუშაოები გახორციელდება. ლესის მაჟორიტარი დეპუტატის, ელისო ჭიჭინაძის გულისწყრომის მიზეზი საკრებულოს სხდომაზე სწორედ ის გახდა, რომ ზემონახსენები სოფლების ხუთეულში ლესის ამბულატორია ვერ მოხვდა.
„საინტერესოა, რა კრიტერიუმით შეირჩა ეს სოფლები, კომისიამ ან კონკრეტულმა პიროვნებამ თუ შეამოწმა სხვა ადმინისტრაციული ერთეულების სამედიცინო პუნქტების მდგომარეობა ინფრასტრუქტურის კუთხით?
ხუთი თვის წინ დავსვი ლესის ამბულატორიის საკითხი საკრებულოს სხდომაზე. მაშინ ითქვა, რომ ლესისა და ნინოშვილის სამედიცინო პუნქტებში 20 ათასი ლარის ფარგლებში სარეაბილიტაციო სამუშაოები გახორციელდებოდა. სოფლის რწმუნებულიც დამემოწმება, თუ რამდენჯერ მოუწია ექიმს მის კაბინეტში პაციენტების გასინჯვა. კიბე ჩაშლილია, იატაკზე საუბარიც აღარ ღირს, ისეთი მდგომარეობაა. იმედი გვქონდა, რომ დაპირება შესრულდებოდა, მით უმეტეს, რომ საკითხს საკრებულომ ერთხმად დაუჭირა მხარი. იმავე სხდომაზე მერს მადლობაც კი გადავუხადე ამისთვის. ახლა რა ხდება, საკრებულოს გადაწყვეტილება ვიღაცამ დაიწუნა და როგორც უნდოდა ისე შეცვალა?!
ყველგან და ყველაფერში შერჩევითი სამართალი გაგონილა?! ვინ შეარჩია და რის საფუძველზე ეს სოფლები?! ვითხოვ, შეიქმნას მუშა ჯგუფი და შემოწმდეს, სად რა მდგომარეობაა“, _ თქვა ჭიჭინაძემ.
ლესის მაჟორიტარის პასუხად ლევან ჩხაიძემ განმარტა, რომ სოფლების შერჩევა ზემოთ ნახსენებ პროექტებთან დაკავშირებით საგანგებო მართვის სამსახურმა განახორციელა და მუნიციპალიტეტი ამ საქმეში ჩართული არ ყოფილა.
„ჩვენგან მოითხოვეს ამბულატორიების სია და გარკვევა, რომელ სოფელში ვის ბალანსზე იყო ქონება. სხვა მხრივ, მუნიციპალიტეტს ამ საქმეში მონაწილეობა არ მიუღია“, _ განმარტა ჩხაიძემ.
ინფრასტრუქტურის სამსახურის მიერ გაკეთებული ეს განმარტება მთლად მისაღები ვერ დარჩა ზოგიერთი დეპუტატისთვის, რომელთა მოსაზრებით, მსგავსი გადაწყვეტილებების მიღება, სწორედ რომ ადგილობრივი ხელისუფლების პრეროგატივაა და საერთოდაც, მათთვის გაუგებარია, რა შუაშია ამბულატორიების რეაბილიტაციის საქმესთან საგანგებო მართვის სამსახური.
როგორც საკრებულოს სხდომაზე გამოჩნდა, საქმის კურსში, თუ სად და როგორ შეირჩა სარეაბილიტაციო ობიექტები, არც მერი და არც საკრებულოს თავმჯდომარე არ ყოფილან და შესაბამისად, ლესის მაჟორიტარის მხრიდან გაჟღერებულ კითხვას, თუ რა კრიტერიუმით მოხდა სოფლების შერჩევა ზემონახსენები პროექტის გასახორციელებლად, სხდომაზე პასუხი ვერ გაეცა. თუმცა, ჭიჭინაძე დააიმედეს, რომ სამომავლოდ ეტაპობრივად ყველა სოფელში მოხდება ამბულატორიების რეაბილიტაცია, მათ შორის, ლესაშიც. საკრებულოს პირველმა პირმაც სამომავლოდ საქმეში მუნიციპალიტეტის მეტი ჩართულობა დააანონსა.
„ძალიან მინდა იმ ადამიანების გაცნობა, ვინც შეამოწმა ეს ამბულატორიები, რომ ვანახო, თუნდაც ნიგვზიანში რა მდგომარეობაა. არის სოფლები, სადაც სამედიცინო პუნქტზე შუქიც კი არაა. ახლა რა მოცემულობაც გვაქვს, ის უნდა მივიღოთ, მომავალში ჩვენთან ერთად უნდა შემოწმდეს ადგილზე მდგომარეობა“, _ აღნიშნა ბესო ტაბიძემ.
მართალია, ზევით ჩვენგან დამოუკიდებლად კი მიიღეს გადაწყვეტილება, მარა მთავრობას შემოთავაზებულზე უარს ხომ არ ვეტყვითო _ ამ არგუმენტით მუნიციპალიტეტის ხუთ სოფელში ამბულატორიის მშენებლობა-რეაბილიტაციის პროექტების გახორციელების საკითხმა, საბოლოოდ, დეპუტატთა უმრავლესობის მოწონება დაიმსახურა.
